މަސްވެރިިންނަށް، މަސްވެރިކަމުން ލިބޭ އާމްދަނީއަށް ބިނާކޮށް ރަހުނަކާ ނުލައި ތިން ލައްކަ ރުފިޔާއާ ހަމައަށް ލޯނު ދޫކުރަން ނިންމާ، މަސްވެރިކަމާ ބެހޭ މިނިސްޓްރީ އާއި ބޭންކް އޮފް މޯލްޑިވްސް (ބީއެމްއެލް) އާ ދެމެދު އެއްބަސްވުމެއްގައި މިއަދު ސޮއިކޮށްފި އެވެެ.

މަސްވެރިންގެ ގައުމީ ދަފުތަރުގައި ރަޖިސްޓްރީވެފައިވާ ފަރާތްތަކުގެ އާމްދަނީ އަށް ބިނާކޮށް މާލީ އެހީ ލިބޭނެ މަގު ގައުމީ ބޭންކުން ތަނަވަސްކޮށް ދިނުމަކީ، މަސްވެރިންގެ އާމްދަނީ އަށް އެކަނި ބިނާކޮށް ލޯނު ދޫކުރަން ބޭންކަކުން ނިންމި ފުރަތަމަ ފަހަރެވެ. 

މަސްވެރިންނަށް މާލީ އެހީތެރިކަން ފޯރުކޮށްދިނުމުގެ އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ މިނިސްޓަރު އަޙްމަދު ޝިޔާމް އެވެ. ބީއެމްއެލްގެ ފަރާތުން ސޮއިކުރެއްވީ މެނޭޖިން ޑިރެކްޓަރު މުޙައްމަދު ޝަރީފް އެވެ. 

މަސްވެރިންނަށް ދޫކުރާ ލޯނުގައި އެންމެ ޚާއްސަ ކަމަކީ މަސްވެރިކަމުގެ މޫސުމަށް އަންނަ ބަދަލުތަކާއެކު އާމްދަނިއަށް ރިއާޔަތްކޮށް ލޯނު އަނބުރާ ދެއްކުމަށް ލުއިފަސޭހަ ގޮތްތަކެއް ހަމަޖައްސައިދޭން ބޭންކުން ނިންމާފައިވުމެވެ. މިއީ މިފަދަ ނިންމުމެއް ބީއެމްއެލް އިން ނިންމި ފުރަތަމަ ފަހަރެވެ.

މަސްވެރިންނަށް ދޫކުރާ މާލީ އެހީތެރިކަން:

އަންނަ މަހުން ފެށިގެން ދޫކުރަން ފަށާ ލޯނާ ގުޅޭ ގޮތުން ޝަރީފް ވިދާޅުވީ "މަސްވެރިންނަށް އާމްދަނީ ލިބޭ ގޮތާއި މޫސުމީ ގޮންޖެހުންތަކަށް ރިއާޔަތްކޮށް، އެ ފަރާތްތަކުގެ ދިރިއުޅުމަށް ދެމެހެއްޓެނިވި ގޮތެއްގައި ބޭނުންވާ މާލީ ހައްލުތައް" ލޯނާ ގުޅޭ ގޮތުން މަސްވެެރިކަމާ ބެހޭ މިނިސްޓްރީ އާ އެކު ހެދި އެއްބަސްވުމުގެ ދަށުން ފޯރުކޮށްދެވޭނެ ކަމަށެވެ. 

މިނިސްޓަރު ޝިޔާމް ވިދާޅުވި ގޮތުގައި ގާތްގަނޑަކަށް 95 ޕަސެންޓު މަސްވެރިން މިހާތަނަށް މަސްވެރިންގެ ދަފުތަރުގައި ރަޖިސްޓްރީ ވެފައިވެއެވެ. ރަޖިސްޓްރީ ނުވެ ތިބި މަސްވެެރިން ވެސް އަވަހަށް ރަޖިސްޓްރިވުމަށް މިނިސްޓަރު ގޮވާލެއްވިއެވެ.