މާލެއާ ވިލިމާލެ ގުޅުވާލާ ތިލަމާލެ ބްރިޖުގައި އެންމެ އުސް ޕްރީކާސްޓް ނެވިގޭޝަން ސްޕޭން ސެގްމަންޓު މިއަދު ޤާއިމު ކުރުމަކީ ލިބުނު ވަރަށް ބޮޑު ކާމިޔާބެއްކަން ފާހަގަ ކުރައްވާ އުންމީދަކީ މިހާރު ކަނޑައަޅާފައިވާ ތާރީޚުތަކަށް ބްރިޖުގެ މަސައްކަތް ނިންމުން ކަމަށް މިނިސްޓަރު އޮފް ކޮންސްޓްރަކްޝަން ހައުސިން އެންޑް އިންފްރާސްޓްރަކްޗާ ޑރ. އަބްދުﷲ މުއްޠަލިބު ވިދާޅުވެއްޖެ އެވެ.

ތިލަމާލެ ބްރިޖުގައި އެންމެ އުސް ޕްރީކާސްޓް ނެވިގޭޝަން ސްޕޭން ސެގްމަންޓު މިއަދު ޤާއިމު ކޮށްފައިވާކަން ހާމަކުރައްވާ އިންޑިއާ ހައި ކޮމިޝަނުން ވަނީ އެ ފޮޓޯތައް ހިއްސާކޮށްފަ އެވެ. އިންޑިއާގެ އެގްޒިމް ބެންކުގެ އެހީގައި ހަދަމުންދާ ތިލަމާލެ ބްރިޖުގައި މި ޤާއިމުުކުރި ޕްރީކާސްޓް ނެވިގޭޝަން ސްޕޭން ސެގްމަންޓަކީ މިހާތަނަށް ދުނިޔޭގައި ވެސް މިފަދަ އެންމެ އުސް ޕްރީކާސްޓް ކަމަށް އިންޑިއާ ހައިކޮމިޝަނުން ވަނީ ފާހަގަ ކޮށްފަ އެވެ.

މި ޕްރީކާސްޓްގެ އުސްމިނަކީ 8.2 މީޓަރެވެ. ފުޅާމިނަކީ 25.3 މީޓަރެވެ. މިއީ 216.04 މެޓްރިކް ޓަނުގެ ބަރުދަން ހުރި ޕްރީސްޓެއްކަން ފާހަގަކޮށް އިންޑިއާ ހައިކޮމިޝަނުން ވަނީ މިއީ އިންޖިނިއަރިންގެ ދާއިރާ އިން ހޯދުނު ބޮޑު ކާމިޔާބެއް އަދި ކުރިއެރުމެއްގެ ގޮތުގައި ފާހަގަ ކުރައްވާފަ އެވެ.

އެ ކާމިޔާބީ މިނިސްޓަރު މުއްތަލިބު ވެސް ފާހަގަ ކުރައްވާފަ އެވެ. އިންޑިއާ ހައިކޮމިޝަންގެ ޕޯސްޓް ރި-ޕޯސްޓް ކުރައްވާ މިނިސްޓަރު ވަނީ އުންމީދަކީ މިހާރު ކަނޑައަޅާފައިވާ ތާރީޚުތަކަށް ބްރިޖުގެ މަސައްކަތް ނިންމުން ކަމަށް ވިދާޅުވެފަ އެވެ.

އަދި އެ މަޝްރޫޢުގެ މަސައްކަތް ހަލުވި ކުރެއްވުމަށް ރާއްޖޭގައި ހުންނަވާ އިންޑިއާ ސަފީރު ބަލަސުބްރަމާނިއަމް ދެއްވާ ސަމާލުކަމާއި އަހަންމިއްޔަތު މިނިސްޓަރު ފާހަގަ ކުރެއްވި އެވެ. އެކަމަށް ޝުކުރު ވެސް އަދާކުރެއްވި އެވެ.

ތިލަމާލެ ބްރިޖް މަޝްރޫޢު ވަނީ ވަރަށް ބޮޑަށް ތާވަލުން ކަހާލާފަ އެވެ. އެ މަޝްރޫޢުގެ މަސައްކަތް ވަރަށް މަޑު ދުވެލީ ގައި ކުރިއަށް ދަނިކޮށް މަޝްރޫޢު ހަލުއިކުރެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޒަޢާމަތް ފެށުމާ އެކު އެވެ.

އެ މަޝްރޫޢު އަވަސް ކުރެއްވުމަށް ރައީސް ވަނީ އިންޑިއާގެ ވެރީންނާ އެކު މަޝްވަރާ ކުރައްވާފަ އެވެ.