އަންނަ އަހަރަށް ލަފާކޮށް ދައުލަތުން ހުށަހަޅާފައިވާ "ބަޖެޓް ޕޮޒިޝަން ރިޕޯޓް" ގައި ބުނެފައިވާ ގޮތުން 2025 ވަނަ އަހަރު ގްރީން ޓެކްސްގެ ގޮތުގައި ދައުލަތަށް ލިބޭ އާމްދަނީ 95.2 ޕަސެންޓް އިތުރުވާނެކަމަށް ލަފާކޮށްފި އެވެ.

ގްރީން ޓެކުހަކީ ތިމާވެށްޓާ ގުޅުންހުރި މަސައްކަތްތައް ކުރުމަށް މާލީ އެހީ ހޯދުމަށްޓަކައި، ރާއްޖެ އަންނަ ފަތުރުވެރިންގެ އަތުން ނަގަމުން އަންނަ ޓެކުހެކެވެ. މި ޓެކްސް ރިސޯޓުތަކާއި، ގެސްޓްހައުސްތަކާއި، ސިޓީ ހޮޓާތަކާއި، ސަފާރީތަކަށް އަންނަ ފަތުރުވެރިން ވެސް ދައްކަންޖެހެއެވެ.

ދެހާސް ފަންސަވީސް ވަނަ އަހަރުގެ ޖަނަވަރީ 1 އިން ފެށިގެން ގްރީން ޓެކްސް ނަގަމުންދާ ރޭޓުތަކަށް ބަދަލު ގެނައުމަށް ސަރުކާރުން ވަނީ ނިންމައިފައެވެ. މި ބަދަލާ ގުޅިގެން މިހާރު 6 އެމެރިކާ ޑޮލަރުގައި ގްރީން ޓެކްސް ނަގަމުންދާ ފަރާތްތަކުގެ ޓެކްސް ރޭޓު 12 އެމެރިކާ ޑޮލަރަށް، އަދި 3 އެމެރިކާ ޑޮލަރުން ގްރީން ޓެކްސް ނަގަމުންދާ ފަރާތްތަކުގެ ޓެކްސް ރޭޓު 6 އެމެރިކާ ޑޮލަރަށް މަތިވާނެއެވެ. އަދި އަންނަ އަހަރުން ފެށިގެން އުމުރުން ދެ އަހަރު ނުވާ ކުޑަކުދިންގެ އަތުން ގްރީން ޓެކްސް ނެގުން އިސްތިސްނާކުރުމަށްވެ ސް ވަނީ ނިންމައިފައެވެ.

"ބަޖެޓް ޕޮޒިޝަން ރިޕޯޓް" ގައި ބުނެފައިވާ ގޮތުން، މި ބަދަލުތަކާއެކު އަންނަ އަހަރު ގްރީން ޓެކުހުގެ ގޮތުގައި ލިބޭނެކަމަށް އަންދާޒާކޮށްފައިވާ އަދަދަކީ 963.6 މިލިއަން ރުފިޔާއެވެ. އަދި ފަތުރުވެރިކަމުގެ ދާއިރާއަށް އަންނަ ކުރިއެރުމާއެކު، ޖުމްލަ ގޮތެއްގައި ފަތުރުވެރިން ދިވެހި ރާއްޖޭގައި ހޭދަކުރާ ރޭގެ އަދަދު އިތުރުވާނެކަމަށް ބެލެވޭތީ، މި ބަދަލު ތަންފީޒުނުވި ނަމަވެސް ގްރީން ޓެކްސްގެ އާމްދަނީ އިތުރުވާނެކަމަށް އަންދާޒާކުރެވެއެވެ.

ބެޑް ނައިޓްސް އިތުރުވުމާއި މި ޓެކުހުގެ ސިޔާސަތަށް ގެނައުމަށް ނިންމާފައިވާ ބަދަލާއެކު، އަންނަ އަހަރު ގްރީން ޓެކުހުގެ ގޮތުގައި ދައުލަތަށް ދެ ބިލިއަން ރުފިޔާ ލިބޭނެކަމަށް ވަނީ އަންދާޒާކޮށްފައެވެ. މިއީ މިއަހަރު ލިބޭނެކަމަށް އަންދާޒާކޮށްފައިވާ އެއް ބިލިއަން ރުފިޔާއާ އަޅާބަލާއިރު ބޮޑު އިތުރުވުމެކެވެ.

މީރާގެ ތަފާސްހިސާބުތަކުން ދައްކާ ގޮތުގައި، މިއަހަރުގެ ފުރަތަމަ 10 މަސްދުވަހު ގްރީން ޓެކުހުގެ ގޮތުގައި ދައުލަތަށް ލިބިފައިވަނީ 885 މިލިއަން ރުފިޔާއެވެ.