ENGLISH
04 އޭޕްރީލު 2025
އީދު ހަވީރު ނިމުމަކަށް؛ މާލެއަށް އީދެއް އައިކަމުގެ އިހުސާސްވެއްޖެ
01 އޭޕްރީލު 2025
|
އީދު ދުވަހުގެ ހަވީރު މާލޭގައި ކުރިއަށްގެންދިޔަ އީދު ހަވީރުގެ ތެރެއިން، ފޮޓޯ: މިހާރު
އެންމެ މަޤްބޫލު
މާލޭގެ ދިރިއުޅުމަކީ އުދަގޫ ދިރިއުޅުމެކެވެ. ތޮއްޖެހުން ބޮޑެވެ. ހުޅުވާލެވިފައިވާ މައިދާންތަކާއި މައިޒާންތައް މަދެވެ. ޢާއިލާއާއެކު ނިކުމެލައި ހިތްހަމަޖައްސައިލަން ކުރާނެ މާ ބޮޑު ކަމެއް ނޯވެއެވެ. ނަތީޖާއަކީ ޗުއްޓީއެއް ލިބުމާއެކު މާލެ ހުސްވުމެވެ. ހާއްސަކޮށް ދެ އީދު ޗުއްޓީއަކީ މާލެ ފަޅުވާ ޗުއްޓީތަކެވެ. ރަށްރަށުގައި އޮންނަ ފޯރިއާއި އީދު ފާހަގަކުރުމަށް ކުރިއަށްގެންދާ ތަފާތު ހަރަަކާތްތައް ތަޖުރިބާކުރުމުގެ ބޭނުމުގައި ގިނަ ބަޔަކު މާލެ ދޫކޮށް ޗުއްޓީގައި ރަށްރަށަށް ދަތުރުކުރެއެވެ.
ދާނެ ތަނެއް ނުވަތަ ތަނަކަށް ދެވޭނެ ގޮތެއް ނެތިވެ، މާލޭގައި "ތާށިވާ" މީހުންނަށް މާލެއަކީ ފޫހި ތަނެކެވެ. ޗުއްޓީއަކީ ގޭގެ ހަތަރު ފާރުގެ ތެރޭގައި ބަންދުވެގެން ތިބެންޖެހޭ ދުވަސްތަކެކެވެ. އާއިލާއާއެކު އުފާވެރި ވަގުތުކޮޅެއް ހޭދަަކޮށްލެވޭނެ ގޮތެއް ނެތިވުމުން ކުދިބޮޑު އެންމެން ފޫހިކަމުގައި ހޭދަކުރާ ދުވަސްތަކަކަށް އީދުގެ ޗުއްޓީ ބަދަލުވެއެވެ.
ނަމަަވެސް ވެރިކަންކުރާ މާލޭގައި ދިރިއުޅޭ އާއިލާތަކާއި ކުޑަކުދިންނަށްވެސް އީދުގެ އުފާވެރިކަން ލިބެންޖެހޭކަން ދިވެހި ސަރުކާރަށް ވިސްނި މާލޭގައި އީދު ފާހަގަކުރުމަށް މި އަހަރު ވަަރަށް ގިނަ ހަރަކާތްތައް އިންތިޒާމުކޮށްފިއެވެ. ހާއްސަކޮށް އީދު ދުވަހުގެ ހަވީރު މާލޭގެ ތިން ސަރަހައްދެއްގައި އެކުއެކީ ކުރިއަށްގެންދިޔަ އީދު ހަވީރު ވެގެންދިޔައީ ގިނަ ބަޔަކަށް އާއިލާއާއެކު ނުކުމެލައި އުފާވެރި ވަގުތުކޮޅެއް ހޭދަކޮށްލުމަށް ފަހިވި ފުރުސުތަކަށެވެ.
ކުޑަކުދިންނާއެކު މައިންބަފައިން އެތަނަށް ދިއުމުން އެކުދިން އުފަލުން ހެލިފެލިވެ އުޅޭ މަންޒަރު އަޅުގަނޑުމެންނަށް ފެނިގެންދިޔައެވެ. އީދު ދުވަހު އެ ހަރަކާތަށް ލިބުނު ތަރުހީބާއެކު އެ ހަވީރު އިތުރު ދެ ދުވަހު ކުރިއަަށްގެންދަން އެ ހަރަަކާތް އިންތިޒާމުކުރި ދިވެހި ގައުމީ ދިފާއީ ބާރާއި ފުލުހުންގެ ހިދުމަތުން ނިންމިއެވެ.
މިއަދަކީ އެ ހަރަކާތުގެ ފަހު ދުވަހެވެ. އީދު ހަވީރުގައި ބައިވެރިވި ކުޑަކުދިންނާއި އާއިލާތަކުން މިއަދު ފާޅުކުރަމުންއައީ އުފާވެރިކަމުގެ ޝުއޫރުތަކެވެ.
"ވަރަށް އުފާވެއްޖެ. މާލެއަށް އީދެއް އައި ކަމުގެ އިހުސާސްކުރެވިއްޖެ. އީދުގައި ކުރިން ވަރަށް ފޫހި މިފަހަރު ވަރަށް މަޖާ،" އީދު ހަވީރުގައި ބައިވެރިވެލަން އެތަނަށް ގޮސްހުރި ކުޑަކުއްޖަކު އެމްއެމްޓީވީއާ ވާހަކަދައްކަމުން ބުންޏެވެ. ތެދެކެވެ. އޭނާގެ މޫނުމަތިން ފެނުނީ އުފައުވެރިވެރިކަމުގެ ހިނިތުންވުމެވެ.
އީދު ހަވީރުގެ އިތުރަށް އީދު ފާހަގަކުރުމަށް ސަރުކާރުން ކުރި އަނެއްކަމަކީ މާލެ ޒީނަތްތެރިކުރުމެވެ. ވަރަަށް ގިނަ މީހުން ބުނެފައިވަނީ އީދުގައި ރަށުތެރެ ޒީނަތްތެރިކޮށް ބޮކިއަލިން ދިއްލަައިލުމަކީ އީދުގައި ހާއްސަ އުފާވެރިކަމެއް ގެނުވި ކަމެއް ކަމަށެވެ. އެކަކު ފާހަގަކުރި ގޮތުގައި އީދަށް މާލެ ޒީނަތްތެރިކުރުމުގެ ތެރެއިން އެންމެ ބޮޑަށް ފާހަގަވީ މަގުމަތިން ތަކުބީރު އަޑުއިވުމެވެ. އޭނާ ބުނީ އެއީ އީދުގެ ރޫހު ވަރަށް ބޮޑަށް ގެނުވި ކަމެއް ކަމަށެވެ.
އިތުރު އެހެން މީހަކު ފާހަގަކުރީ އާއިލާއާއެކު ހިތްހަމަޖައްސައިލަން ނުކުންނާނެ ތަންތަން މަދު އަދި ބޮޑެތި ޗުއްޓީގައި އެއްވެސް ކަމެއް ނެތި މަރުވެ ހަނަފަސްވާ މާލެއަށް މިފަހަރުގެ ފިތުރު އީދާއެކު ދިރުން އައި ކަމަށެވެ. މާލޭގައި ޗުއްޓީ ދުވަސްތައް ހޭދަކުރުމަކީ މަޖާ ހިތްފަސޭހަ ހިތްހަމަޖެހޭ ކަމަކަށްވާނެ ކަމުގައި ކުރިން އުންމީދު ނުކުރެވުނަސް އެ އުންމީދު މިފަހަރު ހަގީގަަތަކަށްވެގެން ގޮސްފައިވާ ކަމަށެވެ.
މިއަދު އީދު ހަވީރު ނިމުމަކަށް އައިއިރު އީދު ހަވީރު ވަކިވެގެންދަނީ މާލޭ ސަރަހައްދުގައި ދިރިއުޅޭ އާއީލާތަކަށް އީދުގެ އުފާވެރިކަން ގެނުވައިދީފައެވެ. ހާއްސަކޮށް މި ތޮއްޖެހުން ބޮޑު ސިޓީގައި ދިރިއުޅޭ ތުއްތުކުދިންގެ މޫނުމައްޗަށް ހިނިތުންވުން ވެރިކުރުވާފައެވެ.