ށ. ފުނަދޫގެ ދައްފަޅުގައި ޓޫރިސްޓް ހޮޓަލަކާ އެކު އީކޯ ޕާކެއް ތަރައްޤީ ކުރުމަށް އެ ރަށު ކައުންސިލުން ނިންމައިފިއެވެ.

މިކަމާ ގުޅިގެން ސަރވޭ އާއި ޑިޒައިން ކުރާނެ ފަރާތެއް ހޯދުމަށް ކައުންސިލުން މިހާރު ވަނީ އިޢުލާން ކޮށްފައެވެ.

ށ. ފުނަދޫގައި ހިމެނޭ ދައްފަޅަކީ ކުޅި ހިމެނޭ ސަރަހައްދެކެވެ. އެއީ ގުޑުގުޑާ ދޫންޏާއި ބްލެކް ހެޑެޑް އީގަލްފަދަ ތަފާތު މޫސުމީ ދޫނިތައް ޒިޔާރާތްކުރާ ތަނެކެވެ. އަދި މަޑް ކްރެބް އާއި ހާމިޓް ކްރެބް އާލާވާ ސަރަހައްދެކެވެ. ދައްފަޅުގެ ދެކުނު ސަރަހައްދުގައިވާ ގާބާކުޅިއަކީ ތަފާތު އެކި ދިރުންތަކުން މުއްސަނދިވެފައިވާ ތަނެކެވެ. މި ފަޅުގައި އީކޯ ޕާކެއް ތަރައްޤީކުރުމަކީ މި ފަޅުގެ ގުދުރަތީ ވަސީލަތްތައް ދެމެހެއްޓެނިވި ގޮތެއްގައި ބޭނުންކުރުމަށް ކުރެވިދާނެ މުހިންމުކަމެއްގެ ގޮތުގައި ފުނަދޫ ކައުންސިލުން ފާހަގަކުރެއެވެ.

ފުނަދޫ ކައުންސިލުން މިހާރުވަނީ މި މަސައްކަތުގެ ސަރވޭކުރުމާ އެކު ޑިޒައިން ކުރާނެ ފަރާތެއް ހޯދުމަށް އިޢުލާންކޮށްފައެވެ. މި މަސައްކަތް ކޮށްދޭން ޝައުޤުވެރިވާ ފަރާތްތަކުން 19 ނޮވެމްބަރ 2024 ވާ އަންގާރަ ދުވަހުގެ 13:00 ގެ ކުރިން ކައުންސިލް އިދާރާގެ މެއިލް [email protected] މެއިލްކުރުމަށްފަހު، 24 ނޮވެމްބަރ 2024 ވާ އާދިއްތަ ދުވަހުގެ 13:00 އަށް އެ އިދާރާއަށް އަގު ހުށަހެޅުމުގެ ފުރުސަތު ވަނީ ހުޅުވާލައިފައެވެ.