ރައީސުލްޖުމްހޫރިއްޔާ، ސިފައިންގެ އެންމެމަތީ ވެރިޔާ ޑރ. މުޙައްމަދު މުޢިއްޒު، ގައުމީ ޚާއްޞަ މަސައްކަތެއްގެ ގޮތުގައި ސިފައިންނާ ހަވާލުކުރައްވައިގެން ތެލެސީމިއާ ސެންޓަރު ހުޅުމާލޭ އޮރެންޖްހިޔާއަށް ބަދަލުކުރުމަށް ފެށި މަސައްކަތް ނިންމައި، މިއަދު މިނިސްޓްރީ އޮފް ހެލްތާ ހަވާލުކޮށްފިއެވެ.

"ރައްޔިތުންނާއެކު" މި ނަމުގައި ރައީސް ކުރިޔަށްގެންދަވާ ޕޮޑްކާސްޓްގެ ފުރަތަމަ އެޕިސޯޑްގައި ވާހަކަފުޅު ދައްކަވަމުން އެމަނިކުފާން ވިދާޅުވީ ތެލަސީމިއާ ސެންޓަރުގެ ދަތިކަން ހައްލު ކުރުމުގެ ގޮތުން އޮރެންޖް ހިޔާ އަށް އެތަން ބަދަލު ކުރުމުގެ މަސައްކަތް ސިފައިންނާ ހަވާލުކޮށްގެން ވަރަށް ބާރު ސްޕީޑްގައި ކުރިއަށް ގެންދަވާ ކަމަށެވެ. އަދި ތެލަސީމިއާ ޕޭޝަންޓުންނާއި އެހީތެރިންނަށް ހިލޭ އެމްޓީސީސީ ބަހުގައި ދަތުރުކުރެވޭނެ ގޮތް ހަމަޖައްސައި ދެއްވާނެކަމުގެ ޔަގީންކަން ވެސް ރައީސް ވަނީ ދެއްވައިފައެވެ.

އަދި، ސެންޓަރުގައި މަސައްކަތް ކުރަމުންދާ ނަރުހުންގެ އަދަދު މަދުވުމުން، އެ ދަތިކަން ޙައްލުކުރެއްވުމަށް ވެސް ރައީސް ވަނީ އަވަސް ފިޔަވަޅުތަކެއް އަޅުއްވައިފައެވެ. އެތަނުގެ ހާލަތު ރަނގަޅު ކުރުމަށް ގިނަ މަސައްކަތް ކުރެވެމުން ދާއިރު، އެ މަސައްކަތްތަށް އެމަނިކުފާނު ވަރަށް ގާތުން ބައްލަވަމުންދާކަމީ، މިކަމަށް އެމަނިކުފާނު ދެއްވާ އަޙައްމިއްޔަތު ކަމުގެ އަލިގަދަ ޙެއްކެކެވެ.

ދުނިޔޭގެ ތެލަސީމިއާ ދުވަސް މިއަދު ފާހަގަކުރަމުންދާއިރު، މިކަން ވެގެންދަނީ، ގިނަ ޢާއިލާތަކަކަށް ވަރަށް އުފާވެރި ޚަބަރަކަށެވެ.