އިންތިޚާބުވެ ވަޑައިގަތުމަށް ފަހު އަހަރެއް ފާހަގަކުރައްވާއިރު، ރައީސް ޑރ. މުޙައްމަދު މުޢިއްޒު ވަނީ ދިވެހި ރާއްޖެ ކުރިއަރާ، ދެމެހެއްޓެނިވި ޤައުމަކަށް ބަދަލުކުރުމުގެ ސާފު ވިޝަނެއް އޮތް ލީޑަރެއްގެ ގޮތުގައި ފާހަގަވެފައެވެ. ރައީސް މުޢިއްޒު ވަނީ ދިގު މުއްދަތަކަށް ދެމިގެންދާ މައްސަލަތައް ހައްލުކުރުމަށާއި ހުރިހާ ދިވެހިންނަށް ރަނގަޅު މުސްތަޤުބަލެއް ބިނާކުރުމަށް އަމާޒު ހިއްޕަވައިފައެވެ.

ބްރެޒިލްގެ އިތައިޕޫ ޑޭމް އިމާރާތްކުރުމުގެ ދަތުރަށް ބަލާލަމާތޯ އެވެ. އެއީ ބޮޑު ހައިޑްރޯއިލެކްޓްރިކް މަޝްރޫޢެކެވެ. ނަވާރަސަތޭކަ ހަތްދިހައިގެ އަހަރުތަކުގައި ބްރެޒިލްއާއި ޕެރަގުއޭއިން އިތައިޕޫ މަޝްރޫޢު ފެށިއިރު، އޭގެ ސަބަބުން ސިޓީތަކެއް ޤުރުބާންކުރަން ޖެހުނެވެ. އަދި އެތައް ހާސް ބަޔަކު ތަން ދޫކޮށް ދާން ޖެހުނެވެ. އަދި ތިމާވެށީގެ ކަންބޮޑުވުންތަކާ ވެސް ކުރިމަތިލާން ޖެހުނެވެ. މި ގޮންޖެހުންތަކާ ކުރިމަތިލާން ޖެހުނު ނަމަވެސް، މިހާރު އިތައިޕޫ އަކީ ދުނިޔޭގެ އެންމެ ބޮޑެތި އިއާދަކުރަނިވި ހަކަތައިގެ މަސްދަރުތަކުގެ ތެރެއިން އެއް މަސްދަރެވެ. އަދި އެއީ ދެ ޤައުމުގެ ކުރިއެރުމާއި ފާގަތިކަމަށް ބާރުދޭ އެއްޗެކެވެ.

އެފަދައިން، ރައީސް މުޢިއްޒުގެ މަޤްޞަދަކީ ދިވެހިރާއްޖޭގެ ގޮންޖެހުންތައް ފުރުޞަތުތަކަށް ބަދަލުކުރުމެވެ. އެމަނިކުފާނުގެ ސަރުކާރުން ވަނީ އަހަރުތަކެއް ވަންދެން ޤައުމަށް ދަތިވަމުން އައި ހައްލުނުވެ ހުރި މައްސަލަތައް ހައްލުކުރުމަށް މަސައްކަތް ފައްޓަވައިފައެވެ. މީގެ ތެރޭގައި ގެދޮރުގެ ދަތިކަމާއި އިންފްރާސްޓްރަކްޗަރގެ ދަތިކަމާއި އިޤްތިޞާދު ފުޅާކުރުމާއި މޫސުމަށް އަންނަ ބަދަލުތަކާ ކުރިމަތިލުމުގެ ޤާބިލުކަން އިތުރުކުރުން ހިމެނެއެވެ.

ހަމައެހެންމެ އެތައް ސަރުކާރެއް ނިމިގެން ދިޔައިރުވެސް އަޅުގަނޑުމެންގެ ރާއްޖޭގެ މަގުތަކުގައި ފެންބޮޑުވުމުގެ މައްސަލައަކަށް ހައްލެއް ގެނެސް ނުދެވެއެވެ. ނަމަވެސް ރައީސް މުޢިއްޒުގެ ވެރިކަމުގެ ފުރަތަމަ އަަަހަރުތެރޭގައި ވެސް ވަނީ މިފަދަ މައްސަލަތައް ހައްލުކުރެއްވުމަށް އިސްނަންގަވައިފައެވެ.

ބޮޑެތި ކަންކަން ހައްލު ކުރެވޭނީ ވަށައިގެންވާ ކުދިކުދި ކަންކަން ހައްލު ކުރެވިގެންނެވެ. މީގެ ކުރިން ފެންބޮޑުވެއްޖެނަމަ ރައްޔިތުން ޖެހެނީ މަގުމަތީގައި އުޅޭ ބުޅަލުގެ ނަޖިސްތަކުގެ ތެރޭގައި ހިނގާށެވެ. ނަމަވެސް މިހާރު މިވަނީ ބުޅާ ފެސިލިޓީ ތައްޔާރުކުރެވި މަގުމަތީގައި އުޅޭ ބުޅާތައް ވަނީ އެތަނަށް ގެންދަން ފަށައިފައެވެ.

ފުރަތަމަ އަހަރުގައި ރައީސް މުޢިއްޒު ވަނީ ހުރިހާ ދާއިރާއެއްގައި ވެސް ތަރައްޤީގެ މަގު ތަނަވަސްކޮށްދެއްވައިފައެވެ. އެމަނިކުފާނުގެ ސަރުކާރުން ވަނީ ރަށްތަކުގެ މެދުގައި ގުޅުން ބަދަހިކުރުމަށާއި ގެދޮރުގެ ޙާލަތު ރަނގަޅުކުރުމަށާއި ފަތުރުވެރިކަމާއި މަސްވެރިކަމާއި އިއާދަކުރަނިވި ހަކަތައިގެ ޒަރީއާއިން އިޤްތިޞާދު ވަރުގަދަކުރުމަށް މަޝްރޫޢުތައް ފައްޓަވައިފައެވެ.

ކުރީގެ ސަރުކާރުތަކާ ޚިލާފަށް، އެމަނިކުފާނު ވަނީ ވާހަކަތަކުގެ ބަދަލުގައި ޢަމަލީ މަސައްކަތަށް އިސްކަންދެއްވައިފައެވެ. އަދި އެންމެ ދުރުގައި އޮންނަ ރަށްތަކަށް ވެސް ތަރައްޤީގެ އަސަރު ކުރާނެކަން ޔަޤީންކޮށްދެއްވައިފައެވެ.

ހައްލުނުވެ ހުރި ގެދޮރުގެ މަޝްރޫޢުތަކުން ފެށިގެން މޫސުމަށް އަންނަ ބަދަލުތަކުގެ އަސަރުތަކާ ހަމައަށް، ރައީސް މުޢިއްޒު ވަނީ ކުރީގައި އިހުމާލުވެފައިވާ ނުވަތަ އެކަށީގެންވާ ވަރަށް ސަމާލުކަން ނުދީ ހުރި މައްސަލަތައް ހައްލުކުރުމަށް މަސައްކަތް ކުރައްވައިފައެވެ. އެމަނިކުފާނުގެ ސަރުކާރުން ވަނީ ކުނި މެނޭޖްކުރުމާއި، ފެންބޮޑުވުން ކޮންޓްރޯލްކުރުމާއި، ހަކަތައިގެ ރައްކާތެރިކަން ޤާއިމުކުރުމަށް ޚާއްޞަ ސަމާލުކަމެއް ދެއްވައިފައެވެ. މިއީ ދިވެހިރާއްޖޭގެ މުސްތަޤުބަލުގެ ދެމިއޮތުމާއި ކުރިއެރުމަށް ވަރަށް މުހިންމު ކަންކަމެވެ.

މީގެ އިތުރުން، ރައީސް މުޢިއްޒުގެ ލީޑަރޝިޕްގައި ޤައުމު އެއްބައިވަންތަކުރުމަށް މަސައްކަތް ކުރެވިފައިވެއެވެ. އެމަނިކުފާނުގެ ސަރުކާރުން ވަނީ ޒުވާނުންނަށް ވަޒީފާގެ ފުރުޞަތުތައް އިތުރުކުރުމަށާއި، އަންހެނުން ބާރުވެރިކުރުވުމަށާއި، ޞިއްޙީ ޚިދުމަތާއި ތަޢުލީމު ލިބުމުގެ ފުރުޞަތު އިތުރުކުރުމަށް ޕްރޮގްރާމްތައް ފައްޓަވައިފައެވެ.

ބްރެޒިލުން އިތައިޕޫ ޑޭމް އިމާރާތްކުރުމުގައި ދެމިތިބި ފަދައިން، ކުރިއެރުމުގެ މަގުގައި ކެތްތެރިކަމާއި ޤުރުބާނީ ބޭނުންވެއެވެ. ނަމަވެސް، އޭގެ ނަތީޖާއެއްގެ ގޮތުން ލިބިދާނެ ކާމިޔާބީތައް - އެއީ އެކުލެވިގެންވާ، ދެމެހެއްޓެނިވި އަދި ފާގަތި ދިވެހިރާއްޖެއެއް ބިނާކުރުމެވެ.

ރައީސް މުޢިއްޒުގެ ސަރުކާރުން ޤައުމަށް ދެއްވާ މެސެޖަކީ ދިވެހިރާއްޖޭގެ އެންމެ ރަނގަޅު ދުވަސްތައް އަދި ކުރިއަށް އޮތް ކަމެވެ. ވިޝަނާއި، ކެތްތެރިކަމާއި، އެއްބާރުލުން ލިބިގެން އަދަށްވުރެ އުފާވެރި ދިވެހީންގެ ރާއްޖެއެއް ބިނާ ކުރެވޭނެއެވެ.