ޒުވާން ޖީލު ދުންފަތާ ދުރުކުރުމަށްޓަކައި ވަކި އުމުރަކުން ދަށުގެ މީހުންނަށް ދުންފަތުގެ ބާވަތްތައް ވިއްކުން މަނާކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުށަހެޅުއްވި ހުށެހެޅުއްވުން، ދުންފަތުގެ ވިޔަފާރިކުރާ ބިޔަ ކުންފުނިތަކުގެ ސަމާލުކަމަށް، ޓޮބޭކޯ ރިޕޯޓާއިން ގެނެސްފިއެވެ.

ދިވެހި މުޖުތަމައު ދުންފަތުގެ ނުރައްކަލުން ސަލާމަތް ކުރުމަށް ޖެނެރޭޝަން ބޭންގެ ޚިޔާލު ރައީސް ފާޅުކުރެއްވީ "ރައްޔިތުންނާ އެކު" މި ނަމުގައި ރައީސް އޮފީހުން ކުރިއަށްގެންދިޔަ ޕޮޑްކާސްޓްގައި ވާހަކަފުޅު ދައްކަވަމުން މިދިޔަ ބުދަ ދުވަހުއެވެ.

އެމެރިކާގެ ޓޮބޭކޯ ރިޕޯޓާ އަކީ ދުންފަތުގެ ވިޔަފާރިގައި ހަކަތާތެރިވާ ފަރާތްތަކާއި އެ އިންޑަސްޓްރީގެ ޚަބަރުތައް ގެނެސްދޭ ވެބްސައިޓެކެވެ. ދުންފަތުގެ ބާވަތްތައް ރާއްޖޭގައި މަނާކުރެއްވުމެއްވުމަށް ރައީސް ތިން ހުށަހެޅުމެއް ހުށަހަޅުއްވާފައިވާކަމަށް އެ ވެބްސައިޓުގައި ވަނީ ރިޕޯޓުކޮށްފައެވެ.

ދުންފަތުގެ ބާވަތްތައް ވިއްކުން މާނާކުރުމަށް ރައީސް ތިން ވިސްނުންފުޅެއް ހިއްސާކުރެއްވި އެވެ.

އެއީ:

1- 2007 ޖެނުއަރީ 1 އިން ފެށިގެން އުފަންވެފައިވާ ކުދިންނަށް ދުންފަތުގެ ބާވަތްތައް ވިއްކުން މަނާކުރުން.

2- 2004 ޖެނުއަރީ 1 އިން ފެށިގެން އުފަންވެފައިވާ ކުދިންނަށް ދުންފަތުގެ ބާވަތްތައް ވިއްކުން މަނާކުރުން.

3- 2000 ވަނަ އަހަރުގެ ޖެނުއަރީ 1 އިން ފެށިގެން އުފަންވެފައިވާ ކިދިންނަށް ދުންފަތުގެ ބާވަވްތައް ވިއްކުން މަނާކުރުން.

ރައީސް ވިދާޅުވީ މި ސަރުކާރުން ހުށަހަޅާ ތިން ގޮތް ދިރާސާކޮށް، އެކަމާ ގުޅޭ ގޮތުން ރާއްޖޭގެ މާހިރުންގެ ލަފަ އާއި އިރުޝާދު ހޯއްދެވުމަށްފަހު އެކަމާ ގުޅޭ ގާނޫނު ލަސްނުކުރައްވައި އެކަަށައަޅުއްވައި ރައްޔިތުންގެ މަޖިލީހަށް ހުށަހަޅުއްވާނެ ކަމަށެވެ. 

އާބާދީ ކުޑަ ނަމަވެސް ރާއްޖެ އަކީ ދުންފަތުގެ އިސްތިއުމާލުކުރާ މީހުންގެ ނިސްބަތް މަތި ގައުމެކެވެ. ދުނިޔޭގެ ސިއްހަތު ޖަމްއިއްޔާއިން އަންދާޒާކުރާ ގޮތުގައި ރާއްޖޭގައި އުމުރުން 15 އަހަރުން މަތީ މީހުންގެ އާބާދީގެ 26.6 އިންސައްތަ މީހުންނަކީ ދުންފަތުގެ ކޮންމެވެސް ބާވަތެއް ބޭނުންކުރާ މީހުންނެވެ. ފިރިހެނުންގެ ތެރެއިން 43.6 އިންސައްތަ މީހުންނަކީ ދުންފަތުގެ އިސްތިއުމާލުކުރާ މީހުންކަމަށް އެ ޖަމްއިއްޔާއިން ހަދާފައިވާ ސާވޭއެއްގެ މައްޗަށް ބިނާކޮށް އަންދާޒާކުރެއެވެ.

ރައީސް ޑރ. މުޙައްމަދު މުޢިއްޒު ވެރިކަމާ ހަވާލުވެ ވަޑައިގެން ދުންފަތާ ދެކޮޅަށް ހަރުދަނާ ފިޔަވަޅުތަކެއް އަޅުންވަން ފެއްޓެވިފަހުން، ޓޮބޭކޯ ރިޕޯޓާގެ ސަމާލުކަން ރާއްޖެއަށް ލިބިގެން ގޮސްފައިވެ އެވެ. މިގޮތުން ދުންފަތާ ދެކޮޅަށް ރައީސް ނިންމެވި ކަންކަމާގުޅޭ ގޮތުން ނުވަ ޚަބަރު މިދިޔަ ނުވަ މަސް ދުވަހުގެ ތެރޭގައި އެ ވެބްސައިޓުގައި ޝާއިއުކޮށްފައިވެއެވެ. ރާއްޖެއާ ބެހޭ ގޮތުން އެ ވެބްސައިޓުގައި ޝާއިއުކޮށްފައިވާ ހަމައެކަނި ޚަބަރުތަކަކީ ވެސް އެއީ އެވެ.