ހުއްޓިފައި ހުރި ހުރިހާ މަޝްރޫއުތައް މި މަހުގެ ނިޔަލަށް ފެށުމުގެ މަސައްކަތް ކުރައްވަމުންދާކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ރައީސް މިފަދައިން ވިދާޅުވެފައި ވަނީ "ރައްޔިތުންނާއެކު" މި ނަމުގައި ރައީސް އޮފީހުން ކުރިޔަށްގެންދާ ޕޮޑްކާސްޓްގެ ދެވަނަ އެޕިސޯޑުގައި ވާހަކަ ދައްކަވަމުންނެވެ.

ރައީސް ވިދާޅުވީ، ސިއްހީ ދާއިރާގެ ކުރިއެރުމަކީ ވަރަށްބޮޑު އިސްކަމެއްދީގެން ކުރިއަށްގެންދާ މަސައްކަތްތަކެއް ކަމަށެވެ. އެގޮތުން 10 މަޝްރޫޢެއްގައި ސޮއި ކުރި ވާހަކައަށް އަލި އަޅުއްވާލައްވަމުން ރައީސް ވިދާޅުވީ އަދި އެއީ މަދު ޢަދަދެއްކަމަށެވެ. ކުރިއަށް އޮތް ދުވަސްތަކުގައި ވަރަށްގިނަ ރަށްރަށުގައި، ވަރަށްގިނަ ހެލްތު ސެންޓަރުތަކާއި، ހޮސްޕިޓަލްތައް ހެދުމުގެ މަސައްކަތް ކުރެވިގެންދާނެކަމުގެ ޔަގީންކަން ވެސް ރައީސް ވަނީ ދެއްވާފައެވެ.

އެ ޓާގެޓް ހާސިލުކުރުމަށްޓަކައި މީޑިއާއިން ފެނިވަޑައިގަންނަވާނެ، ވަރަށްގިނަ މަޝްރޫޢުތަކުގައި މިދިޔަ ދެ ހަފްތާއެއްހާ ދުވަސްތެރޭގައި ސޮއިކުރެވެމުންދިޔަކަން. އެއީ، އެކަން އިނގޭތޯ މައިގަނޑު ގޮތެއްގައި. އާ މަޝްރޫޢުތަކުގައިވެސް ސޮއިކުރެވިފައި އެބަހުރި. އެކަމަކު އެކި ސަބަބުތަކާ ހެދި ނުހިނގާހުރި މަޝްރޫޢުތައް، ނުހިނގައިގެން އުޅޭ މައްސަލަތައް ޙައްލުކޮށްދީފައި، މިހާރު ކުރެވޭނެގޮތް މި ހެދީ." ރައީސް ވިދާޅުވިއެވެ. 

މިދިޔަ ދެ ހަފްތާ ތެރޭގައި ސޮއި ކުރެވިފައި ވަނީ، މައިގަނޑު ގޮތެއްގައި ހުއްޓިފައި ހުރި މަޝްރޫއުތަކުގެ އިތުރުން އައު މަޝްރޫއުތަކެއްގައެވެ. މަޝްރޫއުތައް ނުހިނގާ އުޅުނު ސަބަބު ދެނެގަނެ، އެ މައްސަލަ ހައްލުކޮށްދީފައިވާކަމަށް ރައީސް ވިދާޅުވިއެވެ.

އޭގެތެރޭގައި، ހޮސްޕިޓަލް އެޅުމާއި، ސިއްހީ މަރުކަޒު އެޅުމާއިި އެހެނިހެން ސިއްހީ ދާއިރާއާ ގުޅޭ މަޝްރޫއުތައް ހިމެނޭކަމަށް ރައީސް ވަނީ ފާހަގަކުރައްވާފައެވެ.