ޖެޓްތަކުން ދޫކުރާ ދުމުގެ ސަބަބުން މޫސުމަށް ކުރާ ނޭދެވޭ އަސަރު ވަރަށް ފަސޭހައިން ކުޑަކުރެވިދާނެކަމަށް އޭވިއޭޝަން ދާއިރާގެ މާހިރުން ބުނެފިއެވެ.

ޖެޓް މަތިންދާބޯޓުތަކުން ދޫކުރާ ދުމުގެ ސަބަބުން އުފެދޭ ކޮންޓްރެއިލްސް (ކޮންޑެންސޭޝަން ޓްރެއިލްސް) އާ ގުޅޭގޮތުން ގިނަ ކޮންސްޕިރަސީ ތިއަރީތަކެއް އުފެދިފައިވީ ނަމަވެސް، ސައިންޓިސްޓުން ބުނާ ގޮތުގައި މީގެ އަސްލު މައްސަލައަކީ މޫސުމަށް މިކަމުން ކުރާ ހޫނުވުމުގެ އަސަރެވެ.

ދިރާސާކުރާ ފަރާތްތަކުން ބުނާ ގޮތުގައި އޭވިއޭޝަން ދާއިރާއިން ފޮސިލް ފިއުލް ބޭނުންކުރުމުން މޫސުމަށް ކުރާ ހޫނުވުމުގެ އަސަރު ގާތްގަނޑަކަށް ދެގުނަ އިތުރުވެއެވެ.

މި މައްސަލަ ވަނީ ބާކޫގައި ކުރިއަށްދާ އދ. ގެ މޫސުމާ ބެހޭ ސަމިޓް ކޮޕް29 ގައި ފުރަތަމަ ފަހަރަށް މަޝްވަރާކޮށްފައެވެ.

ޓްރާންސްޕޯޓް އެންޑް އެންވަޔަރަންމަންޓް ކެމްޕެއިން ގްރޫޕްގެ ކާލޯސް ލޯޕެޒް ދެ ލާ އޯސާ ވިދާޅުވި ގޮތުގައި ކޮންޓްރެއިލްސްގެ ސަބަބުން އުފެދޭ އިތުރު ވިލާގަނޑުތަކުން ބިމުން ޖައްވަށް ދޫވާންޖެހޭ ހޫނު ހިފަހައްޓައެވެ. އަދި މީގެ ސަބަބުން މޫސުމަށް ކުރާ އަސަރަކީ އޭވިއޭޝަން ދާއިރާއިން ބޭރުކުރާ ކާބަން ޑައިއޮކްސައިޑްގެ ސަބަބުން ކުރާ އަސަރާ އެއްވަރުގެ އަސަރެއް ކަމަށް އޭނާ ވިދާޅުވިއެވެ.

ޓްރާންސްޕޯޓް އެންޑް އެންވަޔަރަންމަންޓް ކެމްޕެއިން ގްރޫޕްގެ އާ ދިރާސާއިން ދައްކާ ގޮތުގައި ކޮންޓްރެއިލްސްގެ ސަބަބުން ކުރާ ހޫނުގެ އަސަރުގެ 80 އިންސައްތައަކީ އުދުހުންތަކުގެ ތިން އިންސައްތައިން ކުރާ އަސަރެވެ. އަދި މަދު އަދަދެއްގެ މަތިންދާބޯޓުތަކުގެ ދަތުރުތައް ބަދަލުކޮށްލައިގެން 2040 ވަނަ އަހަރާ ހަމައަށް ކޮންޓްރެއިލްސްގެ ސަބަބުން ކުރާ ހޫނުވުމުގެ އަސަރު ދެބައިކުޅައެއްބަޔަށްވުރެ ބޮޑަށް ކުޑަކުރެވިދާނެ ކަމަށް ދިރާސާއިން ދައްކައެވެ. އަދި މިކަން ކުރެވޭނީ ކޮންމެ ދަތުރަކަށް ހަތަރު ޕައުންޑަށްވުރެ ކުޑަ އަދަދެއް ހޭދަކޮށްގެންނެވެ.

ކޮންޓްރެއިލްސްގެ މައްސަލަ ޙައްލުކުރުމަށް ކުރެވިދާނެ ކަންތައްތަކުގެ ތެރޭގައި މަތިންދާބޯޓުތަކުގެ ދަތުރުތައް ރޭވުމުގައި ކޮންޓްރެއިލްސް އުފެދޭ ސަރަޙައްދުތައް ދެނެގަނެ، އެ ސަރަޙައްދުތަކުން ދުރުވުން ހިމެނެއެވެ. މިހާރު ވެސް މަތިންދާބޯޓުތަކުގެ ދަތުރުތައް ރޭވުމުގައި ވިއްސާރަ އަދި ގަދަވައި އުޅޭ ސަރަޙައްދުތަކުން ދުރުހެލިވާ ކަމަށް ތަޖްރިބާކާރުން ބުނެއެވެ.

ދިރާސާއިން އިތުރަށް ދައްކާ ގޮތުގައި ކޮންޓްރެއިލްސްގެ ސަބަބުން މޫސުމަށް ކުރާ އަސަރު ބޮޑުވަނީ ވަކި ސަރަޙައްދުތަކެއްގައެވެ. މިގޮތުން 2019 ވަނަ އަހަރު ކޮންޓްރެއިލްސްގެ ސަބަބުން މޫސުމަށް ކުރި އަސަރުގެ ދެބައިކުޅައެއްބަޔަށްވުރެ ބޮޑީ އުތުރު އެމެރިކާ، ޔޫރަޕް އަދި އުތުރު އެޓްލާންޓިކް ސަރަޙައްދުގައި ކަމަށް ދިރާސާއިން ދައްކައެވެ.

މީގެ އިތުރުން ހަވީރު އަދި ރޭގަނޑުގެ ވަގުތުތަކުގައި ކުރާ ދަތުރުތަކުން ކުރާ އަސަރު ބޮޑުވާ ކަމަށާއި، ފިނި މޫސުމުގައި މި އަސަރު އިތުރުވާ ކަމަށް ވެސް ދިރާސާއިން ދައްކައެވެ.