ޤައުމީ ތަރައްޤީއަށް އިސްކަންދޭ ފަރާތްތަކާއި ދެމެހެއްޓެނިވި ތަރައްޤީގެ ލަނޑުދަނޑިތައް ހާސިލްކުރުމުގައި އޯޓިޒަމް ހުންނަ ފަރާތްތަކުގެ ދައުރު ވަރަށް ބޮޑުކަމަށް ފޮރިން މިނިސްޓަރ، ޑރ. އަބްދުﷲ ޚަލީލް ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި މިނިސްޓަރ ވިދާޅުވީ އޯޓިޒަމް ހުންނަ ފަރާތްތަކުގެ ދައުރު، ލަނޑުދަނޑިތައް ހާސިލްކުރުމުގައި މުހިންމު އަދި ބޮޑު ނަމަވެސް ތަފާތުކުރުމާއި، އެހެން މީހުންނެކޭ އެއްފަދައިން ޚިދުމަތްތައް ލިބުމުގައި ހުރަސްތައް އަދިވެސް އެބަހުރި ކަމަށެވެ.

ދުނިޔޭގެ އޯޓިޒަމް ހޭލުންތެރިކަމުގެ ދުވަހުގެ މުނާސަބަތުގައި، ނިއުރޯޑައިވަރސިޓީ ކުރިއެރުވުމަށް ޓަކައި ސިޔާސަތުތައް ކުރިއެރުވުމަށާއި، އެކްސެސިބިލިޓީ އާއި ހަމަހަމަކަން ކަށަވަރުކޮށް، އެންމެންނަށް ވެސް ރަނގަޅު، އިންކްލޫސިވް އަދި ދެމެހެއްޓެނިވި މުސްތަޤްބަލެއް ކަށަވަރުކޮށްދިނުމަށް މަސައްކަތް ކުރުމަށް މަގުފަހިކޮށްދޭ ކަމަށް ވިދާޅުވިއެވެ.

ބައިނަލްއަޤްވާމީގޮތުން ފާހަގަކުރާ އޯޓިޒަމް ދުވަހާ ގުޅިގެން ރައީސުްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެފައި ވަނީ ކޮންމެ ދިވެހި ދަރިއަކީ މި ގައުމަށް މުހިންމު އަގުހުރި ދަރިއެއް ކަމަށާއި، އޯޓިޒަމް ތަހައްމަލުކުރާ ކުދިންނަކީ ގައުމަށް މަންފާކޮށްދޭނެ އެތައް ހުނަރެއް ހުރި މޮޅު ކުދިން ކަމަށެވެ.