ބޭންކް އޮފް މޯލްޑިވްސް (ބީއެމްއެލް) އިން ކޮމާޝަލް ޕްރޮޕަޓީ ފައިންނޭސިން ފެސިލިޓީއެއް މިއަދު ތައާރަފްކޮށްފިއެވެ. 

ބީއެމްއެލް އިން މިއަދު އާއްމުކުރި ބަޔާނުގައި ބުނީ އަލަށް ތައާރަފްކުރި ފެސިލިޓީގެ ދަށުން ބިމާއި ވިޔަފާރީގެ ބޭނުންތަކަށާއި އިމާރާތާއި ގަރާޖު ގަތުމަށް ފައިނޭންސިން ލިބޭނެ ކަމަށެވެ. 

އަލަށް ހުޅުވާލި ފައިނޭންސިން ފެސިލިޓީގެ ދަށުން 30 މިލިއަން ރުފިޔާއާ ހަމައަށް ލޯނު ދޫކުރުމަށް ވަނީ ހަމަޖެހިފައެވެ. އެ ލޯނުތައް 12 އިންސައްތައިގެ ރޭޓެއްގައި ދޭއިރު ގްރޭސް ޕީރިއަޑެއް ހިމެނޭނެކަމަށް ބީއެމްއެލް އިން ވަނީ ބުނެފައެވެ. އަދި، ލޯނު އަނބުރާ ދެއްކުމުގައި ލުއިފަސޭހަ ގޮތްތަކެއް ހަމަޖެހޭނެކަމަށް ބީއެމްއެލް އިން ވަނީ ބުނެފައެވެ. 

ކޮމާޝަލް ޕްރޮޕަޓީ ފައިންނޭސިން ފެސިލިޓީ ފަރުމާކޮށްފައިވަނީ ވިޔަފާރި ފުޅާކުރުމަށާއި، އިންފްރާސްޓްރަކްޗަރ އިންވެސްޓްމަންޓަށް އަދި ދެމެހެއްޓެނިވި ކުރިއެރުމަށް ބޭނުންވާ މާލީ ހައްލުތައް ފަސޭހައިން ލިބޭނެ ގޮތަށް ކަމަށް ބީއެމްއެލް އިން ވަނީ ބުނެފައެވެ. 

ކޮމާޝަލް ޕްރޮޕަޓީ ފައިނޭންސިންގެ އާ ފެސިލިޓީއެއް ބީއެމްއެލް އިން މިއަދު ހުޅުވާލިއިރު، ވިޔަފާރިތައް ތަރައްޤީކުރުމަށް ބީއެމްއެލް އިން އަންނަނީ ލޯނު ފައިނޭންސިންއާއި އެސްއެމްއީ ފައިނޭންސިންގެ އިތުރުން ޓްރޭޑް ފައިނޭންސިން އަދި ވަރކިން ކެޕިޓަލް ފެސިލިޓީތައް ފޯރުކޮށްދެމުންނެވެ.