އިނގިރޭސިވިލާތުގެ މަޝްހޫރު ފުޓްބޯޅަ ކުލަބް، ލިވަޕޫލް އާއި މޯލްޑިވްސް މާކެޓިން އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރްސީ/ ވިޒިޓް މޯލްޑިވްސް) ގުޅިގެން ރާއްޖޭގެ ފަތުރުވެރިކަން އިޝްތިހާރު ކުރުމަށް ކުރިއަށްގެންދާ ކޯ-ބްރޭންޑް ކެމްޕޭނަށް ރައީސް މައުމޫން އަބްދުލްޤައްޔޫމް ތައުރީފް ކުރައްވައިފިއެވެ.

މިކަމަށް ރައީސް މައުމޫން ތައުރީފް ކުރައްވާފައި ވަނީ އެކްސްގައި ކުރެއްވި ޕޯސްޓެއްްގައެވެ.

މައުމޫން ވިދާޅުވި ގޮތުގައި އިނގިރޭސިވިލާތުގެ ލިވަޕޫލަކީ އެމަނިކުފާނު 1970 ގެ އަހަރުތަކުން ފެށިގެން ސަޕޯޓްކުރައްވަމުން އަންނަ ފުޓުބޯޅަ ކްލަބެކެވެ. ރައީސް މައުމޫން ވިދާޅުވީ، މިރޭ ލިވަޕޫލް-ވިޒިޓް މޯލްޑިވްސް ކެމްޕެއިން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ލޯންޗްކުރައްވާނެތީ އުފާ ކުރައްވާ ކަމަށެވެ. 

ލިވަޕޫލް އެފްސީގެ "އޮފިޝަލް ޓޫރިސްޓް ޑެސްޓިނޭޝަން ޕާޓްނަރު"ގެ ގޮތުގައި ރާއްޖެ ހަމަޖައްސައި އެމްއެމްޕީއާރްސީ އިން އެކަން ހާމަކުރީ މާޗް މަހުގެ 13 ވަނަ ދުވަހު އެވެ. މިއީ ރާއްޖޭގެ ފަތުރުވެރިކަމުގެ ބްރޭންޑް ވާސިލުވާ މިންވަރު އިތުރުކޮށް، ރާއްޖެއަށް ޒިޔާރަތްކުރުމަށް އިތުރު ފަތުރުވެރިންނަށް ހިތްވަރު ދިނުމުގެ ގޮތުން، ތިން އަހަރާއި ހަމަސް ދުވަހަށް ކުރިއަށް ގެންދާ ބައިނަލްއަގުވާމީ ކެމްޕޭނެއްގެ ފެށުމެވެ.

މި މަސައްކަތް އިތުރަށް ހަރުދަނާ ކުރުމަށް ލިވަޕޫޕް ޕާޓްނަޝިޕްގެ ދަށުން އެމްއެމްޕީއާރްސީ އިން ވަނީ މާޗް 27 ވަނަ ދުވަހު، އިނގިރޭސިވިލާތުގައި އައުޓްޑޯ ކެމްޕޭނެއްވެސް ފަށާފަ އެވެ.

އެގޮތުން މި ކެމްޕޭން ހަރަކާތް ފެށުމުގައި ބައިވެރިވެވަޑައިގަތުމަށް ރައީސް ޑރ. މުޢިއްޒު އިނގިރޭސިވިލާތުގެ ލިވަޕޫލް ސިޓީއަށް ރޭ ވަނީ ފުރާވަޑައިގެންފައެވެ.

ފަތުރުވެރިކަމުގެ ދާއިރާގައި މިފަދަ ބޮޑު ބްރޭންޑެއް ދިވެހިރާއްޖެއާ ގުޅުން ބަދަހިކުރުމަކީ ފަތުރުވެރިކަމަށް ލިބޭނެ ބޮޑު ކުރިއެރުމެއް ކަމަށް ފަތުރުވެރިކަމުގެ ދާއިރާގެ މާހިރުން ދެކެއެވެ. ހާއްސަކޮށް ލިވަޕޫލްގެ ފޭނުންގެ ތެރެއިން ގިނަ ބަޔަކު ދިވެހިރާއްޖެއަށް ޒިޔާރަތްކުރުމަށް ޝައުޤުވެރިވާނެ ކަމަށް ބެލެވެއެވެ. މި ކެމްޕެއިންގެ ސަބަބުން ކުރިއަށް އޮތް އަހަރުތަކުގައި ދިވެހިރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުވެ، އިގްތިސާދަށް ފައިދާކުރާނެ ކަމަށް އުންމީދުކުރެވެއެވެ.