އެމަނިކުފާނު ގަބޫލުފުޅުކުރައްވާ ގޮތުގައި އެންމެ ރަނގަޅު ގޮތަކަށް ވާނީ ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެކުގައި ބޭއްވުން ކަމަށާއި، އެހެންނަމަވެސް އެކަމުގައި ގޮތެއް ނިންމާނީ ރައްޔިތުން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

"ރައްޔިތުންނާ އެކު" ޕޮޑްކާސްޓްގެ ހަ ވަނަ ޕްރޮގްރާމްގައި މިއަދު ވާހަކަފުޅުދައްކަވަމުން ރައީސް ވަނީ އިންތިޚާބުތައް އެއްކޮށްލުމުން ޚަރަދު ވަރަށް ބޮޑުތަނުން ކުޑަވާނެ ކަމަށާއި، އެންމެ މުއްސަނދި އަދި އެންމެ ބޮޑެތި ޤައުމުތަކުގައި އޮންނަ ގޮތަށް ރާއްޖޭގައި ކަންކަން އޮންނަންޖެހޭ ކަމަށް އެމަނިކުފާނު ގަބޫލުފުޅުނުކުރައްވާ ކަމަށް ވިދާޅުވެފައެވެ.

ރައީސް ވިދާޅުވީ ރާއްޖޭގައި މައިގަނޑު ގޮތެއްގައި އޮންނަނީ ކައުންސިލް އިންތިޚާބާއި، ރައްޔިތުންގެ މަޖިލީހުގެ އިންތިޚާބު އަދި ރިޔާސީ އިންތިޚާބު ކަމަށެވެ.

ރައީސް ވިދާޅުވީ ޑިމޮކްރަސީގެ އުސޫލުތައް ތަންފީޒުކުރާއިރު ރައްޔިތުންގެ ބާރުވެރިކަމާއި، ޤާނޫނީ ވެރިކަން އަދި ދެފުށްފެންނަ ނިޒާމެއް އޮވެ ހުރިހާ ކަމެއް ފުރިހަމަވެގެން ދިއުމަކީ އެމަނިކުފާނުގެ ވިސްނުންފުޅު ކަމަށެވެ. އެހެންނަމަވެސް ގޮތް ނިންމަވާނީ ރައްޔިތުންގެ ބައިވެރިވުމާ އެކުގައި ކަމަށް ޕޮޑްކާސްޓްގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

ރައީސް ވިދާޅުވީ މައިގަނޑު ދެ އިންތިޚާބު އެއްކޮށްލުމުގެ އިތުރުން، ރިޔާސީ އިންތިޚާބު ބާއްވާއިރު ޕްރިފަރެންޝަލް ވޯޓިން ނިޒާމަށް އެމަނިކުފާނު ތާއިދުކުރައްވާ ކަމަށެވެ. އެއީ އެންމެ ގިނަ ރައްޔިތުންގެ ބައިވެރިވުން އޮތުމާއެކު ރައީސްކަމަށް ބޭފުޅަކު އައްޔަނުކުރުމުގެ ފުރުސަތު ފަހިވެގެންދާނެ ނިޒާމެއް ކަމަށް ރައީސް ވިދާޅުވިއެވެ. އެ ހުރިހާ ކަމެއްގައި ވެސް ގޮތް ނިންމަވާނީ ރައްޔިތުންގެ ޚިޔާލާ އެކުގައި ކަމަށް ރައީސް ތަކުރާރުކޮށް ވިދާޅުވިއެވެ.