ކުރިއަށް އޮތް ލޯކަލް ކައުންސިލު އިންތިހާބުގައި މާލެ ސިޓީގެ އެކި ދާއިރާތަކަށް ވާދަކުރައްވާ ކެންޑިޑޭޓުންނަށް ތާއީދު ހޯއްދެވުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ކުރައްވަމުންގެންދަވާ މަސައްކަތްޕުޅުގެ ނަތީޖާއެއްގެ ގޮތުން މާލޭ ސިޓީގެ ހުރިހާ ދާއިރާއެއް ވެރިކަންކުރާ ޕީޕަލްސްް ނޭޝަނަލް ކޮންގްރެސް ޕާޓީއަށް ކާމިޔާބުކުުރެވޭ މަންޒަރު ފެނިވަޑައިގަންނަވާ ކަމަށް ރައްޔިތުންގެ މަޖިލީހުގެ މާފަންނު ހުޅަނގު ދާއިރާގެ މެންބަރު މުހައްމަދު މުސްތަފާ ހުސައިން ވިދާޅުވެއްޖެއެވެ. 

މާފަންނު ދެކުނު ދާއިރާގައި ކޮންގްރެސް ޕާޓީން ކުރިއަށްގެންދިޔަ ދޮރުން ދޮރަށް ހަރަކާތުގައި ރައީސް ޑރ.މުހައްމަދު މުއިއްޒުގެ އަރިހުގައި ބައިވެރިވެވަޑައިގެން އެ ސަރަހައްދުގައި ހުންނަވައި އެމްއެމްޓީވީއަށް ދެއްވި ބަސްދީގަތުމެއްގައި މެންބަރު ވިދާޅުވީ ކޮންމެ ދުވަހަކު ރައީސް ދޮރުން ދޮރަށް ހަރަކާތުގައި ބައިވެރިވެވަޑައިގަތުމުގެ ސަބަބުން އިންތިހާބަށް ވަރަށް ބޮޑަށް އަސަރުކުރަމުންދާ ކަމަށެވެ. 

މުސްތަފާ އިތުރަށް ވިދާޅުވީ ރައީސް ރައްޔިތުންނާ ބައްދަލުކުރައްވަނީ ދޮރުން ދޮރަށް ހަރަކާތުގައި އެކަނި ނޫންކަމަށާއި، މާ ކުރިއްސުރެވެސް އެމަނިކުފާނު ގެންދަވަނީ ސިލްސިލާ ގޮތެއްގައި ރައްޔިތުންނާ ބައްދަލުކުރައްވަމުން ކަމަށެވެ. އަދި ރައްޔިތުންނާ ރައީސް ބައްދަލުކުރައްވައި، އެ ރައްޔިތުންގެ ހާލު ބައްލަވައި ގާތްކަން ބަހައްޓަވަމުންދާތީ، ރައްޔިތުންގެ ހިތްތަކުގައި އެމަނިކުފާނަށް އޮންނަ ތާއީދު އިތުރުވެ، ސަރުކާރާމެދު ރައްޔިތުންގެ ހިތްތަކުގައި ލޯބި އުފެދެމުންދާކަމަށްވެސް މުސްތަފާ ވިދާޅުވިއެވެ. 

"އަޅުގަނޑުމެންގެ އޮޕޮޒިޝަން އެމްޑީޕީގެ މާލެ ސިޓީގެ ހުރިހާ ކެންޑިޑޭޓުންގެ ކެމްޕެއިން ލޯންޗިން ހަފުލާއަށް ބަލައިލުމުން އޭގެ ނަތީޖާ ވަރަށް ސާފުކޮށް ފެނޭ. އެތަނަކަށް މީހުންނެއް ނުދޭ. އަޅުގަނޑުމެން ހަމައެކަނި މާފަންނުގެ ހަތަރު ކެނޑިޑޭޓުންގެ ލޯންޗިންއަށްވުރެ އެމްޑީޕީގެ ހުރިހާ ދާއިރާއެއްގެ ކެމްޕެއިން ލޯންޗިންގައި ބައިވެރިވި މީހުން މަދު،" މެންބަރު ވިދާޅުވިއެވެ. 

މުސްތަފާ ވިދާޅުވީ ރައީސް ކުރައްވަމުންގެންދަވާ މަސައްކަތްޕުޅުގެ ސަބަބުން ވާދަވެރިންގެ މަގުބޫލުކަން ކުޑަވެ، ކުރިއަށް އޮތް ލޯކަލް ކައުންސިލުތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބުަގައި މާލޭގެ ހުރިހާ ދާއިރާއެއްގެ ގޮނޑިތައް ފަސޭހަކަމާއެކު ޕީއެންސީއަށް ކާމިޔާބުކުރެވޭތަން ފެނިވަޑައިގަންނަވާ ކަމަށެވެ. 

އޭގެ އިތުރަށް މެންބަރުވަނީ ކައުންސިލު އިންތިހާބާއެކު ބާއްވާ ދެ އިންތިހާބު އެއް ދުވަހެއްގައި ބޭއްވުމާމެދު ރައްޔިތުންގެ އާއްމު ހިޔާލު ހޯދުމުގެ ވޯޓާމެދު ވާހަކަދައްކަވާފައެވެ. މުސްތަފާ ފާހަގަކުރެއްވި ގޮތުގައި ދެ އިންތިހާބު އެއް ދުވަހެއްގަައި ބޭއްވުމުން ދައުލަތަށް ހަރަދު ކުޑަވުމުގެ އިތުރަށް އިންތިހާބުތަކުގެ ކެމްޕެއިނުގައި އިސްރާފުވެގެންދާ ރައްޔިތުންނާއި ސަރުކާރުގެ ވަގުތު ސަލާމަތްކުރެވިގެންދާނެއެވެ.