ދުންފަތުގެ ބާވަތްތައް ރާއްޖެއަށް އެތެރެކޮށް ވިއްކާ މީހުން އެތަކެތީގެ ވިޔަފާރި ހުއްޓާލައި އެހެން ކަމެއް ކުރުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އިލްތިމާސްކުރައްވައިފިއެވެ. 

ރައީސް މިފަދައިން ވިދާޅުވީ ރައްޔިތުންނަށް މައުލޫމާތު ހިއްސާކުރެއްވުމަށާއި، ރައްޔިތުންގެ ޚިޔާލާއި ސުވާލުތަކަށް ޖަވާބުދެއްވުމަށް އެމަނިކުފާނު ކުރިއަށްގެންދަވާ "ރައްޔިތުންނާ އެކު" ޕޮޑްކާސްޓުގައި ދުންފަތުގެ ވަބާއިން ދިވެހި މުޖުތަމައު ސަލާމަތްކުރެއްވުމަށް އެމަނިކުފާނު އަޅުއްވަމުންދާ ފިޔަވަޅުތަކާ ގުޅޭ ގޮތުން ވާހަކަދައްކަވަމުންނެވެ. 

އެ މައުޟޫޢުގައި ރައީސް ވިދާޅުވީ ވަކި އުމުރަކުން ދަށުގެ މީހުންނަށް ދުންފަތުގެ ބާވަތްތައް ވިއްކުން މަނާކުރުމާމެދު ސަރުކާރުން ދެތިން ވިސްނުމެއް ގެންގުޅުއްވާ ކަމަށެވެ. އެ ވިސްނުންފުޅުތަކުގެ ތަފުސީލުތައް ރައީސް މިއަދު ހިއްސާކުރެއްވިއެވެ. 

ރައީސް ހުށަހެޅުއްވި އެއްގޮތަކީ 2007 ވަނަ އަހަރުގެ ޖަނަވަރީ އެކެއްގެ ފަހުން އުފަންވި މީހުންނަށް ދުންފަތުގެ ބާވަތްތަައް ވިއްކުން މަނާކުރުމާއި، 2004 ވަނަ އަހަރުގެ ޖަނަވަރީ އެކެއްގެ ފަހުން އުފަންވި މީހުންނަށް ދުންފަތުގެ ބާވަތްތައް ވިއްކުން މަނާކުރުމާއި، 2000 ވަނަ އަހަރުގެ ޖަނަވަރީ އެއްވަނަ ދުވަހުގެ ފަހުން އުފަންވި އެއްވެސް މީހަކަށް ދުންފަތުގެ ބާވަތް ވިއްކުން މަނާކުރުމެވެ. 

ރައީސް ފާހަގަކުރެއްވީ 18 އަހަރާއި 25 އަހަރާ ދެމެދުގެ ޒުވާނުން ދުންފަތުގެ ވަބާއިން ސަލާމަތްކުރުމަކީ އުމުރުން ދޮށިވެފައިވާ މީހުން ދުންފަތުގެ ބާވަތްތަކުން ދުރުކުރުމަށްވުރެ ފަސޭހައިން ކުރެވޭނެ ކަމެއްގެ ގޮތުގައެވެ. 

ދުންފަތުގެ ބާވަތްތަކުގެ އަގު ބޮޑުކުރެއްވި ސަބަބަށް އަލިއަޅުވައިލައްވަމުން ރަައީސް ވިދާޅުވީ އެތަކެތީގެ ޑިއުޓީ ބޮޑުކުރެއްވުމަށް ނިންމެވީ މީހުން އެ ތަކެއްޗާ ދުރުކުރެއްވުމުގެ ބޭނުމުގައި ކަމަށެވެ. އަދި މިފަދަ ކަމަކުން މީހުން ދުރުކުރުމަށްޓަކައި ފަަހަރަކު ތަންކޮޅަކުން ޓެކްސް ބޮޑުކުރަމުންދިއުމަކީ ކުރެއްވޭނެ ކަމެއް ނޫންކަމަށްވެސް އެމަނިކުފާނު ވިދާޅުވިއެވެ. 

ރައީސް އިތުރަށް ވިދާޅުވީ ސިނގިރެޓު އެތެރެކޮށް އޭގެ ވިޔަފާރިކުރާ ފަރާތްތަކުގެ ކިނބައިން އެމަނިކުފާނު އެދިވަޑައިގަންނަވަނީ އެ ވިޔަފާރި ހުއްޓައިލުން ކަމަށެވެ. އެމަނިކުފާނު ފާހަގަކުރެއްވީ މި ރާއްޖޭގެ އާބާދީގެ ކުޑަކަމަށް ބަލައި ރާއްޖެ އެކަމުން ސަލާމަތްކުރަން އުޅުމަކީ މާ ރަނގަޅު ކަމެއްގެ ގޮތުގައެވެ. 

ރައީސް އިތުރަށް އެދިވަޑައިގެންފައިވަނީ ރައްޔިތުންގެ ސިއްހަތާ ގުޅުންހުރި ކަންކަން ސިޔާސީ ނުކުރުމަށެވެ. ސިނގިރޭޓު ވިޔަފާރިކުރުމުގައި އެންމެ ބޮޑަށް މަޝްޣޫލުވެގެން އުޅެނީ އިދިކޮޅު ވިސްނުމުގެ މީހުންކަން ފާހަގަކުރައްވައި ރައީސް ވިދާޅުވީ އެ ވިޔަފާރިވެރިން އިދިކޮޅުގެ މުޒާހަރާތަކަށް މާލީ ގޮތުންވެސް އެހީތެރިވެދެމުންދާ ކަމަށެވެ. 

ވަަކި އުމުރަކުން ދަށުގެ މީހުންނަށް ދުންފަތުގެ ބާވަތްތައް ނުގަނެވޭ ގޮތަށް ދުނިޔޭގެ ވަރަށް ގިނަ ގައުމުތަކުގައި ގާނޫނުތައް ހަދާފައި ހުރެއެވެ. އެ ފިޔަވަޅުތަކާއެކު ޒުވާނުން ދުންފަތުގެ ބާވަތްތައް ބޭނުންކުރާ މިންވަރު ވަރަށް ބޮޑަށް މަދުވެގެންދެއެވެ.