އައްޑޫގެ މަގުތައް ޒަމާނީ ފެންވަރަށް ތަރައްގީ ކުރުމަށް ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އާ މިއަދު ހަވާލުކުރި މަޝްރޫޢު ނިމޭއިރު، އައްޑޫގެ ލިންކް ރޯޑް ވަރަށް ބޮޑަށް ހަލާކުވެފައިވާ މައްސަލައަށް ދާއިމީ ހައްލެއް ލިބޭނެ ކަމަށް ގެދޮރުވެރިކަމާއި ބިނާރާ ބެހޭ ވުޒާރާގެ ވަޒީރު ޑރ. ޢަބްދުﷲ މުއްޠަލިބު ވިދާޅުވެއްޖެއެވެ. 

އައްޑޫގެ ލިންކް ރޯޑުގެ މަގުތައް ޒަމާނީ ފެންވަރަށް ތަރައްގީކޮށް، ފެން ހިންދާ ނިޒާމު އަދާހަމަކޮށް ތަރައްގީކުރުމުގެ މަސައްކަތް އާރުޑީސީއާ ހަވާލުކުރީ 1440 ދުވަހުން ނިންމާ ގޮތަށެވެ. އެ މަޝްރޫއަށް ސަރުކާރުން 829.7 މިލިއަން ރުފިޔާ ޚަރަދުކުރާނެއެވެ. 

އެއްބަސްވުމުގައި ސޮއިކުރެއްވުމަށް ފަހު ވާހަކަދައްކަވަމުން ވަޒީރު ޑރ. ޢަބްދުﷲ މުއްޠަލިބު ވިދާޅުވީ އައްޑޫގައި ކުރިއަށް ގެންދިއުމަށް ހަމަޖެހިފައިވަނީ މިހާތަނަށް އެ ސިޓީގައި ހިންގޭ އެންމެ ބޮޑު އެއް މަޝްރޫޢު ކަމަށެވެ. 

މި މަޝްރޫއުގެ ދަށުން ލިންކު ރޯޑު ޒަމާނީ ފެންވަރަށް ތަރައްގީކުރުމާއެކު، 67.58 ކިލޯމީޓަރުގެ ސީޓީބީ އަޅާފަައިވާ މަގުތަކުގައި ތާރު ނުވަތަ ގާ އަޅާނެއެވެ. އަދި ސ. ފޭދުގައި ފެން ހިންދުމުގެ ނިޒާމު ވެސް ގާއިމުކުރުމަށްވަނީ ހަމަޖެހިފައެވެ. 

ލިންކް ރޯޑު އަލުން ޒަމާނީ ފެންވަރަށް ތަރައްގީކުރުމާއެކު، ސީޓީބީ މަގުތަކުގައި ގައު އަތުރައިގެން ނުވަތަ ތާރު އަޅައިގެން މަގު ހަދާނެއެވެ. އަދި މަގުތަކުގައި ދުވާރުތައް ތަރައްގީކޮށް ފެން ހިންދާ ނިޒާމު ގާއިމުކޮށް، ރޯޑް މާކިން އަދި ސައިން ބޯޑު ހަރުކުރާނެއެވެ. 

ވަޒީރު ޑރ. ޢަބްދުﷲ މުއްޠަލިބު ވިދާޅުވީ މަޝްރޫއުގެ ދަށުން އެންމެ ފުރަތަމަ ކުރުމަށް ހަމަޖެހިފައިވަނީ ލިންކް ރޯޑް ރަނގަޅު ފެންވަރަކަށް ހެދުމުގެ މަސައްކަތް ކަމަށެވެ. އެގޮތުން ލިންކު ރޯޑުގެ ޖުމްލަ 12.3 ކިލޯމީޓަރު ސަރަހައްދުގައި މަސައްކަތް ކުރުމަށް ވަނީ ހަމަޖެހިފައެވެ. 

މިހާރު ކުރިއަށްދާ މަޝްރޫޢުގެ މަގުހެދުމުގެ ބައި ގާތްގަނޑަކަށް ނިމިފައިވާކަމަށާއި، ބާކީ ހުރި މަސައްކަތްތައް ކުރިއަށް އޮތް ދެމަހެއްހާ ދުވަސްތެރޭ ނިންމާލެވޭނެކަމަށް އުއްމީދުކުރައްވާ ކަމަށް ވަޒީރު ވިދާޅުވިއެވެ.