އޯޓިޒަމް އާއި އެއާ ގުޅުންހުރި ޑިސްއޯޑާތަކަށް ރާއްޖޭގައި ރަޖިސްޓްރީކޮށްފައިވާ މީހުންގެ އާބާދީއަކީ ގާތްގަނޑަކަށް 1200 ކަމަށް އެންސްޕާގެ ތަފާސްހިސާބުތައް ދައްކާ ކަމަށް އައިޖީއެމްއެޗްގެ ކޮންސަލްޓެންޓް ސަބް ސްޕެޝަލިސްޓް އިން ޑިވެލޮޕްމަންޓަލް ޕީޑިއަޓްރިކްސް، ޑރ. އައިމިނަތު ފަޒްނާ ވިދާޅުވެއްޖެއެވެ. 

އޯޓިޒަމާއި ގުޅޭގޮތުން ހޭލުންތެރިކަން އިތުރުކުރުމަށް ބޭއްވި ޕެނަލް ޑިސްކަޝަންގައި ވާހަކަދައްކަވަމުން ޑރ. ފަޒްނާ ވިދާޅުވީ މިކަމާ ގުޅޭ ވަކި ރީސާރޗެއް ހެދިފައި ނުވާ ކަމަށެވެ. ނަމަވެސް އެންސްޕާގެ ތަފާސްހިސާބުތަކަށް ބަލާއިރު ރާއްޖޭގައި އޯޓިޒަމް ހުންނަ ކަމަށް ރަޖިސްޓަރކޮށްފައިވާ މީހުންގެ އާބާދީއަކީ ގާތްގަނޑަކަށް 1200 ކަމަށް ޑރ. ފަޒްނާ ވިދާޅުވިއެވެ.

ކޮންމެ އަހަރެއްގެ ވެސް އޭޕްރިލް މަހުގެ 2 ވަނަ ދުވަހަކީ ބައިނަލްއަގްވާމީ ގޮތުން ފާހަގަކުރާ އޯޓިޒަމަށް ހޭލުންތެރި ކުރުމުގެ ދުވަހެވެ.

ބައިނަލްއަގުވާމީ އޯޓިޒަމް ދުވަސް ފާހަގަކުރުމަށް ކަނޑައެޅީ 2007 ވަނަ އަހަރު އދ.ގެ އާއްމު މަޖިލީހުގެ ޖަަލްސާގައެވެ. އެ ދުވަސް ފާހަގަކުރުމުގެ ބޭނުމަކީ ބޮޑުވަމުން އަންނަ ސިއްހީ ކަންބޮޑުވުމަކަށްވާތީ އޯޓިޒަމާ ގުޅޭ ހޭލުންތެރިކަން އިތުރުކުރުމެވެ. 

މި ދުވަހާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެފައި ވަނީ ކޮންމެ ދިވެހި ދަރިއަކީ މި ގައުމަށް މުހިންމު އަގުހުރި ދަރިއެއް ކަމަށާއި، އޯޓިޒަމް ތަހައްމަލުކުރާ ކުދިންނަކީ ގައުމަށް މަންފާކޮށްދޭނެ އެތައް ހުނަރެއް ހުރި މޮޅު ކުދިން ކަމަށެވެ.