ބަންކަރިންގެ ޚިދުމަތުން މިހާތަނަށް 1.5 މިލިއަން އެމެރިކާ ޑޮލަރުގެ އާމްދަނީއެއް ލިބިފައިވާ ކަމަށް އިޤްތިޞާދީ ތަރައްޤީ އާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ރޭ ވިދާޅުވެއްޖެ އެވެ.

"ހަފްތާ52" ގެ ނަމުގައި ޕީއެސްއެމުން ގެނެސްދިން ޚާއްސަ ޕެނަލް ޑިސްކަޝަންގައި ވާހަކަފުޅު ދައްކަވަމުން ވަޒީރު ސަޢީދު ވިދާޅުވި ގޮތުގައި، އިޤްތިޞާދު އޮތް ދަތި ހާލަތުގައި ވެސް އަދި އޮފްޝޯ ފެސިލިޓީއެއްގެ ގޮތުގައި ބަންކަރިންގެ ޚިދުމަތް ފަށައިގެން މިހާތަނަށް 1.5 މިލިއަން ޑޮލަރުގެ އާމްދަނީއެއް އެސްޓީއޯއަށް ލިބިފައިވެއެވެ. މީގެ އިތުރުން، އިހަވަންދިއްޕޮޅުގައި ތަރައްޤީކުރާ މޯލްޑިވްސް އިކޮނޮމިކް ގޭޓުވޭގެ މަޝްރޫޢުގެ ދަށުން ބަނދަރު ހަދާނެ ފަރާތެއް މިހާރު ލިބިފައިވާ ކަމަށާއި، އިންޓަނޭޝަނަލް ފައިނޭންސިން ސެންޓަރު ޤާއިމްކުރުމުގެ މަސައްކަތްތައް ވެސް ފަށާފައިވާ ކަމަށް ވަޒީރު ވިދާޅުވިއެވެ.

ބައިނަލްއަޤްވާމީ ބަންކަރިންގެ ޚިދުމަތް އުތުރުގައި ފަށައިވަނީ މިދިޔަ ސެޕްޓެމްބަރު 19 ވަނަ ދުވަހުއެވެ. މި ޚިދުމަތް ރާއްޖޭގައި ފޯރުކޮށްދެނީ ބައިނަލްއަގުވާމީ ބަންކަރިން ކުންފުންޏެއް ކަމަށްވާ ވިޓޯލްއާ ގުޅިގެން އެސްޓީއޯއިންނެވެ. މި ޚިދުމަތް ދިނުމަށްޓަކައި އެސްޓީއޯއިން ވަނީ ގާތްގަނޑަކަށް 4،000 ޓަނުގެ ތެޔޮ އުފުލޭ ދެ ބޯޓު ރާއްޖެ ގެނެސްފައެވެ.

ސަރުކާރުން ލަފާކުރައްވާ ގޮތުގައި ބަންކަރިންގެ ޚިދުމަތް ފެށުމުން އިގްތިސާދަށް މުޅިން އަލަށް 400 މިލިއަން ޑޮލަރު ވަންނާނެއެވެ. މިއާއެކު ހަ ބިލިއަން ދިވެހި ރުފިޔާގެ މުޅިން އާ ސިނާއަތެއް އުފެދޭނެ ކަމަށް ލަފާކޮށްފައިވެއެވެ.

ބަންކަރިންއާ ގުޅިފައިވާ އެހެން ޚިދުމަތްތައް ދިނުމަށްޓަކައި މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ވަނީ އުތުރުގައި މެރިޓައިމް ސަރވިސަސް ސެންޓަރެއް ޤާއިމްކޮށްފައެވެ. މީގެ ތެރޭގައި ޕައިލޮޓޭޖް، ޑޮކިން، ކުރޫ ބަދަލުކުރުން އަދި މެއިންޓަނަންސްފަދަ މުހިންމު ޚިދުމަތްތައް ހިމެނެއެވެ. މި ޚިދުމަތްތަކަކީ ވެސް ރާއްޖޭގެ އިޤްތިޞާދަށް ބޭރު ފައިސާ ވަންނާނެ ދާއިރާތަކެއް ކަމުގައި ބެލެވެއެވެ.