ފަތުރުވެރިންނަށް ހުއްދަ ނުހޯދާ ޚިދުމަތްދޭ ތަންތަން ދެނެގަތުމަށް ޚާއްސަ އިންސްޕެކްޝަނެއް ފެށުމަށް ހަމަޖެހިފައިވާކަމަށް ފަތުރުވެރިކަމާ ބެހޭ ވުޒާރާއިން ބުނެފިއެވެ.

މިކަން ހާމަކުރެއްވީ ރައްޔިތުންގެ މަޖިލީހުގެ ޤަވާއިދު ކޮމެޓީގައި ވާހަކަދައްކަވަމުން ފަތުރުވެރިކަމާ ބެހޭ ވުޒާރާގެ ސްޓޭޓް މިނިސްޓަރ އަޙްމަދު ނާޒިމް މުޙައްމަދެވެ.

ސްޓޭޓް މިނިސްޓަރ ނާޒިމް ވިދާޅުވި ގޮތުގައި، މި ވަގުތު ވުޒާރާގައި ހުރީ ހަމައެކަނި ހުއްދަ ދީގެން ފަތުރުވެރިންނަށް ޚިދުމަތްދެމުން އަންނަ ތަންތަނުގެ މަޢުލޫމާތެވެ. ނަމަވެސް، ހުއްދަ ނުހޯދާ ޚިދުމަތްދޭ ތަންތަން ވެސް ހުރިކަމަށާއި، ބަޔަކު ޝަކުވާ ހުށަނާޅާނަމަ އެފަދަ ތަންތަން ދެނެގަނެވޭނެ ގޮތެއް ނެތްކަމަށް އޭނާ ފާހަގަކުރެއްވިއެވެ.

މި މައްސަލަ ހައްލުކުރުމަށްޓަކައި، ދިވެހި ފުލުހުންގެ ޚިދުމަތާ ގުޅިގެން ޚާއްސަ އިންސްޕެކްޝަނެއް ފެށުމަށް ހަމަޖެހިފައިވާކަމަށް ސްޓޭޓް މިނިސްޓަރ ވިދާޅުވި އެވެ. މިހާރު ވެސް މޯލްޑިވްސް ޕޮލިސް ސަރވިސް އާއި ފަތުރުވެރިކަމާ ބެހޭ ވުޒާރާއާ ދެމެދު ކޮމެޓީއެއް އެކުލަވާލެވި، ފްރޭމްވޯކެއް އެކުލަވާލެވިފައިވާ ކަމަށް އޭނާ ވިދާޅުވިއެވެ.

"ލޯކަލް ޓޫރިޒަމް އެންމެ ފުޅާވެފައި އޮތް ސަރަހައްދުތަކުގައި ހުއްދަ ނުނަގާ ފަތުރުވެރިންނަށް ޚިދުމަތްދޭތޯ ނުވަތަ ނޫންތޯ ބެލުމަށް މި އިންސްޕެކްޝަން ކުރިއަށް އޮތް ދެ ހަފްތާގެ ތެރޭގައި ފަށާނަން،" ސްޓޭޓް މިނިސްޓަރ ވިދާޅުވިއެވެ.

މި އިންސްޕެކްޝަންގެ މައިގަނޑު އަމާޒަކީ ފަތުރުވެރިކަމުގެ ޚިދުމަތް އެންމެ ފުޅާ ދާއިރާއެއްގައި ދެމުންދާ ސަރަހައްދުތަކުގައި މި އިންސްޕެކްޝަން ހިންގުންކަމަށް ވެސް އޭނާ ފާހަގަކުރެއްވިއެވެ.

ސަލާމަތާއި ރައްކާތެރިކަމުގެ ގޮތުން އެންމެ އެކަށީގެންވާ ކަންކަން ފުރިހަމަވެފައި ނެތުމުގެ ސަބަބުން ހިތާމަވެރި ހާދިސާތައް ހިނގާފައިވާކަމަށާއި، ބައެއް ހާދިސާތަކުގައި ފަތުރުވެރިންގެ ފުރާނަ ގެއްލިފައިވާކަން ވެސް ސްޓޭޓް މިނިސްޓަރ ފާހަގަކުރެއްވިއެވެ. މި އިންސްޕެކްޝަންގެ ސަބަބުން މިފަދަ ހިތާމަވެރި ހާދިސާތައް މަދުކުރެވި، ފަތުރުވެރިންގެ ސަލާމަތާއި ރައްކާތެރިކަން އިތުރުވާނެކަމަށް އުންމީދު ކުރެވެއެވެ.