ރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސިޔާސަތުތައް ދުނިޔޭން ވެސް ބަލައިގަނެފައިވާ ކަމަށް ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ވިދާޅުވެއްޖެއެވެ.

ނައިބު ރައީސް މިހެން ވިދާޅުވީ  ޕީއެސްއެމް ނިއުސްގެ "ހަފްތާ 52" ލައިވް ކަވަރޭޖަށް ދެއްވި އިންޓަވިއުއެއްގައެވެ.

އިންޓަވިއުގައި ނައިބު ރައީސް ވަނީ މި ސަރުކާރުން ވެރިކަމާ ހަވާލުވިއިރު ރާއްޖެ އޮތް ހާލަތުން އަރައިގަތުމަށް ކޮށްފައިވާ މަސައްކަތްތަކުގެ ތަފްސީލު ހިއްސާކުރައްވައިފައެވެ. އެމަނިކުފާނު ވިދާޅުވީ ސަރުކާރުގެ ހުރިހާ މަސައްކަތްތަކެއް ވެސް ބައްޓަންކުރެވިފައި ވަނީ ރައްޔިތުންގެ ލާބަޔާއި މަންފާއަށް ކަމަށެވެ.

ނައިބު ރައީސް ފާހަގަކުރެއްވި ގޮތުގައި، މި ސަރުކާރުން ވެރިކަމާ ހަވާލުވިއިރު އޮތް އެންމެ ބޮޑު ގޮންޖެހުމަކީ ދައުލަތުގެ ހިންގުމަށް ދަތިވާ މިންވަރަށް ދަރަނި ނަގާފައި ހުރުމެވެ. ނަމަވެސް، މިކަމުގައި ސަރުކާރުން ކުރިއެރުންތައް ހޯދާފައިވާ ކަމަށާއި، މިކަމުގައި ސަރުކާރުން މަސައްކަތްކުރަމުންދަނީ ޤައުމުތަކާ ގާތް ގުޅުމެއް ބާއްވައިގެންކަން އެމަނިކުފާނު ފާހަގަކުރެއްވިއެވެ.

"ދަރަނި ދައްކަންހުރި ޤައުމުތަކާއެކު ގުޅުންތައް ބަދަހިވެއްޖެ. ޚާރިޖީ ސިޔާސަތުގެ ތެރެއިން ވަރަށް ބޮޑެތި ލުއިތަކެއް ދަނީ ލިބެމުން. މިވެސް ކާމިޔާބީތަކެއް. މި ކާމިޔާބީތައް ލިބެމުންދަނީ އަޅުގަނޑުމެންގެ ޚާރިޖީ ސިޔާސަތުތަކުން. ދުނިޔެ ވެސް ބަލައިގަނެފި ރައީސްގެ ސިޔާސަތުތައް،" ނައިބު ރައީސް ވިދާޅުވިއެވެ.

ނައިބު ރައީސް އިތުރަށް ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އެންމެ ފާހަގަކޮށްލެވޭ ސިފަފުޅަކީ، ކަންކަމާ މަޝްވަރާކުރެއްވުމާއި ކަމާ ގުޅުން ހުރި ފަރާތްތަކުގެ ޚިޔާލު ހޯއްދެވުން ކަމަށެވެ.

ކުރިއަށް އޮތް ދުވަސްތަކުގައި ގިނަ މަޝްރޫޢުތަކެއް ފެށިގެންދާނެ ކަމަށް ނައިބު ރައީސް ވިދާޅުވިއެވެ. އޭގެ ތެރޭގައި ބޯހިޔާވަހިކަމުގެ ގިނަ މަޝްރޫޢުތަކެއް ހިމެނޭކަމަށާއި، މިކަމަށް ބަޖެޓުގެ ބޮޑު ބައެއް ކަނޑައަޅާފައިވާކަން އެމަނިކުފާނު ފާހަގަކުރެއްވިއެވެ.

ނައިބު ރައީސް ޙުސައިން މުޙައްމަދު ލަޠީފް ވިދާޅުވީ، ސަރުކާރުން މަސައްކަތްކުރަމުންދަނީ އިޖުތިމާޢީ ގޮތުން ރާއްޖޭގައި ހުރި ބޮޑެތި މައްސަލަތަކަށް ވެސް ދާއިމީ ޙައްލުތަކެއް ހޯދައިދިނުމަށްކަމަށެވެ. އަދި ސަރުކާރުން މިގެންނަ ބަދަލުތަކާއެކު ޤައުމުގެ މިސްރާބު ހުރީ އެމަގުން ކަމަށް ނައިބު ރައީސް ލަޠީފް ފާހަގަކުރެއްވިއެވެ.