އިންޑިއާގައި މިއަދު ފެށި ސާބާ ކުލަބު ޗެމްޕިއަންޝިޕްގައި ކުޅުނު ފުރަތަމަ މެޗުން ރާއްޖޭގެ ޓީ-ރެކްސް ބާސްކެޓްބޯޅަ ކުލަބު މޮޅުވެއްޖެއެވެ.

ސަރަހައްދީ ހަ ގައުމުގެ ޗެމްޕިއަނުން ބައިވެރިވެފައިވާ މި މުބާރާތުގެ ކުޅުން ކުރިއަށްދާނީ މި މަހުގެ 2 އިން 7 ގެ ނިޔަލަށެވެ.

ޗެންނާއީގައި ހުންނަ ނެހްރޫ އިންޑޯ ސްޓޭޑިއަމްގައި ކުޅުނު މެޗުގައި ޓީ-ރެކްސް ވަނީ ބޫޓާންގެ ތިމްޕޫ މެޖިކްސް އަތުން 71-47 އިން މޮޅުވެފައެވެ.

މިއަދު ކުޅުނު އަނެއް މެޗުގައި ސްރީ ލަންކާގެ ކޮލަމްބޯ ބާސްކެޓްބޯޅަ ކުލަބުން ވަނީ ނޭޕަލްގެ ޓައިމްސް ކުލަބު ބަލިކޮށްފައެވެ. މި މެޗުން ކޮލަމްބޯ ބީސީ މޮޅުވީ 71-66 އިންނެވެ.

މި މުބާރާތުގައި ޓީ-ރެކްސް ދެން ކުޅޭ މެޗުގައި މާދަމާ ނުކުންނާނީ ކޮލަމްބޯ ބީސީއާ ދެކޮޅަށެވެ.