ދުވަހަކުވެސް ޤާނޫނާ ޚިލާފު ކަމެއް ކުރައްވާފައި ނުވާނެ ކަމަށާ އަދި ނުވެސް ކުރައްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެ އެވެ.

ރައީސުލްޖުމްހޫރިއްޔާގެ އޮފީހުގައި މިއަދު އޮތް ނޫސްވެރީންގެ ބައްދަލްވުމުގައި ހައުސިން މިނިސްޓަރަކަށް ހުންނަވައިގެން ރައީސް މުއިއްޒު, ނާޖައިޒު ކަންތައްތަކެއް ހިންގެވި ކަމަށް ބުނެ ބަޔަކު ފަތުރާ ވާހަކަތަކާއި ގުޅޭގޮތުން ސުވާލު ކުރުމުން ރައީސް ވަނީ އެ ސުވާލުތަކަށް ވަރަށް ތަފްސީލުކޮށް ޖަވާބު ދެއްވާފަ އެވެ.

ރައީސް ވަހީދާއި ރައީސް ޔާމީންގެ ސަރުކާރުގައި ހައުސިން މިނިސްޓަރުކަން ކުރެއްވި ރައީސް މުއިއްޒު މިއަދު ވިދާޅުވި ގޮތުގައި އެމަނިކުފާނު އެ މިނިސްޓްރީ ހިންގެވި ދުވަސްވަރު ވެސް މިނިސްޓްރީގައި އެތައް ސަތޭކަ މުވައްޒިފުން މަަސައްކަތް ކުރަމުން ދިޔަ ކަމަށެވެ. ބަޔަކު ދައްކާ ވާހަކަތަކުގައި އެއްވެސް ހަޤީޤަތެއް އޮތްނަމަ އެކަމުގެ ހެއްކެއް ވެސް އޮންނަން ޖެހޭނެ ކަމަށް އެމަނިކުފާނު ވިދާޅުވި އެވެ.

އަދި ވިދާޅުވީ އޭސީސީ ފަދަ މައްސަލަތައް ތަޙުޤީޤު ކުރުމަށް ޚާއްސަ މުއައްސަސާތައް ހުރިކަން ފާހަގަ ކުރައްވާ އެފަދަ މުއައްސަސާތަކުން އެމަނިކުފާނާމެދު ކުރެވޭ ކޮންމެ ތުުހުމަތެއް ބެލުމާމެދު މައްސަލައެއް ނެތް ކަމަށް އެމަނިކުފާނު ވިދާޅުވި އެވެ.

ރައީސް ވަނީ ދުވަހަކުވެސް ޤާނޫނާ ޚިލާފު ކަމެއް ކުރައްވާފައި ނުވާނެ ކަމަށާ އަދި ނުވެސް ކުރައްވާނެ ކަމަށް ވަރަށް އިތުބާރާއެކު ސާފުކޮށް ބަހުން ވިދާޅުވި އެވެ. އަދި ދުވަހަކު ވެސް ނުފޫޒުގެ ބޭނުން ނާޖައިޒު ގޮތުގައި ހިއްޕަވާފައި ނުވާ ކަމަށާ ނުވެސް ހިފާނެ ކަމަށް ވިދާޅުވި އެވެ.

ރައީސް ވިދާޅުވީ ރާއްޖޭގައި މައްސަލަތައް ބަލަން މިނިވަން މުއައްސަސާތައް އުފައްދާފައިވާ ކަމަށާ އެ މުއައްސަސާތަކުގެ ޒިންމާ ފުރިހަމައަށް އަދާކުރުމަށް މިހާރު އެއްވެސް ހުރަހެއް ނޯންނާނެ ކަމަށެވެ.

އަދި އެމަނިކުފާނަކީ މިވަގުތު ރައީސުލްޖުމްހޫރިއްޔާގެ ހައިސިއްޔަތުން މުއައްސަސާތަކަށް މެންބަރުން އައްޔަނު ކުރުން ފިޔަވާ އިތުުރު ޒިންމާއެއް އެމަނިކުފާނުގެ ނެތް ކަމަށް ވިދާޅުވި އެވެ.