އިނގިރޭސިވިލާތުގެ ލިވަޕޫލް ސިޓީގައި ދިރިއުޅޭ ދިވެހި ދަރިވަރުންނާ ބައްދަލުކުރައްވައި އެ ދަރިވަރުންގެ ކަންބޮޑުވުންތަކާއި ކުރިމަތިވާ މައްސަލަތަކަށް ހައްލުތަކެއް ހޯދައިދެއްވާނެ ކަމުގެ ޔަގީންކަން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ދެއްވައިފިއެވެ. 

ލިވަޕޫލަށް ރައީސް ކުރައްވާ ދަތުރުފުޅަކީ ދިވެހިރާއްޖޭގެ ފަތުރުވެރިކަން ޕްރޯޓުކުރުމަށް އެމްއެމްޕީއާރުސީއާއި ލަވަޕޫލުގެ މެދުގައި އެކުލަވައިލާފައިވާ އެއްބަސްވުމުގެ ދަށުން، ހިންގުމަށް ކަނޑައަޅާފައިވާ ކެމްޕޭނު އިފުތިތާހުކޮށްދެއްވުމަށް ކުރައްވަމުންދާ ދަތުރުފުޅެކެވެ. 

މި ހަރަކާތް ފެށުން އޮންނާނީ މިރޭ ލިވަޕޫލުގެ ދަނޑުގައި އެޓީމާއި އެވަޓަން ބައްދަލުކުރާ މާސޭސައިޑް ޑާބީ މެޗުގައެވެ. މި މެޗަކީ ޕްރިމިއާ ލީގުގެ އެންމެ ފޯރިގަދަ މެޗުތަކުގެ ތެރޭގައި ހިމެނޭ އެއް މެޗެވެ. 

މިއަދު ލިވަޕޫލުގައި ތިބޭ ދިވެހި ދަރިވަރުންނާ ބައްދަލުކުރައްވައި އެކުދިންގެ ތައުލީމާއި ދިރިއުޅުމާމެދު މަޝްވަރާކުރައްވައި، އެކުދިންގެ ތައުލީމީ ތަޖުރިބާތަކާއި، ބޭނުންތަކާއި ކަންބޮޑުވުންތައް ރައީސް އޮޅުންފިލުއްވާފައިވެއެވެ. 

އަދި ދަރިވަރުންނަށް ކުރިމަތިވެފައިވާ އެކި މައްސަލަތައް އޮޅުންފިލުއްވުމަށްފަހު އެކަންކަން ހައްލުކުރުމަށް ސަރުކާރުން މަސައްކަތްކުރާނެ ކަމުގެ ޔަގީންކަން ރައީސް ދެއްވިއެވެ. 

އަދި ދަރިވަރުންގެ އުންމީދުތަކާއި ކާމިޔާބުތަކާމެދު ފަހުރުވެރިވެވަޑައިގަންނަވާކަން ހާމަކުރައްވަމުން ރައީސްވަނީ ތައުލީމީ ދާއިރާއިން ކުރިމަތިވެފައިވާ ގޮންޖެހުންތައް ހައްލުކުރެއްވުމަށް އެމަނިކުފާނު އަޅުއްވަމުންދާ ފިޔަވަޅުތަކުގެ ތަފުސީލު ދަރިވަރުންނާ ހިއްސާކުރެއްވިއެވެ. 

ރައީސްގެ ދަތުރުފުޅުގެ ތެރެއިން ފެށިގެންދާ ޕްރޮމޯޝަން ކެމްޕެއިނަކީ ދުނިޔޭގެ މަތީ ފަންތީގެ ކުޅިވަރު ޓީމަކާ ގުޅިގެން ރާއްޖެ އިޝްތިހާރުކުރުމަށް އެމްއެމްޕީއާރުސީން މިހާތަނަށް ހިންގާ އެންމެ ބޮޑު ކެމްޕެއިނެވެ. ޕްރިމިއާ ލީގުގެ އިތުރަށް ޔޫރަޕުގެ ފުޓުބޯޅައިގެ ބޮޑު ބާރެއް ކަމުގައިވާ ލިވަޕޫލާއެކު ކުރިއަށްގެންދާ މި ހަރަކާތުގެ ސަބަބުން ކުރިން ރާއްޖެ ނޭނގޭ އެތައް މިލިއަން ބަޔަކަށް ދިވެހި ފަތުރުވެރިކަން އެނގިގެންދާނެއެވެ.