ENGLISH

06 އޭޕްރީލު 2025

Advertisement

ޣައްޒާގެ ސުކޫލަކަށާއި ސިއްހީ ސާމާނު ހުރި ގުދަނަކަށް އިސްރާއީލުން ދިން ހަމަލާ ދިވެހި ސަރުކާރުން ކުށްވެރިކޮށްފި

05 އޭޕްރީލު 2025

|

ޝިފްޒާން އަޙްމަދު

ރައީސުލްޖުމްހޫރިއްޔާ ޑރ.މުހައްމަދު މުއިއްޒު ފަލަސްތީނުުގެ ރައީސް މަހުމޫދު އައްބާސާއެކު، ފޮޓޯ: ރައީސް އޮފީސް

ޣައްޒާގެ ދާރުލް އަރްޤަމް ސުކޫލަށާއި ބޭސްފަރުވާއަށް ބޭނުންވާ ސާމާނު ރައްކާކުރާ ގުދަނަކަށް އިސްރާއީލުން ދިން ބޮމުގެ ހަމަލާ ދިވެހި ސަރުކާރުން ކުށްވެރިކޮށްފިއެވެ. 

ޚާރިޖީ ވުޒާރާއިން މިއަދު ނެރުނު ބަޔާނެއްގައި ޣައްޒާގެ ދާރުލް އަރުޤަމް ސުކޫލަށް ޞިހުޔޫނީ ސިފައިން ދިން ބޮމުގެ ހަމަލާގައި ގިނަ އަދަދެއްގެ މައުސޫމު އަންހެނުންނާއި ކުޑަކުދިން މަރުވެ އެތައް ބަޔަކު ޒަހަމްވެފައިވާކަން ފާހަގަކުރުމާއެކު، ބުނެފައިވަނީ ދިވެހި ސަރުކާރުން އެ ހަމަލާ  އެންމެ ހަރުކަށި އިބާރާތުން ކުށްވެރިކުރާ ކަމަށެވެ. 

އެ ހަމަލާގެ އިތުރަށް ސައުދީ ސެންޓާ ފޯ ކަލްޗާ އެންޑް ހެރިޓޭޖުން ޣައްޒާގައި ހިންގަމުންދާ ސިއްހީ ހިދުމަތަށް ބޭނުންވާ ސާމާނުތައް ރައްކާކޮށްފައި ހުރި ގުދަނަކަށް އިސްރާއީލުން ދިން ހަމަލާވެސް ދިވެހި ސަރުކާރުން ކުށްވެރިކުރާކން ހާމަކުރުމާއެކު، އެ ހަމަލާއަކީ ބައިނަލްއަގުވާމީ އިންސާނިއްޔަތުގެ ގާނޫނާ މުޅިން ހިލާފު އަމަލެއްކަމަށް ހާރިޖީ ވުޒާރާގެ ބަޔާނުގައި ބުނެފައިވެއެވެ. 

އިސްރާއީލުން ހިންގަމުންދާ މިފަދަ ހުރިހާ ލާއިންސާނީ އަމަލުތައް ހުއްޓުވުމާއެކު، އެ އަމަލުތަކާމެދު އެ ގައުމު ޖަވާބުދާރީކުރުމަށް ސަރުކާރުން ބައިނަލްއަގުވާމީ މުޖުތަމައަށް ގޮވައިލިއެވެ. އަދި ޣައްޒާގައި ދިރިއުޅޭ މީހުންނަށް ބޭނުންވާ އިންސާނީ އެހީތެރިކަން ފޯރުކޮށްދިނުމަށް ދިވެހި ސަރުކާރުން ބައިނަލްއަގުވާމީ މުޖުތަމައަށް އިލްތިމާސްކުރިއެވެ. 

އޭގެ އިތުރަށް ފަލަސްތީނު ރައްޔިތުންނަށް 1967 ވަނަ އަހަރުގެ ކުރިން ކަނޑައަޅާފައިވާ އިންތަކާ އެއްގޮތަށް، އިރުމަތީ ގުދުސްގައި ވެރިރަށް އޮންނަ މުސްތަގިއްލު އަމިއްލަ ސިޔާދަތު ލިބިގެންވާ ދައުލަތެއް ގާއިމުކުރެވިގެން ނޫނީ މި މައްސަލައަށް ދެމެހެއްޓެނެވި އަދުލުވެރި ހައްލެއް ނުލިބޭނެކަން މި ބަޔާނުގައިވެސް ރާއްޖެއިން ތަކުރާރުކޮށް ފާހަގަކުރިއެވެ. 

ރައީސުލްޖުުމްހޫރިއްޔާ ޑރ.މުހައްމަދު މުއިއްޒު ރާއްޖޭގެ ވެރިކަމާ ހަވާލުވެވަޑައިގެންނެވި ފަހުން އެމަނިކުފާނު ގެންދަވަނީ ފަލަސްތީނުގެ ހައްގުގައި ބައިނަލްއަގުވާމީ މަންސަތަކުގައި ވަރަށް ފުޅާ ދާއިރާއެއްގައި ވަކާލާތުކުރައްވަމުންނެވެ. އެގޮތުން އދ.ގެ އާއްމު މަޖިލީހުގެ ބައްދަލުވުމުގައި އެމަނިކުފާނު ދެއްވި ތަގުރީރުގައި ފަލަސްތީނުގެ ހައްގުގައި ދެއްކެވި ވާހަކަފުޅަށް ދުނިޔޭގެ ގިނަ ބައެއްގެ ސަމާލުކަން ލިބުނެވެ. 

އޭގެ އިތުރަށް ދިވެހި ސަރުކާރުން އަންނަނީ ފަލަސްތީނު ރައްޔިތުން އަދި ހާއްސަކޮށް ޣައްޒާގެ އަހުލުވެރިންނަށް ސިހުޔޫނީ ދައުލަތުން ކުރަމުން އަންނަ އަނިޔާތައް ދުނިޔޭގެެ ސަމާލުކަމަށް ގެނައުމާއި، އެ އަނިޔާވެރި އަމަަލުތައް ހުއްޓުވުމަށް އެކި ގައުމުތަކުން އިސްނަގައިގެން ކުރަމުން އަންނަ މަސައްކަތްތަކުގައި ބައިވެރިވަމުންނެވެ. 

އެގޮތުން އިސްރާއިލާ ދެކޮޅަށް ބައިނަލްއަގުވާމީ އަދުލުގެ ކޯޓަށް ދެކުނު އެފުރިކާއިން ހުށަހަޅާފައިވާ މައްސަލައަށް ރާއްޖެއިން ތަދައްހުލުވެ ބަޔާނެއް ހުށަހަޅާފައިވެއެވެ. އަދި އިސްރާއީލުގެ އަނިޔާވެރިކަން ހުއްޓުވުމަށް އދ.ގެ އާއްމު މަޖިލީހަށް ހުށަހެޅުނު ގިނަ ގަރާރުތަކެއްގައި ކޯ-ސްޕޮންސާއެއްގެ ގޮތުގައި ރާއްޖެއިން ބައިވެރިވެފައިވެއެވެ. 

އަދި ރާއްޖެއިން އަންނަނީ ހުއްޓުމެއްނެތި 1967 ވަނަ އަހަރު ކަނޑައެޅި އިންތިކާ އެއްގޮތަށް އިރުމަތީ ގުދުސްގައި ވެރިރަށް އޮންނަ މިނިވަން މުސްތަގިއްލު ފަލަސްތީނުގެ ދައުލަތެއް ގާއިމުކުރުމަށް ގޮވައިލާ އެކަމަށް ވަކާލާތުކުރަމުންނެވެ. 

ކިޔުންތެރިންގެ ހިޔާލު