ސަބްސިޑީ ދިނުމުގެ އުސޫލަށް ރޭވުންތެރިކަމާއެކުގައި ކަމަށް އެމްއެމްއޭގެ ގަވަރުނަރު އަހުމަދު މުނައްވަރު ވިދާޅުވެއްޖެއެވެ.

ބަޖެޓު ދިރާސާކުރާ ކޮމެޓީއަށް މާލީ ވަޒީރުގެ އިތުރުން މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީގެ ގަވަރުނަރު އަޙްމަދު މުނައްވަރާއި، އޮޑިޓަރ ޖެނެރަލް ޙުސައިން ނިޔާޒީ ވަނީ ހާޒިރުކޮށްފައެވެ.

މި ބައްދަލުވުމުގައި އެމްއެމްއޭގެ ގަވަރުނަރު އަހުމަދު މުނައްވަރު ވިދާޅުވީ ސަބްސިޑީއަށް ގެންނަ ބަދަލުތަކަކީ ހެޔޮ ބަދަލެއް ކަމަށެވެ. އެހެންނަމަވެސް އެއީ ވަރަށް ރޭވުންތެރިކަމާއެކު ކުރަން ޖެހޭ ކަމެއް ކަމަށެވެ. 

 މުނައްވަރު ވިދާޅުވިއެވެ.

ދައުލަތުގެ ހަރަދު ކުޑަކުރުމަށް އަންނަ އަހަރަށް ލަފާކުރާ ދައުލަތުގެ ބަޖެޓުގައި ހިމަނާފައިވާ ފިޔަވަޅުތައް ނާޅައިފި ނަމަ ބަޖެޓަށް ތިން ބިލިއަން ރުފިޔާ އިތުރުވާނެ ފިނޭންސް މިނިސްޓްރީން ލަފާކޮށްފައިވާއިރު، އޭގެ ތެރެއިން އެންމެ މުހިއްމު ކަމެއްގެ ގޮތުގައި ބަޖެޓް ފޮތުގައި ހިމަނާފައި އޮތީ ސަބްސިޑީ ދިނުމުގެ އުސޫލް ރިފޯމް ކުރުމެވެ. 

އެ މިނިސްޓްރީން އާންމުކޮށްފައިވާ ބަޖެޓުގެ ތަފްސީލީ ރިޕޯޓުގައިވާ ގޮތުން، އެންމެ ބޭނުން ޖެހިފައިވާ މީހުންނަށް ސަބްސިޑީ ދިނުމުގެ އުސޫލަށް އަމަލު ނުކޮށްފި ނަމަ ސަބްސިޑީގެ ހޭދައަށް އަންނަ އަހަރު 2.1 ބިލިއަން ރުފިޔާ އިތުރުވާނެ އެވެ.

ބަޖެޓް ދިރާސާ ކުރުމުގެ މަސައްކަތްތައް ރައްޔިތުންގެ މަޖިލިހުން މިހާރު ކުރަމުން އަންނައިރު، އަންނަ އަހަރު ހަ ސަބްސިޑީއަކަށް 1.9 ބިލިއަން ރުފިޔާ ކަނޑައަޅާފައި ވެ އެވެ. އެހެންވެ، ރިފޯމު ފިޔަވަޅުތައް ނާޅާއިފި ނަމަ ސަބްސިޑީގެ ޖުމްލަ ހަރަދު ހަތަރު ބިލިއަން ރުފިޔާ އަށް އިތުރުވާނެ އެވެ.

އަންނަ އަހަރަށް ލަފާކޮށް ސަރުކާރުން ރައްޔިތުންގެ މަޖިލިހަށް ފޮނުވީ 56 ބިލިއަން ރުފިޔާގެ ބަޖެޓެކެވެ.

ފިނޭންސް މިނިސްޓްރީން ވަނީ މިހާރު އެއްހަމައަކުން ދޭ ހަތަރު ސަބްސިޑީއެއް ޓާގެޓުކޮށް އެންމެ ބޭނުން ޖެހިފައިވާ މީހުންނަށް ދޭން ބަޖެޓުގައި ކަނޑައަޅައިފަ އެވެ. އަންނަ އަހަރުގެ އޭޕްރީލް މަހުން ފެށިގެން ތެލާއި ކާޑާއި ކަރަންޓާއި ނަރުދަމާގެ ސަބްސިޑީ ދޭނީ ގޭބީސީތަކުގެ އާމްދަނީ އަށް ބަލައިގެންނެވެ. އެކަމަށް ބަޖެޓުގައި 900 މިލިއަން ރުފިޔާ ކަނޑައަޅާފައި ވެ އެވެ.

ސަބްސިޑީގެ އިތުރުން އާސަންދަ އަށް ގެންނަ ބަދަލުތަކަށް އަމަލުކޮށް، ހަރަދުތައް ކުޑަ ނުކޮށްފި ނަމަ އާސަންދައިގެ ހަރަދަށް 700 މިލިއަން ރުފިޔާ އިތުރުވެއެވެ. އާސަންދަ އަށް އެންމެ މުއްސަދިންގެ އަތުން ކޮންޓްރިބިއުޝަނެއް ނަގައި ޕްރައިވެޓް ހޮސްޕިޓަލްތަކުން ހޯދާ ހިދުމަތްތަކަށް އެއް މިންގަނޑެއްގައި ޕެކޭޖުތަކެއް ހަދަން ވަނީ ނިންމާފައެވެ. 

އަދި ޕްރައިވެޓް އިންޝުއަރެންސް ނަގާފައިވާ މީހުންގެ ބޭސްފަރުވާއަށް އެންމެ ފުރަތަމަ ކަނޑާނީ ޕްރައިވެޓް އިންޝުއަރެންސުން ކަމަށް ކަނޑައަޅައި، އާސަންދައިން ކަވަރުކުރާނީ ޕްރައިވެޓް އިންޝުއަރެންސުން ކަވަރު ނުކުރާ މިންވަރު ކަމަށްވެސް އާސަންދައިން ބުނެފައިވެއެވެ.