ޕްރިވެންޓިވެ ހެލްތް ކެއާއަށް މި ސަރުކާރުން ވަރަށް ބޮޑު އިސްކަމެއްދެެއްވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. 

"ރައްޔިތުންނާ އެކު" ޕޮޑްކާސްޓްގެ ދެވަނަ އެޕިސޯޑުގައި މިއަދު ވާހަކަފުޅުދައްކަވަމުން ރައީސް ވިދާޅުވީ ބަލިވިޔަ ނުދޭން މަސައްކަތްކުރުން މުހިންމު ކަމަށެވެ. އަދި މިކަމަށް މީގެކުރިން ދިވެހިންގެ ތެރޭގައި ސަމާލުކަން ދިންކަމަށާއި ނަމަވެސް މިހާރު އެއާދަ ގޮސްފައިވާކަމަށެވެ. 

ބަލިން ރައްކާތެރިވުމަށް ކުރެވުނު އެންމެ މުހިންމު އެއްކަމަކީ ޖީލެއް ދުންފަތުގެ އިސްތިއުމާލުކުރުމުން ދުރުހެލިކުރުވުން ކަމަށް ރައީސް ފާހަގަކުރެއްވިއެވެ. މީގެ އިތުރަށް، ތަރުކާރީއާ މޭވާ ގިނަކޮށް ހަކުރުގެ ބާވަތްތައް މަދުކުރުމުގެ މުހިންމުކަމަށް ވެސް އެމަނިކުފާނު އަލިއަޅުވާލެއްވިއެވެ. ހަމައެހެންމެ ދުޅަހެޔޮ ސިއްހަތަކަށް މުހިންމު ވާނޭ ރަނގަޅު ކާނާތައް ރައްޔިތުންނަށް ލިބޭނެ އިންތިޒާމު ހަމަޖައްސަވައިދެއްވާނެ ކަމަށް ރައީސް ވިދާޅުވިއެވެ. 

ދިވެހި މުޖުތަމައުގައި މިހާރު ދިރިއުޅުމުގެ އާދަތަކާއި ގުޅިފަހުންނަ ބަލިތައް ގިނަކަން ރައީސްގެ ވާހަކަފުޅުގައި ފާހަގަކުރެއްވިއެވެ. އެގޮތުން ކެންސަރާ ގައިންގަޔަށް އަރާ ބަލިތަކާ ވާރުތަކުރާ ބަލިތައް ހުންނަކަމަށާއި، އެހެންނަމަވެސް އެތައް ބަލިތަކުން ދުރުވެވޭނެ ގޮތްތައް ފަހިވެފައިވާކަމަށް ރައީސް ވިދާޅުވިއެވެ.

މިކަންތައް ފާހަގަކުރައްވަމުން ރައީސް ވިދާޅުވީ މިހާރު ތޮށިލުމުގެ މަޝްރޫތައް ހިންގާ އިރުގައި މޫދުލާފަ ހަދައިދެމުންގެންދާ ކަމަށެވެ. މޫދު ކަސްރަތަކީ ހަށިގަނޑަށް ވަރަށް ފައިދާހުރި ކަމެއްކަމަށް ރައީސް ފާހަގަކުރެއްވިއެވެ.

ހަމައެހެންމެ މި އަންނަ އަހަރުގެ ނިޔަލަށް މީހުން ދިރިއުޅޭ ހުރިހާ ރަށެއްގައި އައުޓްޑޯ ޖިމެއް ހުޅުވާނެކަމަށް ރައީސް ވިދާޅުވިއެވެ.