މި އަހަރުގެ ފިތުރު ޒަކާތުގެ ގޮތުގައި ލިބުނު ފައިސާ އިން، ގާޒާގެ ކުޑަކުދިންނަށް ދިނުމަށް ނިންމި ބައި މިލިއަން ރުފިޔާ އިސްރާ އެސޯސިއޭޝަނާ ހަވާލުކޮށްފިއެވެ. 

އިސްލާމިކް މިނިސްޓަރީގެ ޑިޕިއުޓީ މިނިސްޓަރު އަލީ އަހްސަން ވިދާޅުވީ އެ ފައިސާ އެ ޖަމިއްޔާއާ މިދިޔަ އާދިއްތަ ދުވަހު ހަވާލުކޮށްފައިވާ ކަމަށެވެ.  ޒަކާތުގެ ގޮތުގައި ލިބުނު ފައިސާ އިން ގާޒާގެ ކުޑަކުދިންގެ ކާބޯތަކެއްޗަށް ފަސް ލައްކަ ރުފިޔާ ހަރަދުކުރަން ނިންމާފައިވާ ކަމަށް އިސްލާމިކް މިނިސްޓަރ ޑރ. މުޙައްމަދު ޝަހީމް އަލީ ސައީދު އިއުލާން ކުރެއްވީ ނިމިދި ރޯދަ މަހު އެވެ. 

ފިތުރު ޒަކާތުގެ ގޮތުގައި މި އަހަރު ބަހާފައިވަނީ 12.4 މިލިއަން ރުފިޔާ އެވެ. އެއީ ފަގީރުންގެ ދަފްތަރުގައި ތިބި 2،765 މީހުންގެ ތެރެއިން ކޮންމެ މީހަކަށް 4،500ރ. އެވެ. ގޮވާމުން ލިބުނު ޒަކާތް، މާލެ ސަރަހައްދުގެ ކޮންމެ ފަގީރަކަށް 15 ކިލޯ ދީފައިވެ އެވެ.

އިޖުތިމާއީ އަދާލަތު ގާއިމުކުރުމަށް ސަރުކާރުން ވަނީ ހުރިހާ ފަގީރުންނަށް ވެސް އެއްވަރަކަށް ޒަކާތް ބަހާފަ އެވެ.

މީގެ ކުރިން، ޒަކާތް ބެހީ އެ ރަށަކުން ލިބޭ އެއްޗެއް، އެ ތަނެއްގެ ފަގީރުންގެ ލިސްޓުގައި ތިބި މީހުންނަށެވެ. އެގޮތަށް ހެދުމުން، ބައެއް ރަށްރަށުގައި ޒަކާތުގެ ގޮތުގައި ވަރަށް ބޮޑު އެއްޗެއް ފަގީރުންނަށް ލިބެ އެވެ.