އުންމީދުކުރައްވަނީ ސަރުކާރާ އިދިކީލަވުމުގެ ބަދަލުގައި ސަރުކާރުން ފޯރުކޮށްދޭން ބޭނުންވާ ހިދުމަތްތައް ރައްޔިތުންނާ ހަމައަށް ގެނެސްދިނުމުގައި ހުރިހާ ކައުންސިލަކުންވެސް މެދުވެރިންގެ ދައުރު އަދާކުރެއްވުންކަމަށް ސިޓީތަކާއި އިދާރީ ދާއިރާތަކުގެ ހިންގުމާއި އާއްމު މަސައްކަތްތަކާ ބެހޭ ވަޒީރު އާދަމް ޝަރީފު ވިދާޅުވެއްޖެއެވެ. 

ވުޒާރާގެ މަސައްކަތްތަކުގެ އެންމެ ފަހުގެ މައުލޫމާތު ހާމަކުރެއްވުމަށް ރައީސުލްޖުމްހޫރިއްޔާގެ އޮފީހުގައި މިއަދު ކުރިއަށްދިޔަ ނޫސްވެރިންގެ ބައްދަލުވުމުގައި ބައެއް ކައުންސިލުތަކުގެ އެއްބާރުލުން ނުލިބުމުގެ ސަބަބުން ތަރައްގީގެ މަޝްރޫއުތައް މަޑުޖެހިފައި އެބަހުރިކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވި ބަސްފުޅާމެދު ނޫސްވެރިޔަކުވަނީ ވަޒީރާ ސުވާލުކޮށްފައެވެ. 

އެ ސުވާލަށް ޖަވާބުދެއްވަމުން ވަޒީރު ވިދާޅުވީ ލާމަރުކަޒީ ނިޒާމުގެ ތެރޭގައި މަލްޓި ޕާޓީ ނިޒާމުވެސް ޝާމިލުވެފައި އޮތުމުން ކޮންމެ ވެރިކަމެއްގަައިވެސް ލާމަރުކަޒީ ނިޒާމުގެ ތެރެއިން ބައެއްކަހަލަ ގޮންޖެހުންތަކާ ކުރިމަތިލާންޖެހޭ ކަމަށެވެ. އަދި ރައީސް އިޝާރާތްކުރެއްވި ކަންކަމަކީ ކުރީގެ ސަރުކާރުތަކުން ފަށައިގެން ނުކުރެވި ހުރި ކަންކަމާއި ނުފެށުނު ކަންކަން ރައީސްގެ ޒައާމަތުގައި ކުރައްވަފާނެތީ ސިޔާސީ މަގުސަދެއްގައި ކައުންސިލުތަކުން ކުރިމަތިކުރާ ހުރަސްތައް ކަމުގައި ދެކެވަޑައިގަންނަވާކަމަށް ވަޒީރު ވިދާޅުވިއެވެ. 

"ކައުންސިލުތަކަކީ ރައްޔިތުންނާ ސަރުކާރާ ދެމެދު ހިޔާލު ތަފާތުވުންތަކެއް އުފައްދައި، ސަރުކާރާ އިދިކީލަ ހިޔާލުތަކެއް އުފައްދާ ބަޔަކަށްވުމުގެ ބަދަލުގައި، ހުރިހާ ކައުންސިލުތަކަކީ ސަރުކާރުން ދޭ ހިދުމަތްތައް ފޯރުކޮށްދިނުމުގައި މެދުވެރިއެއްގެ ގޮތުގައި އަދި އެ ހިދުމަތްތައް އަވަސްކުރުމަށް މަސައްކަތްކުރާނެ ބަޔަކަށްވުން،" އާދަމް ޝަރީފު ވިދާޅުވިއެވެ. 

އިތުރަށް ވަޒީރު ވިދާޅުވީ ލާމަރުކަޒީ ނިޒާމަށް މީހުން އަހުލުވެރިވަމުންދާ މިންވަރަކަށް ސަރުކާރުގެ މަޝްރޫއުތައް ލަސްވާނެހެން އަމަލުކޮށް، ބިން ދޫކުރުން ފަދަ ކަަންކަމުގައި ދަތިތައް ކުރިމަތިކުރުން ފަދަ ކަންކަން ނިމުމަކަށް އަންނާނެ ކަމަށެވެ. 

މިނިސްޓަރުގެ ވާހަކަފުޅުގައި ކައުންސިލުތަކަށް އިލްތިމާސްކުރެއްވީ ޕާޓީގެ ވިސްނުމާއި ފިކުރު އެއްކައިރި ކުރުމަށްފަހު ތަރައްގީއާއި ރަށްރަށުގެ ކުރިއެރުމުގެ ވިސްނުން ކުރިއަށް ނެރެގެން އެކަންކަމަށް އިސްކަންދީގެން މަސައްކަތްކުރުމަށެވެ.