ޕީޕަލްސް ނެޝަނަލް ކޮންގްރެސްގެ ނާއިބު ރައީސްގެ މަޤާމަށް ޑިފެންސް މިނިސްޓަރު މުޙައްމަދު ޣައްސާން މައުމޫނާއި ފިޝަރީޒް މިނިސްޓަރު އަޙްމަދު ޝިޔާމް ހަމަޖައްސަވައިފި އެވެ.

އެ ދެ ބޭފުޅުން އެ މަޤާމަށް ހަމަޖެެެއްސެވީ މިރޭ އޮތް ކޮންގްރެސް ޕާޓީގެ ސެނެޓް ބައްދަލްވުމުގަ އެވެ.

މިރޭ އޮތް ސެނެޓް ބައްދަލްވުމުގެ ކުރީން މިހާރު އުވާލާފައިވާ ޕީޕީއެމްގެ ސެނެޓްގެ ވަރަށް ގިނަ އަދަދެއްގެ ސެނެޓަރުން ވަނީ ކޮންގްރެސް ޕާޓީއާ ގުޅިވަޑައިގެންފަ އެވެ.

ސެނެޓްގެ ބައްދަލްވުމުގައި މިނިސްޓަރު ޣައްސާން އާއި މިނިސްޓަރު ޝިޔާމް، ކޮންގްރެސްގެ ނާއިބު ރައީސުންގެ މަޤާމަށް އައްޔަނު ކުރެއްވުމަށް ހުށައެޅުއްވީ ކޮންގްރެސްގެ ރައީސް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެވެ.

ކޮންގްރެސްގެ ސެކްރެޓަރީ ޖެނަރަލް މުއާޒް ޙަލީމް އެމްއެމްޓީވީއަށް މައުލޫމާތު ދެއްވަމުން މިރޭ ވިދާޅުވީ ރައީސްގެ އެ ހުށައެޅުއްވުމާއި ގުޅިގެން ސެނެޓްގެ ފުރިހަމަ ތާޢީދާ އެކު ސެނެޓުން އެ ހުށައެޅުން ފާސް ކުރައްވާފައިވާ ކަމަށެވެ.

އެ ހުށައެޅުން ފާސްކުރީ ސެނެޓްގެ 123 މެންބަރުންގެ އިއްތިފާޤުންނެވެ.