ވޭތުވެދިޔަ އަހަރުތަކުގައި އާސަންދައިން ކޮށްފައިވާ ޚަރަދުތަކުގެ ތެރެއިން 60 ޕަސެންޓް ޚަރަދު ކޮށްފައިވަނީ ހަމައެކަނި ބޭސް ވިއްކުމަށް ކަމަށް ސިއްޙަތާ ބެހޭ ވަޒީރު ޢަބްދުﷲ ނާޒިމް އިބްރާހީމް ވިދާޅުވެއްޖެއެވެ.

ވަޒީރު ވިދާޅުވީ ރައްޔިތުން އެދެނީ ސިއްޙީ ނިޒާމުގެ ތެރެއިން އާސަންދަ ފަދަ މުހިންމު ޚިދުމަތްތައް އެންމެ ފައިދާ ހުރި ގޮތުގައި އޭގެ ޙައްޤުވެރި ފަރާތްތަކަށް ލިބޭނެ ނިޒާމަކަށް ވެގެން ދިޔުން ކަމަށެވެ. އަދި އެ ނިޒާމްގެ ސަބަބުން ޤައުމުގެ ތަރައްޤީއަށް ހުރި އެހެނިހެން ކަންކަން ކުރުމަށް ހުރި ގޮންޖެހުމަށް ނުވާނެ ނިޒާމަކަށް ވެގެން ދިޔުމަކީވެސް ރައްޔިތުން އެދޭނެ ކަމެއްކަން ވަޒީރު ފާހަގަކުރެއްވިއެވެ. 

ޞިއްޙީ ދާއިރާ ހަރުދަނާ ކުރުމަށް ކުރާ މަސައްކަތްތަކުގައި މި ސަރުކާރުގެ ސިޔާސަތަކީ އެންމެ ނިކަމެތި މީހާއަށް ވެސް ބޭސްފަރުވާގެ ޚިދުމަތް އެންމެ އެދެވޭ ގޮތުގައި ލިބޭކަން ކަށަވަރުކުރުން ކަމަށް ވެސް މިނިސްޓަރު ވިދާޅުުވވިއެވެ. 

ނާޒިމް ވިދާޅުވީ، ކޮންމެ އަހަރެއްގެ ބަޖެޓުން އާސަންދައަށް ކަނޑައަޅާފައި އޮންނަ މިންވަރަށް ވުރެ އިތުރަށް ޚަރަދު ކުރަން ޖެހުމަކީ އިޤްތިޞާދަށް އެކަމުގެ ބުރަ ބޮޑުވާ ކަމެއް ކަމަށެވެ.

އައު ޚިދުމަތްތަކާއެކު ހުޅުމާލެ ހޮސްޕިޓަލު ޓަރޝަރީ ފެންވަރަށް ބަދަލުކޮށް ރަސްމީކޮށް ހުޅުވުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން ނާޒިމް އިބްރާހީމް ވިދާޅުވީ އާސަންދަ ނިޒާމް ބޭނުން ކުރަމުން އަންނަތާ 15 ވަރަކަށް އަހަރުވި ނަމަވެސް އެއްވެސް އަހަރަކު އާސަންދައަށް ކަނޑައަޅާފައިވާ ޢަދަދުން ޚަރަދުތައް ހަމަނުޖެއްސޭ ކަމަށެވެ.

ނަމަވެސް ބޭހުގެ އަގުތައް ދުނިޔޭގެ ނިސްބަތުން އަޅާބަލާއިރު ބޮޑު ކަމަށާއި މިކަން މިހެންވެފައި އޮތީ އާސަންދަ ނިޒާމުގައި ބަލަންޖެހޭ ކަންކަން ނުބަލާ އަޅަންޖެހޭ ފިޔަވަޅުތައް އަޅާފައި ނެތުމުގެ ސަބަބުންކަން ވަޒީރު ފާހަގަކުރެއްވިއެވެ.

 ނާޒިމް ވިދާޅުވިއެވެ. 

ސިއްޙަތާ ބެހޭ ވަޒީރު ޢަބްދުﷲ ނާޡިމް އިބްރާހީމް ވިދާޅުވީ މި ސަރުކާރުން ޤަބޫލުކުރާ ސިއްޙީ ނިޒާމުގެ ސިޔާސަތަކީ ރާއްޖޭގެ އެންމެ ކުޑަ ރަށުގައި ހުރި އެންމެ ނިކަމެތި މީހާއަށް ބޭސްފަރުވާގެ ނިޒާމް އެންމެ އެދެވޭ ގޮތުގައި ލިބުން ކަމަށެވެ. އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޚާއްސަ އިރުޝާދާއެކު ސިއްޙީ ދާއިރާގެ ކަންކަން ރަނގަޅުކުރުމަށް މަސައްކަތް ފަށާފައިވާކަންވެސް ވަޒީރު ފާހަގަކުރެއްވިއެވެ.

މީގެ އިތުރުން ވަޒީރު ވަނީ ބަލިވެގެން ޑޮކްޓަރަށް ދެއްކުމުގެ ކުރިން ދުޅަހެޔޮ އާބާދީއެއް ބިނާކުރުން މުހިންމުކަން ފާހަގަ ކުރައްވާފެއެވެ. އެގޮތުން ޕަބްލިކް ހެލްތް ޕްރިވެންޝަންގެ ޕްރޮގްރާމެއް މިހާރު 7 އަތޮޅުގައި ފަށާފައިވާ ކަމަށާއި އަންނަ އަހަރު މުޅި ރާއްޖެއަށް މި ޕްރޮގްރާމް ފުޅާކުރައްވާނެ ކަމަށްވެސް ވަޒީރު ވިދާޅުވިއެވެ.