އިތުރު ވަގުތުގައި ވައްދާލި ލަނޑާއެކު، ފަހަތުން އަރައި 4-4 އިން ރެއާލް ސޮސިއެޑާޑާ އެއްވަރުކޮށް، ރެއާލް މެޑްރިޑް ކޮޕަ ޑެލް ރޭގެ ފައިނަލަށް ދަތުރުކޮށްފިއެވެ.

މި ނަތީޖާއާ އެކު، ދެ މެޗުގެ އެގްރިގޭޓުން ރެއާލް ކުރިހޯދީ 5-4 އިންނެވެ. މި ދެ ޓީމުގެ މެދުގައި ކުޅުނު ފުރަތަމަ ލެގުގެ މެޗުން ރެއާލް މޮޅުވީ 1-0 އިންނެވެ.

ރެއާލްގެ ދަނޑުގައި ކުޅުނު މެޗުގައި ލީޑު ނެގީ ސޮސިއެޑާޑުންނެވެ. މެޗުގެ 16 ވަނަ މިނެޓުގައި އެ ޓީމަށް މި ލަނޑު ޖަހައިދިނީ އެންޑާ ބަރެނެޓްޒެއާ އެވެ.

ފުރަތަމަ ހާފު ނިމުމުގެކުރިން، ރެއާލަށް އެއްވަރުކޮށްދިނީ އެންޑްރިކް އެވެ.

މެޗުގެ ފަހު ހާފުގައި ޑޭވިޑް އަލަބާ އަތުން ބައިކޮޅަށް ވަތް ގޯލަކާއި، މިކޭލް އޮޔާޒަބާލް ޖެހި ލަނޑުން ސޮސިއެޑާޑް އަލުން ލީޑު ނެގިއެވެ. އޭގެފަހުން، ރެއާލްގެ ޖޫޑް ބެލިންހަމް އާއި އައުރެލިއަން ޗުއަމެނީގެ ލަނޑުތަކުން އެއްވަރުކުރިއެވެ.

ނަމަވެސް، އޭގެފަހުން މެޗުގެ ފުރިހަމަ ވަގުތު ހަމަވެގެން ދެއްކި އިތުރު ވަގުތުގެ ތެރޭގައި އޮޔާޒަބާލް ޖެހި ލަނޑާއެކު، ސޮސިއެޑާޑު ވަނީ ދެ މެޗުގެ އެގްރިގޭޓުން 4-4 އިން އެއްވަރުކޮށްފައެވެ.

ރެއާލް މޮޅުކޮށްދިނީ، އިތުރު ވަގުތުގެ 15 މިނެޓުގެ ދެ ހާފުގެ ތެރެއިން ފަހު ހާފުގައި ޖަރުމަންގެ ޑިފެންޑަރު، އެންޓޯނިއޯ ރުޑިގާ އެވެ. 

މުބާރާތުގެ ފައިނަލުގައި ރެއާލް ކުޅެން ޖެހޭނީ ސެމީގެ ދެވަނަ ލެގުގެ މެޗުގައި މިރޭ ބާސެލޯނާއާ އެތުލެޓިކޯ މެޑްރިޑް ކުރެން މޮޅުވާ ޓީމަކާ އެވެ.