ENGLISH
03 އޭޕްރީލު 2025
މި މަސް ނިމެންވާއިރަށް ތެލެސީމިއާ ސެންޓަރ އޮރެންޖް ހިޔާއަށް ބަދަލު ކުރަނީ
02 އޭޕްރީލު 2025
|
ރައީސް "ރައްޔިތުންނާއެކު" ޕޮޑްކާސްޓްގެ ދެވަނަ އެޕިސޯޑްގައި ވާހަކަފުޅު ދައްކަވަނީ-- ފޮޓޯ/އެމްއެމްޓީވީ
އެންމެ މަޤްބޫލު
މި ހިނގާ އޭޕްރިލް މަސް ނިމުމުގެ ކުރިން ތެލެސީމިއާ ސެންޓަރ އޮރެންޖް ހިޔާއަށް ބަދަލުކޮށް ނިމޭނެކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވެފައި ވަނީ "ރައްޔިތުންނާއެކު" މި ނަމުގައި ރައީސް އޮފީހުން ކުރިޔަށް ގެންދާ ޕޮޑްކާސްޓްގެ ދެވަނަ އެޕިސޯޑުގައި ވާހަކަފުޅު ދައްކަވަމުންނެވެ.
އޮރެންޖް ހިޔާގައި ތެލެސީމިއާ ސެންޓަރު ގާއިމުކުރުމުގެ މަސައްކަތުގެ އަދާހަމަ ދެއްވަމުން ރައީސް ވިދާޅުވީ، އެތަނުގެ މަސައްކަތްތައް ކުރައްވަމުން ގެންދަވަނީ ސިފައިންކަމަށެވެ. ތަނުގެ މަސައްކަތް މި މަހުގެ 30 ވަނަ ދުވަހުގެ ކުރިން ނިންމުމަށް ސިފައިންނަށް ދަންނަވާފައިވާނެކަމަށް ވެސް ރައީސް ވިދާޅުވިއެވެ.
"މިހާރު ސިފައިން ފެށީ، ހުޅުމާލޭގައި އޮރެންޖް ހިޔާ ބިލްޑިންގ ގައި ތެލެސީމިއާ ސެންޓަރު ބަދަލުކުރަން ލިބުނު ފްލޯ، ހެދުމުގެ މަސައްކަތް މިހާރު ދެން އަޅުގަނޑު ސިފައިންނަށް ދިން ޑެޑްލައިން އަކީ އެއް މަސް ދުުވަސް. ސިފައިންނަށް އަޅުގަނޑު ދެންނެވީ ހުއްޓާ ނުލައި ރެޔާއި ދުވާލު މަސައްކަތް ކުރައްވާށޭ" - ރައީސް ޑރ.މުހައްމަދު މުއިއްޒު
ރައީސް ވިދާޅުވީ، މިހާރު ހުރި ތެލެސީމިއާ ސެންޓަރަށް ވުރެ އޮރެންޖް ހިޔާގައި ގާއިމުކުރާ ތެލެސީމިއާ ސެންޓަރުގެ މާހައުލު ވަރަށް ހިތްގައިމުވާނެކަމަށެވެ. މި މަހުގެ ކުރިން އެތަނުގެ މަސައްކަތްތައް ނިންމުމުން، ތެލެސީމިއާ ސެންޓަރުގެ ހިދުމަތްތައް ބަދަލުކުރުމުގެ މަސައްކަތް ވެސް ކުރު މުއްދަތެއްގެ ތެރޭގައި ކުރެވިގެންދާނެކަމަށާއި އޭގެ ސަބަބުން ހިދުމަތްތަކުގެ ފެންވަެރު ވެސް އިތުރަށް ރަނގަޅުވެގެންދާނެކަމަށް ވެސް ރައީސް ފާހަގަކުރެއްވިއެވެ.
މީގެއިތުރުން އެމަނިކުފާނު ވިދާޅުވީ ޑީއެންއޭ ޓެސްޓް ހެދުމަށް ބޭނުންކުރާ މެޝިންތަކާއި އިތުރު ފްރިޖްތައް ހޯދުމަށް މިހާރު މަސައްކަތްތައް ކުރެވުމުންދާކަމަށެވެ. އަދި ފުލްޓައިމްގައި މަސައްކަތް ކުރާ ސީނިއާ ފިޒިޝަނެއް ވެސް މިހާރު މަސައްކަތް ކުރަން ފަށާފައިވާކަމަށާއި އެއީ މީގެކުރިން ނުވެ އޮތްކަމެއްކަމަށް ރައީސް ވިދާޅުވިއެވެ.
ތެލެސީމިއާ ސެންޓަރުގެ ހާލަތު ދަށްކަމަށާއި އެތަނުގެ ހިދުމަތްތަކުގެ ފެންވަރު ރަނގަޅު ނޫންކަމަށް ބުނެ އިހުތިޖާޖު ކުރުމުމުގެ ސަބަބުން ރައީސް މުއިއްޒު ވަނީ ތެލެސީމިއާ ސެންޓަރަށް ވަޑައިގެން އެތަނުގެ ހާލަތު ގާތުން ބައްލަވާލައްވާފައެވެ. އަދި އެ ތަނުން ދެމުން އަންނަ ހިދުމަތުގެ ފެންވަރު ރަނގަޅު ކުރުމަށްޓަކައި ގިނަ ގުނަ މަސައްކަތްތަކެއް ވެސް ކުރައްވާފައިވެއެވެ.
ތެލެސީމިއާ ސެންޓަރ ހުޅުމާލޭގެ އޮރެންޖް ހިޔާއަށް ބަދަލު ކުރުމުގެ މަސައްކަތްތައް ކުރިއަށްދާއިރު، "ރައްޔިތުންނާއެކު" ޕޮޑްކާސްޓްގެ ފުރަތަމަ އެޕިސޯޑްގައި ރައީސް ވަނީ އެތަނަށް ތެލެސީމިއާ ޕޭޝަންޓާއި އޭނާގެ އެހީތެރިޔާއަށް އެމްޓީސީސީ ބަހުގައި ހިލޭ ދަތުރުކުރެވޭނެ ނިޒާމެއް ގާއިމުކޮށްދެއްވާނެކަމަށް ވިދާޅުވެފައެވެ.