ކުރިއަށް އޮތް ހަ މަސް ދުވަހުގެތެރޭގައި ފުވައްމުލައް ސިޓީއާއި އައްޑޫ ސިޓީގައި ކުރިއަށް އޮތް 10 އަހަރަށް ވާވަރަށް ކަރަންޓު ކެޕޭސިޓީ ގާއިމްކޮށްދޭނެ ކަމުގެ ޔަގީންކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެއްވައިފިއެވެ. 

ރައީސުލްޖުމްހުރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެމަނިކުފާނު ވިދާޅުވީ މި ސަރުކާރު ވެރިކަމާ ހަވާލުވިއިރު ގާތްގަނޑަކަށް ހުރިހާ އިންޖީނު ގެއެއް ހުރީ ބްރޭކްޑައުން ވެފައިކަމަށެވެ.

ޚާއްސަކޮށް އައްޑުއާ ފުވައްމުލަކަށް ދިމާވެފައިވާ ކަރަންޓުގެ މައްސަލަ ފާހަގަކުރައްވާ އެމަނިކުފާނު ވިދާޅުވީ އެ ދެ ސިޓީގައި ވަރަށް ބޮޑު މަޝްރޫއެއް ކުރިއަށް ގެންދަން ނިންމާފައިވާ ކަމަށެވެ. އަދި އެކަމަށްޓަކައި ފިނޭންސް މިނިސްޓްރީން، ބަޖެޓުގެ ތެރެއިން ފައިނޭންސް ސެޓް އަސައިޑް ކޮށްފައިވާ ކަމަށް ރައީސް ވިދާޅުވިއެވެ.

ރައީސް ވިދާޅުވީ މީގެ ކުރިން އެއްވެސް ވަރަކަށް އިންޖީނުގޭގެ މަރާމާތެއް ކޮށްފައިވާކަމަށް ގަބޫލު ނުކުރައްވާ ކަމަށެވެ. ވަރަށް ގިނަ ރަށްރަށް ހުރީ ހާލުގައި ކަމަށާ މިހާތަނަށް އައި އިރުވެސް އުޅެންޖެހިފައިވަނީ ޖަނަރެޓަރުތައް މަރާމާތުކޮށްގެން ކަމަށް އެމަނިކުފާނު ވިދާޅުވިއެވެ. 

މިހާތަނަށް އައިއިރު 77 ޖަނަރޭޓަރު އައު ޖެންސެޓަށް ބަދަލުކޮށްފައިވާ ކަން ހާމަކޮށް ރައީސް ވިދާޅުވީ 313 ޖެންސެޓް މަރާމާތުކޮށް ނުވަތަ އޯވަހޯލް ކޮށްްފައިވާ ކަމަށެވެ. އަދި 15 ރަށުގެ ގްރިޑް އަޕްގްރޭޑްކޮށް ނިންމާފައިވާ ކަމަށް ވެސް އެމަނިކުފާނު ވިދާޅުވިއެވެ. ރައީސް ވިދާޅުވީ ހުރިހާ ރަށެއްގެ ކަރަންޓުގެ މައްސަލައަށް ހައްލެއް ގެނަސްދިނުމުގެ މަސައްކަތް ކުރަމުންދާ ކަމަށެވެ.