2025 ވަނަ އަހަރު ބޭންކް ފަންޑް ކާމިޔާބުކުރި ފަރާތްތަކުގެ ތެރޭގައި ހިމެނޭ ދ. ކުޑަހުވަދޫ ޔުނައިޓެޑް އިސްލާމިކް ސޮސައިޓީ (ޔޫއައިއެސް) އިން އެރަށުގައި ހުންނަ ދ. އަތޮޅު ތައުލީމީ މަރުކަޒުގައި މަލްޓި-މީޑިއާ ސްޓޫޑިއޯއެއް ގާއިމުކޮށްފިއެވެ.

ބީއެމްއެލްއިން ބުނީ މި ސްޓޫޑިއޯގައި ޕްރޮފެޝަނަލް ކެމެރާއާއި ލައިޓިންގ ކިޓް، އޯޑިއޯ ރެކޯޑު ކުރާނެ ވަސީލަތްތަކާއި އެޑިޓިންގ ކޮމްޕިއުޓަރ އަދި ސްޓްރީމިންގ ހާޑްވެއާ ފަދަ ވަސީލަތްތައް ހިމެނޭ ކަމަށެވެ. 

މި ވަސީލަތްތަކާއެކު 800 އަށްވުރެ ގިނަ ދަރިވަރުން ތައުލީމު ހާސިލްކުރަމުންދާ ދ. އަތޮޅު ތައުލީމީ މަރުކަޒުގެ މީޑިއާ ކްލަބަށް ކުރިއެރުން ލިބިގެންގޮސްފައިވާކަމަށް ބީއެމްއެލްއިން ބުނެއެވެ. 

ބީއެމްއެލްއިން ބުނީ ޔޫއައިއެސް ގެ އަމާޒަކީ މިސެންޓަރު މެދުވެރިކޮށް މީޑީއާ ދާއިރާގައި ދަރިވަރުންގެ ހުނަރާއި ތަޖުރިބާ އިތުރުކުރުންކަމަށެވެ. އެގޮތުން ދަރިވަރުންނަށް ވީޑިއޯ އުފެއްދުމަށާއި، އިވެންޓް ބްރޯޑްކާސްޓްކުރުމަށާއި ވީޑިއޯ ރިޕޯޓް ހެދުމަށާއި އެ މަރުކަޒުގެ ރަސްމީ ޔޫޓިއުބް ޗެނަލަށް ތައުލީމީ ކޮންޓެންޓް އުފެއްދޭނެ ތަމްރީނުދޭ އަދި އުފެއްދުންތެރި މަރުކަޒެއްގެ ގޮތުގައި މިތަން ބޭނުންކުރެވޭނެއެވެ. އަދި މި މަރުކަޒުގެ ޚިދުމަތް ރަށުގެ އެހެން އޮފީސްތަކަށާއި ކައިރި ރަށްރަށަށް ވެސް ފޯރުކޮށްދީ ގުޅިގެން މަސައްކަތްކުރުމުގެ މަގު ތަނަވަސްވެގެންދާނެ ކަމަށް ބީއެމްއެލްއިން ބުނެއެވެ. 

ބީއެމްއެލްއިން ބުނީ އެ ސްކޫލާއި ޔޫއައިއެސްގެ ޚާއްސަ ޓީމަކުން މި ސްޓޫޑިއޯ ބަލަހައްޓަމުންދާނެ ކަމަށާއި، މިތަނުގެ ބޭނުން އެންމެ ފުރިހަމަ ގޮތުގައި ހިފައި އާމްދަނީ ލިބޭނެ އަދި ދެމެހެއްޓެނިވި ގޮތެއްގައި ހިންގުމަށްޓަކައި ގަވާއިދުން ތަމްރީނު ދިނުމާއިއެކު އެކަށީގެންވާ ގޮތެއްގައި ތަން ބެލެހެއްޓޭނެ އިންތިޒާމު ހަމަޖެހިފައިވާކަމަށެވެ. 

ބޭންކް ފަންޑަކީ ތައުލީމު، ތިމާވެށި، ކުޅިވަރު އަދި މުޖުތަމަޢު ކުރިއެވުމަށް މަޝްރޫއުތައް ހިންގުމަށް ބޭންކު ފަންޑަށް އެދި ހުށަހަޅާ ޖަމިއްޔާ ޖަމާއަތްތަކުގެ ތެރެއިން ހޮވޭ ކޮންމެ ޖަމިއްޔާއަކަށް 200،000 ރުފިޔާގެ ހިލޭ އެހީ ލިބޭ ފަންޑެކެވެ. މިގޮތުން މުޖުތަމައުގެ ތަރައްގީއަށް ހިންގާ މަޝްރޫއުތަކަށް. ބޭންކުން ޚާއްސަ އަހައްމިއްޔަތުކަމެއް ދެއެވެ.