ވަކި އަތަކަށް ނުޖެހި މިނިވަންކަމާއި ތެދުވެރިކަމާއެކު ރައްޔިތުންނަށް މައުލޫމާތު ފޯރުކޮށްދިނުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިލްތިމާސްކުރައްވައިފިއެވެ. 

ރައީސުލްޖުމްހުރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ރައީސް ވިދާޅުވީ ހުރިހާ ނޫސްވެރިން ވެސް ރައްޔިތުންނަށް ތެދު މައުލޫމާތު ފޯރުކޮށްދިނުމަށް މަސައްކަތް ކުރެއްވުމަކީ އެމަނިކުފާނުގެ ވަރަށް ބޮޑު އެދުމެއް ކަމަށެވެ. 

ރައީސް ވިދާޅުވީ އެހެންކަމުން ނޫސްތަކުގައި ލިޔާ ޚަބަރުތަކާއި ޓީވީތަކުން ގެނެސްދޭ ޚަބަރުތައް ތެދު ބަސް ނޫން އެހެން ބަހަކުން ލިޔުމަކީ ހުއްޓާލަން ޖެހޭ ކަމެއް ކަމަށެވެ. ކޮންމެ ނޫސްވެރިއަކު ވެސް ނޫސްވެރިކަން ކުރަންވާނީ ޒިންމާދާރު ކަމާއެކުގައި ކަމަށް ވެސް އެމަނިކުފާނު ވިދާޅުވިއެވެ. 

ނޫސްވެރިންނަކީ ވަރަށް މާތް މަގްސަދެއްގައި ވަރަށް ބޮޑު ޒިންމާއެއް އަދާކުރާ ބައެއްކަން ފާހަގަކުރައްވާ ރައީސް ވިދާޅުވީ ތެދު މައުލޫމާތު މިނިވަންކަމާއެކު ރައްޔިތުންނަށް ފޯރުކޮށްދިނުމަކީ ނޫސްވެރިންގެ އެންމެ ބޮޑު ޒިންމާ ކަމަށެވެ. އަދި އެކަން ކުރަންވާނީ އެއްވެސް މީހެއްގެ ނުފޫޒެއް ނެތި ކަމަށް ވެސް ރައީސް ވިދާޅުވިއެވެ. 

އެމަނިކުފާނު ވިދާޅުވީ ކަންކަމުގައިވަކި ސައިޑެއް ނެގުމަކީ ވެސް ތެދު މައުލޫމާތު ފޯރުކޮށްދިނުމެއް ނޫން ކަމަށެވެ. ކޮންމެ ކަމެއްގައި ވެސް ދެފަރާތް އޮންނައިރު ބައެއް ނޫސްވެރިން ސެންސޭޝަނަލައިޒް ކޮށްލަން ނުވަތަ ގިނަ މީހުން ކިޔާ ގޮތް ހެދުމަށްޓަކައި ތެދެއް ދޮގެއް ބެލުމެއްނެތި ބައެއް ޚަބަރުތައް ޝާއިއުކުރާ ކަމަށް ވެސް ރައީސް ވިދާޅުވިއެވެ. އަދި އެއީ އެކަން އޮންނަން ވާނެ ގޮތް ނޫން ކަމަށާއި އެމަނިކުފާނު ވެސް ވާހަކަދައްކާނީ ތެދުބަހުން ކަމަށާ ހުރިހާ ބޭފުޅުން ވެސް ވާހަކަދައްކަން ޖެހޭނީ ތެދުބަހުން ކަމަށް ރައީސް ވިދާޅުވިއެވެ.