ފްލެޓް ލިސްޓް ފުރިހަމަކުރަން އިތުރު ވަގުތު ބޭނުންވާ ކަމަށް ހައުސިން މިނިސްޓްރީން މިއަދު ބުނެފިއެވެ. 

ގެދޮރުވެރިކަމާއި ބިމާއި އުމްރާނީ ތަރައްގީއާއި ބެހޭ ވުޒާރާއިން ނެރުނު ނޫސްބަޔާނެއްގައި ބުނެފައިވަނީ އެޕްލިކޭޝަން ފޯމް ބެލުމުގައި ކަށަވަރުކުރަންޖެހޭ ގިނަ ކަންކަން ހުރުމާއި ގުޅިގެން މި މަސައްކަތް ނިންމުމަށް އިތުރު ވަގުތު ބޭނުންވާ ކަމަށެވެ. ނަމަވެސް ވަކި ތާރީހެއް އެބަޔާނުގައި ބުނެފައެއް ނުވެއެވެ.

މިދިޔަ ސަރުކާރުން އެކުލަވާލާފައިވާ ލިސްޓް އަލުން ދިރާސާކޮށް ނިންމާ ފުރިހަމަ ލިސްޓެއް އެކުލަވައި ނުލެވޭތީ ފްލެސްޓް ލިސްޓް އާންމުކުރުން މީގެ ކުރިން 3 ފަހަރެއްގެ މަތިން ފަސްކޮށްފައިވެއެވެ.

އެ ނޫސްބަޔާނުގައި ބުނެފައިވާ ގޮތުގައި ވަގުތީ ލިސްޓާއި ރީ-އިވޭލުއޭޝަނާ ގުޅިގެން ކުރިއަށް ގެންދެވުނު މަސައްކަތްތަކުގެ ތަފްސީލުތައް މި މަސައްކަތްތައް ނިމުނުހާ އަވަހަކަށް އާންމުކުރާނެ ކަމަށާއި އަދި މި މަސައްކަތްތަކަށް އިތުރު މުއްދަތު ދިޔަކަމުގައިވީ ނަމަވެސް، ސަރުކާރުގެ މަގްސަދަކީ މި ސްކީމުން ފްލެޓް ހޯދުމަށް ހުށަހަޅާފައިވާ އެއްވެސް ފަރާތެއްގެ ހައްގެއް ގެއްލިގެން ނުދާނެކަން ކަށަވަރުކުރުމާއެކު، މި ސްކީމްގެ ދަށުން ތަރައްގީކުރާ ފްލެޓްތައް ދޫކުރެވޭނީ ހައްގުވެރިންނަށްކަން ޔަގީން ކުރުމެވެ.