ހަނގުރާމަ ހިނގަމުންދާ ސަރަހައްދުތަކަށް ދިއުމަށްފަހު، އެތަންތަނުގައި ތާށިވެ ރާއްޖެއަށް ނާދެވި ތިބި ދިވެހިންގެ ތެރެއިން ސޫރިޔާގެ ދެ ސަރަހައްދެއްގައި ތިބި 60 މީހަކު ރާއްޖެއަށް އަނބުރާ ގެނައުމުގެ މަސައްކަތް ސަރުކާރުން ކުރަމުންދާކަން ދާހިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހުސާން ހާމަކުރައްވައިފިއެވެ. 

އެ ވުޒާރާއިން ކުރަމުންދާ މަސައްކަތްތަކުގެ އެންމެ ފަހުގެ މައުލޫމާތު ދެއްވުމަށް މިއަދު ރައީސް އޮފީހުގައި ކުރިއަށްގެންދިޔަ ނޫސްވެރިންގެ ބައްދަލުވުމުގައި އިހުސާނު ވިދާޅުވީ ހަނގުރާމަ ހިނގަމުންދާ ސަރަހައްދުތަކަށް ހަނގުރާމައިގައި ބައިވެރިވުމަށް ދިޔަ މީހުންނާއި، ހަނގުރާމައިގައި ބައިވެރިވާން ދިޔައިރުގައި އެކުގައި ގެންދިޔަ އާއިލާ މީހުންގެ ތެރެއިން ރާއްޖެއަށް ނާދެވި އެ ސަރަހައްދުތަކުގައި ތާށިވެފައި ތިބި ދިވެހިން ރާއްޖެއަށް އަނބުރާ ގެނެސް މުޖުތަމައަށް އެމީހުން ނެރުމަށް ކުރަންޖެހޭ މަސައްކަތްތައް ކުރުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އިރުޝާދު ދެއްވާފައިވާ ކަމަށެވެ. 

ރައީސްގެ އެންގެވުމާ ގުޅިގެން ސަރުކާރުން ކުރިއަށްގެންދިޔަ މަސައްކަތުގެ ތެރެއިން 23 މީހަކު ރާއްޖެއަށް އަނބުރާ ގެނެސް މުޖުތަމައުގައި ބައިވެރިކުރުމުގެ ކުރިން ހިންގަންޖެހޭ ޕްރޮގުރާމުތައް ފުރިހަމަކޮށް މުޖުތައަށް އަލުން ނެރެފައިވާކަމަށް ވަޒީރު ވިދާޅުވިއެވެ. 

"އަޅުގަނޑުމެން މިހާރު މަސައްކަތްކުރަމުންދިޔައީ ކުރީގައި ސޫރިޔާގެ ދެ ސަަރަހައްދެއްގައި ތިބިކަން އެނގިގެން އެ ސަރަހައްދުތަކުން ގެންނަންޖެހުނު ގާތްގަނޑަކަށް ފަސްދޮޅަހެއްހައި މީހުންގެ މަސައްކަތްކުރިއަށްގެންދިޔައީ. އެމީހުންނާއި އެ ސަރަހައްދާއި އަދި އެހެން ގައުމުތަކުގައި ތާށިވެފައި ތިބި މީހުން ގެނައމުގެ މަސައްކަތް އަޅުގަނޑުމެން އެބަކުރަމުންދަން،" އިހުސާން ވިދާޅުވިއެވެ. 

މި މަސައްކަތުގެ ތެރެއިން ހަނގުރާމައިގެ ސަރަހައްދަށް ދިޔަ ކަމުގައި ބެލެވިގެން ތުރުކީވިލާތުގެ އިދާރާތަކުގެ ބެލުމުގެ ދަށަށް ގެނައި ތިން ދިވެހިންގެ ތެރެއިން 14 އަހަރުގެ ކުއްޖަކާއި އެކުއްޖާގެ މަންމަ މިހާރު ރާއްޖެއަށް ގެނެވި، ނޭޝަނަލް އިންޓަގްރޭޝަން ސެންޓަރުގައި އެމީހުން މުޖުތަމައަށް ނެރުމުގެ ކުރިން ހިންގަންޖެހޭ ޕްރޮގުރާމުތައް ހިންގަމުންދާ ކަމަށް ވަޒީރު ވިދާޅުވިއެވެ. 

ހަނގުރާމައިގައި ބައިވެރިވުމަށް ސޫރިޔާގެ އެކި ސަރަހައްދުތަކަށް ދިޔަ ދިވެހިންގެ ތެރެއިން ވަރަށް ގިނަ އަދަދެއްގެ ބަޔަކު ކުރުދީ ހަނގުރާމަވެރިންގެ ކޭމްޕުތަކުގައި ތާށިވެފައި ތިބިކަމަށް މައުލޫމާތު ލިބިފައިވެއެވެ. ސަރުކާރުން އެމީހުންގެ ހާލަތު ބަލައި، އެމީހުން ރާއްޖެ އަނބުރާ ގެނައުމަށް އެކުވެރި ގައުމުތަކާ އެކީ ގިނަ މަސައްކަތްތަކެއްދަނީ ކުރަމުންނެވެ.