ގިނަ އަދަދެއްގެ ޢުމްރާވެރީންނާއި ފިޠުރު ޢީދުގެ ޗުއްޓީއާ ގުޅިގެން ވެލާނާ އިންޓަނޭޝަނަލް އެއާޕޯޓަށް އަންނަ މީހުންގެ އަދަދު އިތުރުވާނެތީ އިރުޝާދުތަކަށް ސަމާލު ވުމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އާއި ދިވެހި ފުލުހުންގެ އިދާރާ އިން އިލްތިމާސް ކޮށްފި އެވެ.

އެމްއޭސީއެލް އިން ވަނީ މާދަމާ އަކީ ރޯދަ އުމްރާވެރީން ރާއްޖެ އަންނަން ފަށާ ދުވަސްކަމުން މާދަމާ އާއި އަނެއް ދުވަހު އެއާޕޯޓަށް ވަރަށް ބާރުބޮޑުވާނެ ކަން ފާހަގަ ކުރައްވާފަ އެވެ. އެމްއޭސީއެލް އިން ފާހަގަ ކޮށްފައިވާ ގޮތުގައި މާދަމާ އެންމެ ބާރުބޮޑުވާނީ މެންދުރު 2:00 އާއި ހަވީރު 4:00 އާ ދެމެދުގައެވެ. މި ދެ ދުވަހު ފުރާ މީހުން ފުރުމުގެ އިންތިޒާމުތަކަށް އެކަށީގެންވާ ވަގުތު އޮއްވާ އެއާޕޯޓަށް ދިއުމަށް ވަނީ އެދިފަ އެވެ.

ތަނުގެ ދަތުރުފަތުރުގެ ކަންކަމަށް ހަމަޖައްސާފައިވާ އުސޫލުތަކަށް ހުރިހާ ފަރާތްތަކުން ވެސް އަމަލު ކުރުމަށް އެދިފައިވެ އެވެ.

ދިވެހި ފުލުހުންގެ ޚިދުމަތުން ވެސް ބުނީ ގިނަ އަދަދެއްގެ ޢުމްރާވެރީންނާއި ފިޠުރު ޢީދުގެ ޗުއްޓީއާ ގުޅިގެން ވެލާނާ އިންޓަނޭޝަނަލް އެއާޕޯޓަށް އަންނަ މީހުންގެ އަދަދު އިތުރުވެ އެއާޕޯޓްގެ ޓްރެފިކް ފްލޯއަށް ބާރުބޮޑުވާނެ ކަމަށް ލަފާ ކުރެވޭތީ މި ދެ ދުވަހު ވީއައިއޭއަށް ދަތުރުކުރާ އެއްގަމު އުޅަނދުފަހަރު ދުއްްވާ މީހުން ފުލުހުންދޭ އިރުޝާދުތަކަށް އަމަލު ކުރުމަށް އެދޭ ކަމަށެވެ.