މިސަރުކާރަށް އެއްއަހަރު ފުރުނު އިރު ރައީސް ޑރ. މުޙައްމަދު މުޢިއްޒު ވަނީ ދިވެހިރާއްޖޭގައި ތަފާތު ދާއިރާތަކުން ކުރިއެރުން ގެނެސްދެއްވައިފައެވެ. އިންފްރާސްޓްރަކްޗަރ ތަރައްޤީކުރެއްވުމުން ފެށިގެން އިޤްތިޞާދަށް ދެމެހެއްޓެނިވި އިސްލާހީ ހެޔޮބަދަލުތަކާއި އިޖުތިމާއީ ދުޅަހެޔޮކަން ފާހަގަކޮށްލެވެއެވެ. 

އެމަނިކުފާނުގެ ވެރިކަން ބިނާވެފައިވަނީ ރައްޔިތުން ބާރުވެރިކުރުވުމާއި އަމިއްލަ ފުދުންތެރިކަން އިތުރުކުރުމުގެ މައްޗަށެވެ. މިގޮތުން ދިވެހިރާއްޖެ ބައިނަލްއަޤްވާމީ މައިދާނުގައި ވަރުގަދަ، މުސްތަޤިއްލު ޤައުމެއްގެ ގޮތުގައި ޤާއިމުކުރެއްވުމަށް ވަނީ މަސައްކަތް ކުރައްވައިފައެވެ. ރައީސް މުޢިއްޒުގެ މަސައްކަތްޕުޅާއި ވިސްނުންފުޅަކީ ރާއްޖެއަށް ދެމެހެއްޓެނިވި ގޮތެއްގައި ކުރިއެރުން ގެނެސްދޭނެ ނިންމެވުންތަކެކެވެ. ވަގުތީ ހިތްހަމަޖެހުމަކަށް ނުވަތަ ވަގުތީ ނިންމުން ތަކަކަށް އެކަށައެޅިފައިވާ ކަންކަމެއް ނޫނެވެ.

ރައީސް މުޢިއްޒު ވަނީ ދިވެހިރާއްޖެއަށް ދިމާވެފައިވާ ބޯހިޔާވަހިކަމުގެ މައްސަލައަށް އިސްކަންދެއްވާފައެވެ. ޖުމްހޫރީ ދުވަހުގެ ރަސްމީ ޖަލްސާގައި ޤައުމާ މުޚާޠަބު ކުރައްވަމުން ރައީސް ވިދާޅުވެފައިވަނީ ބޯހިޔާވަހިކަމުގެ ރަންޒަމާނެއް ގެނެސްދެއްވާނެ ކަމަށެވެ. މި ސަރުކާރުގެ އަމިއްލަ ބާރާއެކު އެކުލަވާލި ފުރަތަމަ ބަޖެޓު ވެސް ޚާއްޞަކޮށްފައިވާނީ ގެދޮރުވެރިކަމާއި ބޯހިޔާވަހިކަމަށް އަމާޒުކުރައްވައިގެނެވެ. ބަޖެޓްގެ ބޮޑު އިންސަތަެއް އޮތީ ބޯހިޔާވަހިކަމަށް ޚާއްސަކޮށްފައެވެ. 

މިއީ ރާއްޖޭގެ ތާރީޚުގައި ވެސް، ބޯހިޔާވަހި ކަމަށް މިހާ ބޮޑު ޢަދަދެއް ޚާއްޞަކުރެވުނު ފުރަތަމަ ފަހަރެވެ. މީގެ ތެރެއިން 1.5 ބިލިޔަން ރުފިޔާ، ގެދޮރު އެޅުމުގެ ޢަމަލީ މަސައްކަތަށް ވަނީ ޙާއްސަކުރައްވައިފައެވެ. އަންނަ އަހަރުން ފެށިގެން ކޮންމެ އަހަރަކު، ގެދޮރުވެރިކަމުގެ ލޯނުތަކަށް ޚާއްޞަކޮށް، 1000 މިލިޔަން ރުފިޔާ ބަޖެޓުކުރައްވާނޭ ކަމަށް ވެސް އެމަނިކުފާނު ވަނީ ވިދާޅުވެފައެވެ. މިއީ ގޯތި އިމާރާތް ކުރުމުގެ ތަކުލީފްތަކަށް ކިހާ ބޮޑު ކުރިއެރުމެއްތޯއެވެ. ރައްޔިތުންނަށް ބޯހިޔާވަހަކަން ކަށަވަރު ކުރުމަށް ލިބިގެންދިޔަ ބޮޑު ފަސޭހައެއް ނޫންތޯއެވެ.

ސަރުކާރުގެ އަމާޒަކީ، ގޯތި އޮވެ، ގެ އެޅޭނޭ ގޮތް ނެތް މީހުންނާއި، ގެ އަޅަން ފެށުމަށް ފަހު މަސައްކަތް ހުއްޓާލަން ޖެހިފައިވާ މީހުންނާއި، ޢިމާރާތް ބާވެ މަރާމާތުކުރަން ބޭނުންވެފައި ތިބި މީހުންގެ ތަކުލީފުތަކަށް ލުޔެއް ހޯއްދަވައިދެއްވުމެވެ.

އެމަނިކުފާނުގެ "ރަސް މާލެ" މަޝްރޫޢުގައި ހިމެނެނީ މޮޑިއުލަރ ހައުސިންގ، ފަސޭހައިން ލިބެން ހުންނަ ދަތުރުފަތުރުގެ ވަސީލަތްތަކާއި މޫސުމަށް އަންނަ ބަދަލުތަކަށް ކުރިމަތި ލެވޭނެ ދެމެހެއްޓެނިވި ޝަހަރީ ތަރައްޤީއެކެވެ. މީގެ އިތުރުން، އައިކޮނިކް ތިލަމާލެ ބްރިޖްގެ މަސައްކަތް ކުރިއަށް ގެންދެވުމުން ފާހަގަކޮށްދެނީ ލޮޖިސްޓިކް ގުޅުވައިދިނުމަށް އެމަނިކުފާނު ދެއްވާ އަހައްމިއްޔަތުކަމެވެ. މިކަމުގެ ސަބަބުން މާލެ އާއި ވަށައިގެންވާ ރަށްތަކާ ދެމެދު ފަސޭހައިން ދަތުރުކުރެވޭނެއެވެ.

ވެރިކަމާއި ހަވާލުވެޑައިގެން އެންމެ ފުރަތަމަ އިސްކަން ދެއްވި ކަންތައްތަކުގެ ތެރޭގައި، ކުރީ ސަރުކާރުން ފިނިހަކަ ސްޕީޑުގައި ކުރަމުން އައި ރާޢްޖޭގެ ވައިގެ ބަނދަރުގެ މަސައްކަތް ވަނީ އެމަނިކްފާނުގެ ބެއްލެވުމުގެ ދަށުން އަވަސްކުރައްވާ ހުޅުވުމާއި ގާތްވެފައެވެ.

ޖުމްލަ 25 މިލިއަން ފަސިންޖަރުންނަށް ޚިދުމަތްދެވޭ ފެންވަރަށް ވެލާނާ އިންޓަރނޭޝަނަލް އެއަރޕޯޓް ތަރައްޤީކުރުމާއި އިކޮނޮމިކް ޒޯން ތަރައްޤީކުރުމުގެ ބޮޑު މަޝްރޫޢު ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަނީ ވެރިކަމަށް އަހަރެއް ނުވަނީސް ފައްޓަވައިފައެވެ.

ވެލާނާ އިންޓަރނޭޝަނަލް އެއަރޕޯޓްގެ އާ ފިއުލް ފާމް އާއި 8.4 ކިލޯ މީޓަރުގެ ފިއުލް ހައިޑްރަންޓް ސިސްޓަމް ވަނީ ޤާއިމްކުރެވިފައެވެ. މިއީ ބިމުގެ އަޑީގައި ޤާއިމުކޮށްފައިވާ ވިއުގައެކެވެ. ތެޔޮ ރައްކާކުރާ ތަންތަނާއި މަތިންދާ ބޯޓުތައް ޕާކުކުރާ ސަރަޙައްދު ވަނީ ގާއިމްކޮށްފައެވެ. މީގެ ކުރިން ބޯޓުތަކަށް ތެޔޮ އެޅުމަށް މުޅިން ވެސް ބޭނުން ކުރަމުން އައީ ރިފިއުލަރއެވެ. ފިއުލް ފާމްގެ ސަބަބުން ފިއުލް ރައްކާކުރެވޭ ކެޕޭސިޓީ 13.5 މިލިއަން ލީޓަރުން 45 މިލިއަން ލީޓަރަށް އިތުރުވެގެންދާނެއެވެ.

ޒުވާނުންނާއި އަންހެނުންނަކީ ސަރުކާރުގެ ތަޞައްވުރުގެ މައިގަނޑު ބައެކެވެ. "ޕްރެޒިޑެންޝަލް ޔޫތު އެޑްވައިޒަރީ ބޯޑު" އުފެއްދެވުމުން ކަށަވަރު ކޮށްދެނީ ޤައުމީ ސިޔާސަތުތައް އެކުލަވާލުމުގައި ޒުވާނުންގެ އަޑު އިވޭނެ ކަމެވެ. ގާތްގަނޑަކަށް 6.5 މިލިއަން ޑޮލަރުގެ ލޯނު ފެސިލިޓީއެއް ވަނީ އަންހެން ވިޔަފާރިވެރިން ބާރުވެރި ކުރުވުމަށް ތަޢާރަފު ކުރައްވައިފައެވެ. މީގެ ތެރެއިން ޚާއްޞަ އެހީއަށް ބޭނުންވާ ފަރާތްތަކަށް ވަކި ޚާއްޞަ އެލޮކޭޝަނެއް ވެސް ހިމެނޭ ގޮތަށް ކުރިއަށް ގެންދަވާ މަސައްކަތުން ޤައުމުގެ ހުރިހާ ކަންކޮޅު ތަކެއްގައި ވެސް ހަމަހަމަ ފުރުޞަތުތައް އުފެއްދެވުމަށް ވަނީ މަގުފަހި ކޮށްދެއްވައިފައެވެ.

ޤައުމީ ފެންވަރެއްގައި ޒުވާން އިމާމުންނާއި ޚަޠީބުން ތަމްރީންކޮށް، ޤައުމީ ޚިދުމަތަށް ރައީސް ވަނީ ނެރެދެއްވައިފައެވެ. ދީނީ ކަންކަމަށް ލޯބިކުރާ އެތައް ކުޅަދާނަ ޒުވާނުންނެއް މިފަދަ ފުރުސަތުތަކަށް އެދިއެދި ތިއްބާ ރައީސް މިވަނީ މިކަން ވެސް ކޮށްދެއްވައިފައެވެ.

ދިވެހި ބަހަށް، ދިވެހިންނާއި ދިވެހި ޒުވާނުން އަހުލުވެރިކުރުމަށް ދިވެހި ބަހާއި ޤައުމިއްޔަތަށް ޚާއްޞަ ވުޒާރާއެއް އުފައްދަވައި، ޤައުމިއްޔަތުގެ އިސްވާރުން ކަނޑައެޅުއްވިއެވެ. އާ ޖީލަކަށް ދިވެހި ބަހުގެ ރިވެތިކަން ގެނެސްދިނުމުގެ ބުރަ މަސައްކަތް ފެއްޓެވިއެވެ.

މި އަހަރުގެ މިހާތަނަށް، ކުޅިވަރުގެ ރޮނގުން ބައިނަލްއަޤުވާމީ 75 ޙަރަކާތެއްގައި ދިވެހި އެތުލީޓުން ޤައުމު ތަމްސީލުކޮށްފައިވާއިރު ވި މި ޙަރަކާތްތަކުން 12 މެޑަލް، ދިވެހި އެތުލީޓުން ހޯދައިދީފައިވާކަން ވެސް ފާހަގަކޯށްލަންޖެހެއެވެ.

ހަމައެހެންމެ ސާނަވީ ތަޢުލީމު ނިންމުމަށްފަހު އެކި ސަބަބުތައް މެދުވެރިވެގެން ތަޢުލީމީ ޙަޔާތް ކުރިއަށް ގެންދެވެން ނެތް، އަދި ވަޒީފާގެ ފުރުޞަތު ވެސް ތަނަވަސްވެފައި ނެތް، 16 އަހަރުން މަތީގެ ދިވެހި ދަރީން، ދިވެހިރާއްޖޭގެ ޤައުމީ ޚިދުމަތުގެ ޕްރޮގްރާމުގައި ބައިވެރިކޮށް، ދިވެހި ޢަސްކަރިއްޔާ ނުވަތަ ފުލުހުންގެ ޚިދުމަތަށް ރެކްރޫޓް ކުރެވޭނެ ކަމަށް ރައީސުލްޖުމްހޫރިއްޔާ ފަހިކޮށްދެއްވިއެވެ. މިކަމުގެ ސަބަބުން ޢިލްމާއި ވަޒީފާގެ ފުރުޞަތުތަކުން މަހްރޫމުވުމުގެ ނަތީޖާއެއްގެ ގޮތުން މަސްތުގެ ވަބާގެ ތެރެއަށް ވަދެގެންދާ މީހުންގެ އަދަދު މަތިކުރެވި ޒުވާނުންނަކީ ޤައުމުގައި ބޭނުންތެރި ބަޔަކަށް ހެދޭނެއެވެ.

މީގެ އިތުރުން ވޭޕްކުރުމަށް ބޭނުންކުރާ އާލާތްތައް ދިވެހިރާއްޖެއަށް އެތެރެކޮށް، ބޭނުންކުރުން މަނާކުރުމުގެ އިތުރުން، ޒުވާނުން ދުންފަތުގެ ގޯސް އާދައިން ދުރުކުރުމަށްޓަކައި ދުންފަތާއި ދުންފަތުން އުފައްދާފައިވާ ތަކެތީގެ ވިޔަފާރީގެ މުއާމަލާތް ކުރެވޭނެ އެންމެ ހަގު އުމުރަކީ 18 އަހަރުގެ ބަދަލުގައި 21 އަހަރުކަމަށް ކަނޑައެޅުމަށް، ދުންފަތް ކޮންޓްރޯލްކުރުމާބެހޭ ޤާނޫނަށް ގެންނަން ޖެހޭ އިސްލާޙުތައް ރައީސް ގެނެސްދެއްވިއެވެ.

ދިވެހިރާއްޖޭގެ ތާރީޚުގައި ފުރަތަމަ ފަހަރަށް ރާއްޖޭގައި ޑޮކްޓަރީ ރޮނގުން ފުރަތަމަ ޑިގްރީ ވަނީ އެތައް ކުދިންނެއް ހާސިލްކޮށްފައެވެ. ދިވެހިރާއްޖޭގެ ޤައުމީ ޔުނިވަރސިޓީގެ ކެމްޕަސްތައް ރާއްޖޭގެ އެކި ހިސާބުތަކުގައި އިތުރުކޮށް، ޢިލްމީ ދިރާސާގެ ހޯދުންތަކުގެ މައްޗަށް ބިނާކޮށް ސިޔާސަތުތައް ކަނޑައެޅިގެން ދިއުމަކީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ޚާއްޞަ އިސްކަމެއް ދެއްވާ ކަމެކެވެ.

މަތީ ޘާނަވީ ދަރިވަރުންނަށް ފުރުޞަތުތައް ފަހިކުރުމުގެ ގޮތުން، 23 ސްކޫލެއްގައި މަތީ ޘާނަވީ ކިޔަވައިދޭން ވަނީ ފަށައިފައެވެ. މާލޭގައި ގްރޭޑް 11 އަދި 12 ކިޔަވާ ކުދިންގެ ލުއި ފަސޭހައަށްޓަކައި ސީ.އެޗް.އެސް.އީ- މާލެ، އަލުން ހުޅުއްވާދެއްވިއެވެ. 

ރައީސް މުޢިއްޒުގެ ދިވެހިރާއްޖެއާ މެދު ގެންގުޅުއްވާ ތަޞައްވުރު ސާފެވެ: އެއީ އާ ގޮތްތައް ހޯދުމާއި، ދެމެހެއްޓެނިވި ކަމާއި، އެކުލެވިގެންވާ ގޮތުގައި މިސާލަކަށްވާ، ވަރުގަދަ، މުސްތަޤިއްލު ޤައުމެއް އުފެއްދުމެވެ. ދިގު މުއްދަތައް އިހުމާލުވެފައިވާ މައްސަލަތަކަށް ޙައްލު ހޯއްދަވައި، ފުޅާ ދާއިރާއެއްގައި ކުރިއެރުން ހޯދުމަށް އިންވެސްޓްކުރެއްވުމުގެ ތެރެއިން، އެމަނިކުފާނުގެ ލީޑަރޝިޕުން މަގުފަހިކޮށްދެނީ ދިވެހިރާއްޖެއަށް އަމިއްލަ ފައިމައްޗަށް ތެދުވެވޭނެ، އުޖާލާ މުސްތަޤުބަލަކަށެވެ.

މި ބަދަލުގެންނަވާ ދައުރުން ދައްކުވައިދެނީ ހަމައެކަނި ތަރައްޤީއެއް ނޫނެވެ. އެއީ އަމިއްލަ ފައިމައްޗަށް ތެދުވެ، ބައިނަލްއަޤްވާމީ މުޖުތަމަޢުއަށް މުހިންމު ހިއްސާއެއް ކުރާ ޤައުމެއްގެ ގޮތުގައި ދިވެހިރާއްޖޭގެ ޤާބިލުކަން އަލުން ދައްކުވައިދިނުމެކެވެ.