ފަތުރުވެރިކަމުގެ ވުޒާރާއިން މާދަމާ ހުޅުމާލޭގެ ފޭސް އެކެއްގައި ޢާއިލީ ހަވީރެއް ބާއްވަން ނިންމައިފިއެވެ.

މި ހަވީރަކީ ވޭތުވެދިޔަ އެއް އަހަރު ތެރޭގައި ފަތުރުވެރިކަމާބެހޭ ވުޒާރާއިން ހާސިލްކޮށްފައިވާ ކާމިޔާބީތައް ފާހަގަކުރުމުގެ ގޮތުން ބާއްވާ ހަވީރެކެވެ.

ހުޅުމާލޭ ފޭސް 1 ގައި ދިރާގު އެންޓެނާއާ ދިމާ ބީޗް ސަރަހައްދުގައި ބޭއްވުމަށް ހަމަޖެހިފައިވާ މި ހަވީރު އޮންނާނީ މާދަމާ ހަވީރު 4:00 އިން 6:00 އަށެވެ. މި ހަވީރުގެ ހަރަކާތްތައް އިންތިޒާމްކޮށްފައިވަނީ ދެމެހެއްޓެނިވި ފަތުރުވެރި ކަމަށް އަމާޒުކޮށްގެންނެވެ.

މި ހަވީރުގައި ކުރިއަށް ގެންދާ ހަރަކާތްތަކުގެ މައިގަނޑު ތީމަކީ ގުދުރަތީ ވެއްޓާއި ކަނޑެވެ. މި ތީމާ ގުޅޭ ގޮތުން ކުރެހުމާއި، ކްރާފްޓް އެކްޓިވިޓީ ތަކާއި، އެއްފަހަރު ބޭނުންކޮށްފައި އުކާލާ ޕްލާސްޓިކް ބޭނުން ކޮށްގެން ހަރަކާތްތައް ކުރިއަށް ގެންދިއުމަށް ވަނީ ހަމަޖެހިފައެވެ. މީގެ އިތުރުން ބަނާނާ ބޯޑާއި، ޖެޓް ސްކީ އަދި ފަން ޓިއުބް ފަދަ މުނިފޫހިފިލުވުމުގެ ހަރަކާތްތައްވެސް މި ހަވީރުގައި ހިމެނޭނެއެވެ.