ENGLISH

03 އޭޕްރީލު 2025

Advertisement

އައިޖީއެމްއެޗްގެ 75 އެނދުގެ އާ ވޯޑް އަންނަ މަހު ހުޅުވަނީ

02 އޭޕްރީލު 2025

|

އާމިނަތު މައިހާ

"ރައްޔިތުންނާ އެކު" ޕޮޑްކާސްޓްގެ ތެރެއިން ރައީސް ވާހަކަދައްކަވަނީ

އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް)ގެ 75 އެނދުގެ އާ ވޯޑް އަންނަ މެއި މަހު ހުޅުވަން ނިންމާފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. 

ރައީސް މިފަދައިން ވިދާޅުވެފައި ވަނީ "ރައްޔިތުންނާ އެކު" މި ނަމުގައި ރައީސް އޮފީހުން ކުރިއަށްގެންދާ ޕޮޑްކާސްޓްގެ ދެވަނަ އެޕިސޯޑުގައި ވާހަކަފުޅު ދައްކަވަމުންނެވެ. 

އެމަނިކުފާނު ވިދާޅުވީ އެނދުގެ ޖާގަ އިތުރުވުމުން ހޮސްޕިޓަލުން އެނދު ލިބުން ފަސޭހަވެ، ހިދުމަތް ހޯދާ ފަރާތްތަކަށް ލުޔަކަށްވާނެކަމަށެވެ. މިއީ ޖާގައިގެ ދަތިކަމަށް ލިބިގެންދާނެ ހައްލެއްކަމަށް ވެސް ވާހަކަފުޅުގައި ފާހަގަކުރެއްވިއެވެ. 

އެގޮތުން މި ވޯޑުގައި ޖެނެރަލް ވޯޑުގެ 44 އެނދާއި، ހައި ޑިޕެންޑެންސީ (އެޗްޑީޔޫ)ގެ 15 އެނދާއި އަދި ޕްރައިވެޓް 14 ޔުނިޓު ހިމެނެއެވެ. މީގެ އިތުރުން ކުޑަކުދިންނަށް ހާއްސަ އެމަޖެންސީ ރޫމެއް ހަދާފައިވާކަމަށް ރައީސް ފާހަގަކުރެއްވިއެވެ. 

"ކުޑަކުދިންނަށް ހާއްސަ އީދާރެއް ހެދީމަ ވަރަށް ބޮޑުތަނުން އެބަ ފަސޭހަވެގެންދޭ މެއިން އީއާރު އަށް، ތުއްތު ކުދިންނާ 16 އަހަރުން ދަށުގެ ކުދިންނަށް ހާއްސަ އެމަޖެންްސީ ހިދުމަތް މިދިޔަ ނޮވެމްބަރު މަހު ދޭންފެށިފަހުން، މިހާތަނަށް 10،393 ކުދިން އެތަނުން ހިދުމަތް ހޯދައިފި. މާނައަކީ އެހެން ނޫންނަމަ އާންމުން ވެސް ދާ އީއާރު އަށް މިކުދިން ވެސް ދާނެ ޖެހޭނީ. " - ރައީސް، ޑރ. މުޙައްމަދު މުޢިއްޒު 

މި އީއާރުގެ ހާއްސަ ކަންތައްތައް ފާހަގަކުރައްވަމުން ރައީސް ވިދާޅުވީ މިތަނަކީ ކުދިން ހިތްގައިމުވާ، ގަޔާވާގޮތަށް ހަދާފައިވާ ތަނެއްކަމަށާއި، އަދި ކުޑަކުދިންނަށް ހާއްސަ ޑޮކްޓަރުން ތިބޭނެކަމެވެ. މިކަމުގެ ސަބަބުން ކުޑަކުދިންނަށް ހާއްސަ ސަމާލުކަމެއްދެވި ބެލެނިވެރިންނަށް ވެސް ހިތްހަމަޖެހުން ލިބިގެންދާކަމެއް ކަމަށް ރައީސް ފާހަގަކުރެއްވިއެވެ.

ހަމައެހެންމެ ކުޑަކުދިންނަށް އަވަހަށް ހިދުމަތްދެވި ކުދިންގެ ސިއްހަތު ސަލާމަތްކުރެވި، ރަނގަޅު ބޭސް އަވަހަށް ފޯރުކޮށްދިނުމަށް މަގުފަހިވެގެންދެއެވެ. އަދި އެހެން ބަލިތަކުގެ މީހުންނާ ދުރަށް ގެންދެވި، އެހެން ބަލިތައް ޖެހުމުން ދުރުހެލިކޮށްދެއެވެ.   

އައިޖީއެމްއެޗްގެ އިތުރުން ހުޅުމާލެ އާއި ވިލިމާލޭގެ ހޮސްޕިޓަލް ވެސް ފެންވަރު ރަނގަޅުކޮށް ހިދުމަތްތައް އިތުރުކުރުމުގެ މަސައްކަތް ކުރެވެމުންދާ ކަމަށް ރައީސް ޑރ. މުޙައްމަދު މުޢިއްޒު ވިދާޅުވިއެވެ. 

ކިޔުންތެރިންގެ ހިޔާލު