އޯޓިޒަމް ތަހައްމަލުކުރާ ކުދިންނަކީ ގައުމަށް މަންފާކޮށްދޭނެ އެތައް ހުނަރެއް ހުރި މޮޅު ކުދިންކަމަށް ރައީސް ޑރ.މުހައްމަދު މުއިއްޒު ވިދާޅުވެއްޖެއެވެ.

ރައީސް މިފަދައިން ވިދާޅުވެފައި ވަނީ ބައިނަލްއަޤުވާމީ ގޮތުން ފާހަގަކުރާ އޯޓިޒަމަށް ހޭލުންތެރިކުރުވުމުގެ ދުވަހު އެކްސްގައި ކުރެއްވި ޕޯސްޓެއްގައެެވެ.

ރައީސް ވިދާޅުވީ، ކޮންމެ ދިވެހި ދަރިއަކީ މި ގައުމަށް މުހިންމު އަގުހުރި ދަރިއެއްކަމަށެވެ. އޯޓިޒަމް ތަހައްމަލު ކުރާ ކޮންމެ ކުއްޖަކީ ވެސް ގައުމަށް މަންފާކޮށްދޭނެ އެތަށް ހުނަރެއް ހުރި މޮޅު ކުދިންކަމަށް ވެސް ރައީސް ވިދާޅުވެއެވެ.

އެ ކުދިންނަށް އަޅާލުމާއި ލޯބިދިނުމަކީ ވެސް ގައުމީ ވާޖިބެއް ކަމަށް ރައީސްގެ ޕޯސްޓްގައި ފާހަގަކުރައްވާފައިވެއެވެ.

ކޮންމެ އަހަރެއްގެ ވެސް އޭޕްރިލް މަހުގެ 2 ވަނަ ދުވަހަކީ ބައިނަލްއަގްވާމީ ގޮތުން ފާހަގަކުރާ އޯޓިޒަމަށް ހޭލުންތެރި ކުރުމުގެ ދުވަހެވެ.

ބައިނަލްއަގުވާމީ އޯޓިޒަމް ދުވަސް ފާހަގަކުރުމަށް ކަނޑައެޅީ 2007 ވަނަ އަހަރު އދ.ގެ އާއްމު މަޖިލީހުގެ ޖަަލްސާގައެވެ. އެ ދުވަސް ފާހަގަކުރުމުގެ ބޭނުމަކީ ބޮޑުވަމުން އަންނަ ސިއްހީ ކަންބޮޑުވުމަކަށްވާތީ އޯޓިޒަމާ ގުޅޭ ހޭލުންތެރިކަން އިތުރުކުރުމެވެ.