ފިޠުރު ޢީދުގެ މުނާސަބަތުގައި ބާއްވާ "ޢީދު ބައިބަލާ ޗެލެންޖް 1446" ހުޅުމާލޭގައި ރޭ ފަށައިފިއެވެ.

މިއީ ހުޅުމާލޭގައި މި މުބާރާތް ބާއްވާ ތިންވަނަ ފަހަރެވެ. އޭގެކުރިން 25 ފަހަރު މުބާރާތް ބޭއްވީ މާލޭގަ އެވެ.

ޖުމްލަ 29 ޓީމު ބައިވެރިވެފައިވާ މި އަހަރުގެ މުބާރާތުގައި މިފަހަރު މެޗުތައް ކުރިއަށްދަނީ ނޮކްއައުޓް އުސޫލުންނެވެ. 

ހުޅުމާލޭ ސެންޓްރަލް ޕާކް ސަރަހައްދުގައި ކުރިއަށްދާ މި އަހަރުގެ މުބާރާތުގައި ރޭ ވަނީ ހަ މެޗެއް ކުޅެފައެވެ.

މުބާރާތުގައި ކުޅުނު ފުރަތަމަ މެޗުގައި އެންމެ ފަހުގެ ޗެމްޕިއަން، ބުރު ސްޕޯޓްސް ކުލަބު ސީދާ ދެ ގޭމުން ބަލިކޮށް، ޓީއެފްޓީން ވަނީ ގަދަ 16 ގެ ބުރުން ޖާގަ ހޯދައިފައެވެ.

ދެވަނަ މެޗުގައި ޓީއެފްޓީ ވަކަރުގެއިން ވަނީ ސީދާ ދެ ގޭމުން ދަ ބައުސް ސްޕޯޓްސް ކުލަބު ބަލިކޮށްފައެވެ. 

އެންމެ ފަހުގެ މުބާރާތުގެ ރަނަރަޕް، ކުލަބު ކާސިންޖީން ވަނީ ކުލަބު އޯވަންއޯގެ މައްޗަށް ސީދާ ދެ ގޭމުން ކުރިހޯދާ ގަދަ 16 ގެ ބުރަށް ދަތުރުކޮށްފައެވެ. މުބާރާތުގެ ހަތަރުވަނަ މެޗުގައި ގަދަހިފުމަކުން ލިޓްލް ޓައުން ބަލިކޮށް، ޖަނަވަރީމަގު ސްޕޯޓްސް ކުލަބު ވެސް ވަނީ ގަދަ 16 ގެ ބުރުން ޖާގަ ހޯދައިފައެވެ.

މި މުބާރާތުގައި ރޭ ކުޅުނު ފަސްވަނަ މެޗުގައި ބީޖީ ނިއު ޖެނެރޭޝަން ވަނީ ގަދަ ހިފުމަކަށްފަހު ކުޑަ ހެންވޭރު ޔުނައިޓެޑް ބަލިކޮށްފައެވެ. އަދި، ރޭގެ ފަހު މެޗުގައި ސީދާ ދެ ގޭމުން ކާސިންޖާ ބަލިކޮށް، އެލްޓީ ސްޕޯޓްސް ކުލަބު ވަނީ ގަދަ 16 ގެ ބުރަށް ދަތުރުކޮށްފައެވެ.