ENGLISH
03 އޭޕްރީލު 2025
އޯޓިޒަމްއާ މެދު ދިވެހިންގެ ހޭލުންތެރިކަން އިތުރު: ނޭޝަނަލް މެންޓަލް ހެލްތު
02 އޭޕްރީލު 2025
|
މެންޓަލް ހެލްތު ޑިޕާޓްމެންޓުގެ ޑިރެކްޓަރު އައިމިނަތު ޝަހުޒާ
އެންމެ މަޤްބޫލު
އޯޓިޒަމްއާ ގުޅިގެން ދިވެހިންގެ މެދުގައި ހޭލުންތެރިކަން މަޑުމަޑުން އިތުރުވަމުން އަންނަ ކަމަށާއި އެ ހެޔޮ ބަދަލު ފެންނަމުންދާ ކަމަށް ނެޝަނަލް މެންޓަލް ހެލްތު ޑިޕާޓްމެންޓުން ބުނެފި އެވެ.
އޯޓިޒަމަށް ހޭލުންތެރިކުރުވުމަށް ބައިނަލްއަގުވާމީ ގޮތުން ފާހަގަކުރާ ދުވަހާ ގުޅިގެން ވަނީ ކަމާ ގުޅޭ އިދާރާތަކުގެ ބޭފުޅުންނާ އެކު ޕެނަލް ޑިސްކަޝަން އެއް ކުރިއަށް ގެންގޮސްފަ އެވެ.
މި ޕެނަލް ޑިސްކަޝަންގައި ވާހަކަ ދައްކަވަމުން މެންޓަލް ހެލްތު ޑިޕާޓްމެންޓުގެ ޑިރެކްޓަރު އައިމިނަތު ޝަހުޒާ ވިދާޅުވީ އޯޓިޒަމްއާ ގުޅިގެން ނުވަތަ އޯޓިޒަމް ހުންނަ މީހުންނާ ގުޅިގެން ދިވެހިން ކުރިއަށްވުރެ ހޭލުންތެރިކަން ފާހަގަކުރެވިފަައިވާ ކަމަށެވެ.
ޙާއްސަ ގޮތެއްގައި އާ ޖީލުގެ ޒުވާނުން ނުވަތަ ކުދިން އަމިއްލައަށް އިސްނަގައިގެން އޯޓިޒަމްއާ ގުޅިގެން ދަސްކޮށް މައުލޫމާތު ހޯދުމަށް މަސައްކަތް ކުރާކަމަށް ވިދާޅުވި އެވެ.
"ހަމައެއާއެކު އަޅުގަނޑަށް ފާހަގަކުރެވެނީ މިހާރު އުފެދެމުން މި އަންނަ އާ ޖެނެރޭޝަންތަކުގެ ކުދިންނަށް ވެސް ހަމަ މައުލުމާތު އެ ކުދިން ވެސް އަމިއްލައަށް ހޯދައި، ތަފާތު ކުރުން ކަހަލަ ކަންތައްތަކަށް ވާހަކަދައްކާ ހަދާ. ރަނގަޅު ފާލެއް ކަމަށް އަޅުގަނޑު ބަލަނީ،" ޝަހުޒާ ވިދާޅުވި އެވެ.
މީގެ އިތުރުން ނިއުރޯޑިވެލޮޕްމެންޓަލް މައްސަލަތަކާއި އޯޓިޒަމް ހުންނަ މީހުންނާ ދޭތެރޭ އަމަލުކޮށް، އެމީހުންނާ މުޚާތަބުކުރާ ގޮތް ވެސް މިހާރު ބަދަލުވަމުންދާ ކަމަށް ޝަހުޒާ ވިދާޅުވި އެވެ.
އެހެންނަމަވެސް، މުޖުތަމައުން އޯޓިޒަމް ހުންނަ މީހާ އާ ގުޅުވައި ވާހަކަދެއްކޭ ގޮތާ މެދު ވެސް އިތުރަށް ވިސްނަން ޖެހޭ ކަން އޭނާ ފާހަގަކުރެއްވި އެވެ. އަދި އެކަހަލަ މީހުންނަށް ނިސްބަތްކޮށް ކުޑައިމީސްކޮށް ވާހަކަދެއްކުން ހުއްޓާލުމަަށް ހިތްވަރުދީ އަމިއްލައަށް ވެސް ހޭލުންތެރިވުމުގެ މުހިއްމުކަން އޭނާ ފާހަގަކުރެއްވި އެވެ.
ކޮންމެ އަހަރެއްގެ ވެސް އޭޕްރިލް މަހުގެ 2 ވަނަ ދުވަހަކީ ބައިނަލްއަގްވާމީ ގޮތުން ފާހަގަކުރާ އޯޓިޒަމަށް ހޭލުންތެރި ކުރުމުގެ ދުވަހެވެ. ރާއްޖޭގައި އޯޓިޒަމް އާއި އެއާ ގުޅުންހުރި އެހެން ޑިސްއޯޑާޒް ހުންނަ ކަމަށް 1200 އެއްހާ މީހުން ރެޖިސްޓްރީކޮށްފައިވާ ކަމަށް މި ޕެނަލް ޑިސްކަޝަންގައި ވަނީ ހާމަކޮށްފަ އެވެ.