ކުރިއަށް އޮތީ މަސްވެރިންނަށް ވަރަށް އުފާވެރި ދުވަސްތަކެއް ކަމަށް މިފްކޯގެ ޖެނެރަލް މެނޭޖަރ ހާމިދު ނަޒީމް ވިދާޅުވެއްޖެއެވެ.

އެމްއެމްޓީވީގެ "ބޮޑު ޚަބަރު" ޕްރޮގްރާމުގައި ވާހަކަ ދައްކަވަމުން ހާމިދު ނަޒީމް ވިދާޅުވީ އެއްވެސް ދަތިތަކާ ނުލައި މަސްވެރިންނަށް 48 ގަޑިއިރު ތެރޭގައި ފައިސާ ދިނުމުގެ އަސްލަކީ ރައީސުލްޖުމްހުރިއްޔާ ޑރ. މުޙައްމަދު މުޢިއްޒުގެ ހަރުދަނާ ސިޔާސަތުތައް ކަމަށެވެ.

މިހާތަނަށް މަސްވެރިންނަށް ގާތްގަނޑަކަށް 402 މިލިއަން ރުފިޔާ ދޫކޮށްފައިވާކަން ފާހަގަކުރައްވަމުން ހާމިދު ވިދާޅުވީ މީގެ ސަބަބުން މަސްވެރިން ތިބީ އެމީހުން ބާނާ މަހަށް އެކަށީގެންވާ އަގު ލިބޭތީ ވަރަށް ހިތްހަމަޖެހިފައި ކަމަށެވެ.

މީގެ އިތުރުން، ރާއްޖޭގެ އެކި ކަންކޮޅުތަކުގައި ޤާއިމުކޮށްފައިވާ އައިސް ޕްލާންޓްތަކަށް ވަރަށް ބޮޑަށް މިދިޔަ ސަރުކާރުތަކުން އިހުމާލުވެފައިވާކަން ފާހަގަކުރައްވަމުން ހާމިދު ވިދާޅުވީ ރައީސް މުޢިއްޒު ވެރިކަމާ ހަވާލުވެ ވަޑައިގެން މި މައްސަލަތައް ވަރަށް ގާތުން ބައްލަވާ ހައްލުކުރައްވަމުން ގެންދަވާ ކަމަށެވެ.

އޭނާ ވިދާޅުވީ ނިމިދިޔަ ސަރުކާރުން ފަށާފައި މަޑުޖައްސާލާފައި ހުރި ޕްރޮޖެކްޓްތަކުގެ މަސައްކަތް މި ސަރުކާރުން ކުރަމުންގެންދާ ކަމަށެވެ. އެގޮތުން އެންމެ ބޮޑު ޕްރޮޖެކްޓެއްގެ ގޮތުގައި މިހާރު ކުރިއަށް ދަނީ ފެލިވަރު އެކްސްޕޭންޝަން ޕްރޮޖެކްޓް ކަމަށެވެ. މި ޕްރޮޖެކްޓް މި އަހަރު ނިމުމުގެ ކުރިން އެ ނިމި ބޭނުންކުރެވޭނެ ކަމަށްވެސް ހާމިދު ނަޒީމް ފާހަގަކުރެއްވިއެވެ. މި ޕްރޮޖެކްޓްތައް ނިމުމުން ސްޓޯރޭޖް ކެޕޭސިޓީ ވަރަށް ބޮޑުތަނުން އިތުރުވާނެ ކަމަށާއި އަދި މަސްވެރިންނަށް އޭގެ ސަބަބުން ބޮޑެތި ލުއިތަކެއް ލިބިގެންދާނެ ކަމަށް ވިދާޅުވިއެވެ.