ENGLISH

03 އޭޕްރީލު 2025

Advertisement

ނޮވެންބަރު މަހު ފެށި ކުޑަކުދިންގެ އީއާރް؛ މިހާތަނަށް 10393 ކުދިން ހިދުމަތް ހޯދައިފި

02 އޭޕްރީލު 2025

|

ޝިފްޒާން އަޙްމަދު

ކުޑަކުދިންގެ އީއާރް ރައީސް ބައްލަވައިލެއްވުން، ފޮޓޯ: ރައީސް އޮފީސް

ފާއިތުވި އަހަރުގެ ނޮވެންބަރު މަހުގައި އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްޗް)ގައި ގާއިމުކުރި ކުޑަކުދިންނަށް ހާއްސަ އީއާރްއިން މިހާތަނަށް 10،393 ކުދިން ފަރުވާ ހޯދައިފިއެވެ. 

މިކަން ހާމަކުރެއްވީ ރައްޔިތުންނާ ގާތުން ސަރުކާރުގެ މަސައްކަތްތަކާ ގުޅޭ މައުލޫމާތު ފޯރުކޮށްދިނުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ގެނެސްދެއްވާ "ރައްޔިތުންނާއެކު" ޕޮޑްކާސްޓުގެ ދެވަނަ އެޕިސޯޑުގައި ދެއްކެވި ވާހަކަފުޅުގައެވެ. 

ރައީސް ވިދާޅުވީ އައިޖީއެމްއެޗްގެ ހިދުމަތުގެ ފެންވަރު ރަނގަޅުކުރުމަށް ފާއިތުވި މުއްދަތުގައި ސަރުކާރުން ގިނަގުނަ މަސައްކަތްތަކެއް ކޮށްފައިވާ ކަމަށެވެ. އެގޮތުން އެއް މަސައްކަތުގެ ގޮތުގައި ރައީސް ފާހަގަކުރެއްވީ އައިޖީއެމްއެޗްގައި މިޙާރު ހުޅުވާފައިވާ ކުޑަކުދިންގެ އީއާރްގެ މަސައްކަތެވެ. 

އެމަނިކުފާނުބ ވިދާޅުވީ ކުޑަކުދިންނަށް ހާއްސަ އީއާރްއެއް ގާއިމުކުރުމުގެ ސަބަބުން ވަރަށް ބޮޑެތި ލުއިތަކެއް ލިބިފައިވާ ކަމަށެވެ. އެގޮތުން މައި އީއާރަށް މީހުން އަންނަ މިންވަރު މަދުވެ ލުއިތަކެއް ލިބިފައިވާކަން ފާހަގަކުރައްވަމުން ރައީސް ވިދާޅުވީ ތުއްތު ކުދިންނާއި ސޯޅަ އަހަރުން ދަށުގެ ކުދިންނަށް ކުޑަކުދިންގެ އީއާރުގައި ހިދުމަތް ދޭން ފެށިފަހުން އެތަނުން 10،393 ކުދިން ހިދުމަތް ހޯދާފައިވާ ކަމަށެވެ. 

"ތުއްތު ކުދިންނާއި، 16 އަހަރުން ދަށުގެ ކުދިންނަށް ޚާއްޞަ އިމަރޖެންސީ ޚިދުމަތް ދޭން ފެށިފަހުން މިހާތަނަށް، އެއީ، މިދިޔަ ނޮވެންބަރުގައި އަޅުގަނޑުމެން ފެށީ އިނގޭތޯ. މިދިޔަ ނޮވެންބަރުގައި ފެށީ. ފަށައިގެން މިދިޔަ ގާތްގަނޑަކަށް ހަތަރު މަހެއްހާ ދުވަހުގެ ތެރޭގައި، ދިހަހާސް ތިންސަތޭކަ ނުވަދިހަ ތިން ކުދިން އެތަނުން ޚިދުމަތް ހޯދައިފި.،" ރައީސް ވިދާޅުވިއެވެ. 

އެމަނިކުފާނު ފާހަގަކުރެއްވީ މިހާ ގިނަ ކުދިންނަށް ކުޑަކުދިންގެ އީއާރުން ހިދުމަތް ދިނުމުގެ މާނައަކީ ކުރިން އެ ހިދުމަަތް ހޯދުމަށް އާއްމު އީއާރަށް ދާންޖެހުނު 10،393 ފަރާތަކަށް އެ ހިދުމަތް އެ އީއާރުން ބޭރުން ލިބިގެންދިއުން ކަމަށެވެ. 

ދަރުމަވަންތަ ހޮސްޕިޓަލުގައި ގާއިމުކޮށްފައިވާ ކުޑަކުދިންގެ އީއާރް ގާއިމުކުރީ މި ސަރުކާރުންނެވެ. އެއީ ކުރީ ސަރުކާރުން ރަސްމީކޮށް ނުހުޅުވައި ބަހައްޓާފައި ހުރި ދަރުމަވަންތަ ހޮސްޕިޓަލުގެ އިމާރާތުގެ ފެންވަރު ރަނގަަޅުކުރުަމށްފަހު އަލުން ހުޅުވުމަށްޓަކަައި ކުރި މަސައްކަތްތަކުގެ ތެރެއިން ސަރުކާރުން ނިންމާފައިވާ މަޝްރޫއެކެވެ. 

ކިޔުންތެރިންގެ ހިޔާލު