ފ. ނިލަންދޫގެ ނަރުދަމާ ނިޒާމުގެ ފެންވަރު މަތިކުރުމުގެ މަސައްކަތް އަންނަ މެއި މަހު ފެށޭނެ ކަމަށް އެމްޑަބްލިޔުއެސްސީގެ މެނޭޖިންގ ޑިރެކްޓަރ ޢަބްދުލްމަޠީން މުޙައްމަދު ވިދާޅުވެއްޖެއެވެ.

އަބްދުލްމަޠީން މިހެން ވިދާޅުވެފައިވަނީ، ނިލަންދޫގެ ނަރުދަމާ ނިޒާމުގެ މައްސަލަ ޖެހި އޭގެ ސަބަބުން ކުރިމަތިވާ ދަތިތަކާ ގުޅޭގޮތުން ކަންބޮޑުވުން ފާޅުކޮށް، އެކަން ހައްލުކޮށްދެއްވުމަށް އެދި އެރަށު ރައްޔިތަކު އެކްސްގައި ކުރި ޕޯސްޓަކާ ގުޅިގެން ދެއްވި ޖަވާބުގައެވެ.

އެކްސް ޕޯސްޓެއްގައި އެމްޑީ ޢަބްދުލްމަޠީން ވިދާޅުވީ ނިލަންދޫގައި މިހާރު ޤާއިމުކޮށްފައި ވަނީ ވެކިއުމް ނަރުދަމާ ނިޒާމެއް ކަމަށާއި މިފަދަ ނިޒާމުތަކަކީ ކުދި ހޮޅިތަކެއް މެދުވެރިކޮށް، ސެންޓްރަލް ޕްލާންޓަކަށް ނަޖިސް ދަމާ، އެ ޕްލާންޓުން ނަޖިސް ބޭރުކުރާ ގޮތަށް ފަރުމާކޮށްފައި ހުންނަ ނިޒާމެއް ކަމަށެވެ.

އެހެން ކަމުން ނިލަންދޫގެ ނަރުދަމާގެ މައްސަލަ ޙައްލުކުރުމަށް، މުޅިން އައު ޒަމާނީ ނިޒާމެއް ތައާރަފްކުރަން ނިންމާފައިވާ ކަމަށް މޯލްޑިވްސް ވޯޓަރ އެންޑް ސުވަރޭޖް ކޮމްޕެނީ ލިމިޓެޑް އެމްޑަބްލިއުއެސްސީން ވަނީ ނިންމަވާފައެވެ.

އަލަށް ޤާއިމުކުރުމަށް ހަމަޖެހިފައި ވަނީ ގްރެވިޓީ ނަރުދަމާ ނިޒާމެއްކަން ފާހަގަކުރައްވަމުން އެމްޑީ ވިދާޅުވީ ގްރެވިޓީ ނިޒާމަކީ އަޑިއަށްވާ ގޮތަށް ބޮޑެތި ހޮޅިތަކެއް އެޅުމަށްފަހު ނަޖިސް ބޭރުކުރާ ގޮތަށް ފަރުމާކޮށްފައި ހުންނަ ނިޒާމެއް ކަމަށެވެ. މި ނިޒާމާއެކު މިހާރު ދިމާވާ މައްސަލަތަކަށް ދާއިމީ ހައްލެއް އަންނާނެ ކަމަށް މަޠީން ފާހަގަކުރެއްވިއެވެ.

މަޠީން ވިދާޅުވީ ނިލަންދޫގެ އައު ނަރުދަމާ ނިޒާމުގެ މަސައްކަތުގެ ދަށުން ޑިޒައިން މަސައްކަތް ކުރުމަށްޓަކައި ބޭނުންވާ ބިންތައް ކަނޑައެޅުމާއި ލޭންޑް ސާރވޭ ހެދުމާއި ޓޮޕޮގްރަފިކް ސާރވޭގެ މަސައްކަތް މިހާރު ނިމިފައިވާ ކަމަށެވެ. އަދި ޑިޒައިން ނިންމުމަށް ފަހު ޔުޓިލިޓީ ރެގިޔުލޭޓަރީ އޮތޯރިޓީގެ ހުއްދަތަކާއި އީއައިއޭ ނިންމުމަށްފަހު މެއި މަހުގެ ތެރޭގައި ޢަމަލީ މަސައްކަތް ފެށޭނެކަމަށް މަޠީން ވިދާޅުވިއެވެ. މި މަސައްކަތް ނިންމުމަށް ހަމަޖެހިފައި ވަނީ 2026 ވަނަ އަހަރު ފަހުކޮޅުއެވެ.