ތ. ގުރައިދޫގައި އެއަރޕޯޓް ތަރައްޤީކުރުމަށް ބޭނުންވާ ބިން ހިއްކުމުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާ ހަވާލުކޮށްފި އެވެ.

އިމާރާތްކުރުމާއި ބިމާއި އުމްރާނީ ތަރައްޤީއާ ބެހޭ ވުޒާރާގެ ފަރާތުން އެއްބަސްވުމުގައި ސޮއިކުރެއްވީ އެ ވުޒާރާގެ ސްޓޭޓް މިނިސްޓަރ އިބްރާހީމް ޠަޢާމު މުޙައްމަދެވެ. އަދި އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ ޑީސީޕީ ރިޓަޔާޑް އަޙްމަދު ސައުދީއެވެ.

މި އެއްބަސްވުމުގެ ދަށުން، ތ. ގުރައިދޫގައި އެއަރޕޯޓް ހެދުމަށް ބޭނުންވާ ބިން ހިއްކުމުގެ އިތުރުން، ހިއްކި ސަރަޙައްދު ޙިމާޔަތްކުރުމަށް ބޭނުންވާ ޝޯ ޕްރޮޓެކްޝަންގެ މަސައްކަތް ވެސް އެމްޓީސީސީއިން ކުރިއަށް ގެންދާނެއެވެ.

ތ. ގުރައިދޫގައި އެއަރޕޯޓެއް ތަރައްޤީކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅެއްކަން ފާހަގަކޮށްލެވެއެވެ. މި މަޝްރޫޢުގެ ސަބަބުން އެ ސަރަޙައްދުގެ ދަތުރުފަތުރުގެ ނިޒާމަށް ބޮޑު ކުރިއެރުމެއް ލިބި، ރަށުގެ އިޤްތިޞާދަށް ފައިދާކުރާނެ ކަމަށް ބެލެވެއެވެ.

.