އިންޓަނޭޝަނަލް ކެރަމް ފެޑެރޭޝަން (އައިސީއެފް) ގެ ނައިބު ރައީސްގެ މަޤާމަށް ރާއްޖޭގެ ކެރަމް އެސޯސިއޭޝަންގެ ޖެނެރަލް ސެކްރެޓަރީ ހުސެއިން ރައުޝާން އިންތިޚާބުކޮށްފިއެވެ.

މި މަޤާމަށް ރައުޝާން އިންތިޚާބުކުރެވުނީ އެމެރިކާގެ ކެލިފޯނިއާ ސްޓޭޓުގެ ސެން ފްރެންސިސްކޯ ބޭ އޭރިއާގައި ކުރިއަށްދާ ހަވަނަ ކެރަމް ވޯލްޑް ކަޕުގެ ތެރެއިން އިއްޔެ ބޭއްވުނު އައިސީއެފްގެ ކޮންގްރެސްގައެވެ.

ކުރިއަށް އޮތް ހަތަރު އަހަރުގެ ދައުރަކަށް އިންތިޚާބުވުމާއެކު، ރައުޝާނަކީ އައިސީއެފްގެ ނައިބު ރައީސްކަމުގެ މަޤާމު ފުރުއްވާ އުމުރުން އެންމެ ހަގު ބޭފުޅާއެވެ.

ރައުޝާންގެ ކެރަމް ދާއިރާގެ ތަޖުރިބާއަށް ބަލާއިރު، އެންމެ ފުރަތަމަ 2013 ވަނަ އަހަރުގެ އިންޓަރ ސްކޫލް މުބާރާތުގައި ކުޅުންތެރިއެއްގެ ގޮތުގައި ބައިވެރިވިއެވެ. އޭގެ ފަހުން، 2014 ވަނަ އަހަރު ރާއްޖޭގައި ބޭއްވި ކެރަމް ވޯލްޑް ކަޕުގައި އަމްޕަޔަރެއްގެ ގޮތުގައި މަސައްކަތްކުރެއްވިއެވެ. އަދި އެ މުބާރާތުގެ ފައިނަލް މެޗުގައި ވެސް އިންސާފުކުރެއްވީ ރައުޝާންއެވެ.

ދެހާސް ނަވާރަ ވަނަ އަހަރު ރާއްޖޭގެ ކެރަމް އެސޯސިއޭޝަންގެ ޖެނެރަލް ސެކްރެޓަރީގެ މަޤާމަށް އައްޔަންކުރި ރައުޝާން، ފަހުން ވަނީ ކެރަމް އެސޯސިއޭޝަން ހިންގުމުގެ އިތުރުން، ބައިނަލްއަޤްވާމީ ޖަމްޢިއްޔާތަކާ އޮންނަ ގުޅުން ވަރުގަދަކުރުމުގައި މުހިންމު ދައުރެއް އަދާކުރައްވައިފައެވެ. މީގެ އިތުރުން، މި އަހަރު ރާއްޖޭގައި ބޭއްވި އޭޝިއަން ޗެމްޕިއަންޝިޕް އިންތިޒާމުކުރުމުގައި ވެސް ރައުޝާން ވަނީ އިސްކޮށް ހަރަކާތްތެރިވެވަޑައިގެންފައެވެ.